Kauhanyo 14

Libaka Ha Lu Lukela Ku Swalela Ba Bañwi

KANA ku na ni mutu yo muñwi ya kile a ku foseza?— Kana n’a ku utwisize butuku kamba ku ku bulelela nto ye ñwi ye si ka luka?— Kana ni wena wa lukela ku mu eza mw’a ku ezelize?—

Batu ba bañata ha ba utwiswa butuku ki mutu, ba ka bata ku kutiseza yena mutu y’o. Kono Jesu n’a lutile kuli lu lukela ku swalela ba ba lu foseza. (Mateu 6:12) Ku cwañi haiba mutu a lu foseza hañata-ñata? Lu lukela ku mu swalela hakai?—

Pitrosi n’a bata ku ziba yona taba yeo. Kacwalo, zazi le liñwi a buza Jesu, a li: ‘Kana ni na ni ku mu swalela ku fita ha 7?’ Ku swalela mutu ha 7 ha ku si ka likana. Jesu n’a ize: ‘U swanela ku mu swalela ha 77’ haiba mutu y’o a ku foseza hañata-ñata cwalo.

Ku swalela mutu cwalo ki ko kutuna luli! Mane ne lu si ke lwa kona ku hupula lifoso kamba lika ze maswe z’a ezize ku luna mutu y’o, nji cwañi? Mi sa n’a lu bulelela Jesu kikuli: Ha lu lukeli ku hupula palo ya lifoso ze ba kana ba lu foseza ba bañwi. Ha ba kupa ku swalelwa, lu lukela ku ba swalela.

Jesu n’a bata ku bonisa balutiwa ba hae kuli ku swalela ku butokwa hahulu. Kacwalo, ha s’a alabile puzo ya Pitrosi, a  kandekela balutiwa ba hae likande. Kana wa tabela ku li utwa?—

Ne ku na ni mulena cwana yo munde. N’a li ya sishemo hahulu. Mane, batanga ba hae ha ne ba tokwa tuso, n’a ba kolotisanga masheleñi. Kono lizazi la taha leo mulena n’a bata kuli batanga ba hae be ne ba mu kolotezi masheleñi ba mu kutiseze ona. Kwa tiswa mutanga ya n’a kolotezi mulena y’o masheleñi a eza 60 milioni. Ki masheleñi a mañata hahulu!

 Kono mutanga y’o n’a itusisize masheleñi kaufela a n’a kolotile ku mulena mi n’a sa koni ku lifa mulena. Kacwalo, mulena a laela kuli mutanga y’o a lekiswe. Mulena hape n’a ize ku lekiswe ni musal’a mutanga y’o ni bana ba hae, hamoho ni za n’a luwile kaufela. Ka ona masheleñi ao a n’a ka zwa ku ze lekisizwe, mulena n’a ka lifiwa. Ka m’o bonela wena, mutanga y’o n’a ikutwile cwañi ka za taba yeo?—

A kubama fapil’a mulena, mi a mu kupa, a li: ‘Shangwe, u ni fe nako, mi ni ka lifa masheleñi kamukana e ni ku kolotezi.’ Kambe n’e li wena mulena, n’o ka eza cwañi mutanga y’o?— Mulena n’a shwezi mutang’a hae makeke. Kacwalo, mulena a mu swalela. A bulelela mutanga y’o kuli a si ke a mu kutiseza, niheba a makana kwa masheleñi a 60 milioni ao. Mutanga y’o u lukela ku ba ya n’a tabile hahulu!

Kono cwale mutanga y’o n’a ezizeñi? A ya, a y’o fumana mutanga yo muñwi ya n’a mu kolotezi masheleñi a eza fela 100. A swala mutanga y’o mwa mulala mi a kalisa ku mu kama, inz’a bulela kuli: ‘U ni life masheleñi a 100 e u ni kolotezi!’ Kana wa kona ku nahana kuli mutu wa kona ku eza nto ye cwalo, sihulu yena ha s’a swalezwi hahulu cwalo ki mulena?—

Mutanga y’o ya n’a kolotile masheleñi a eza 100 n’a li mubotana. N’a sa koni ku kutisa masheleñi ao honaf’o. Kacwalo, a kubama kwa mahutu a mutanga yo muñwi y’o ni ku mu kupa kuli: ‘Shangwe, ha ku ni fe nako, mi ni ka ku lifa se ni ku kolotezi.’ Kana munna y’o n’a lukela ku fa mutanga yo muñwi y’o nako?— Wena n’o ka ezañi?—

Munna y’o n’a si ya sishemo, sina mwa n’a inezi mulena. N’a bata masheleñi a hae honaf’o. Mi bakeñisa kuli mutanga yo muñwi y’o n’a sa koni ku lifa sikoloti seo, munna y’o a mu nepela mwa tolongo. Batanga ba bañwi ba bona zeo kaufela ha li ezahala, mi ne ba si ka  tabela. Ne ba utwezi butuku mutanga yo muñwi y’o ya n’a li mwa tolongo. Kacwalo, ba ya ba y’o bulelela mulena ka za teñi.

Mulena ni yena n’a si ka tabela ze n’e ezahezi. A nyemela hahulu mutanga y’o ya n’a si ka swalela yo muñwi. Kacwalo, a mu biza ni ku mu bulelela kuli: ‘Wena mutanga ya maswe, kana na ne ni si ka ku swalela ze ne u ni kolotezi? Kacwalo, kiñi ha ne u si ka swalela mutanga yo muñwi?’

Mutanga ya n’a sa swaleli y’o n’a lukela ku ituta tuto ku mulena yo munde. Kono n’a si ka ituta yona. Kacwalo, mulena y’o a laela kuli mutanga y’o a iswe mwa tolongo ku fitela a kutisa masheleñi a eza 60 milioni. Mi kaniti, mwa tolongo n’a sa koni ku fumana masheleñi a ku kutiseza mulena. Kacwalo, n’a ka ina mwateñi ku fitela a shwa.

Jesu ha s’a felize ku kandeka likande leo, a bulelela balateleli ba hae kuli: “Ndate ya kwa lihalimu u ka mi eza cwalo, mutu ni mutu ya sa swaleli mwanahabo lifoso, ka pilu ya hae kaufela.”—Mateu 18:21-35.

 Wa bona, kaufel’a luna lu kolotezi Mulimu ze tuna. Mane, bona bupilo bwa luna luli bu zwa ku Mulimu! Kacwalo, ze lu kolotezi Mulimu ki ze tuna ku fita ze ba lu kolotezi batu ba bañwi. Ze ba lu kolotezi li swana sina masheleñi a 100 ao mutanga y’o n’a kolotezi yo muñwi. Kono ze lu kolotezi Mulimu kabakala mafosisa e lu ezanga li swana ni masheleñi a 60 milioni ao mutanga yo muñwi y’o n’a kolotezi mulena.

Mulimu u sishemo hahulu. Niha lu ezize lika ze si ka luka, wa lu swalela. H’a lu lifisi ka ku lu amuha bupilo bwa luna ku ya ku ile. Kono tuto ye lu lukela ku hupula ki ye: Mulimu wa lu swalela ibile fela lu swalela batu ba ba lu foseza. Yeo ki tuto ya butokwa, nji cwañi?—

Kacwalo, haiba yo muñwi a eza nto ye ñwi ye si ka luka ku wena kono cwale a kupa swalelo, u ka ezañi? Kana u ka mu swalela?— Ku cwañi haiba a ku foseza hañata-ñata? Kana niteñi u ka mu swalela?—

Kambe ki luna ba ba kupa ku swalelwa, lu ka bata kuli yo muñwi a lu swalele, nji cwañi?— Kacwalo, ni luna lu lukela ku eza nto ye swana ku y’a lu foseza. Ha lu lukeli ku bulela fela kuli lu mu swalezi, kono lu lukela ku mu swalela luli ka pilu ya luna kaufela. Ha lu eza cwalo, lu bonisa kuli luli lu bata ku ba balateleli ba Muluti yo Mutuna.

Kuli lu bone butokwa bwa ku ba ya swalela ba bañwi, ha lu bale ni Liproverbia 19:11; Mateu 6:14, 15; ni Luka 17:3, 4.

[Siswaniso se si fa likepe 77]

Pitrosi n’a bata ku zibañi ka za swalelo?

[Siswaniso se si fa likepe 78]

Ne ku ezaheziñi mutanga ha n’a kupile kuli mulena a mu fe nako ye ñwi ya ku kutisa sikoloti?

[Maswaniso a fa likepe 78]

Mutanga y’o n’a ezize cwañi mutanga yo muñwi ya n’a sa koni ku mu kutiseza masheleñi a n’a mu kolotezi?

[Siswaniso se si fa likepe 80]

Mulena n’a ezize cwañi mutanga ya n’a sa swaleli?

[Siswaniso se si fa likepe 81]

U ka eza cwañi mutu h’a ku kupa kuli u mu swalele?