BAKADIKU bakuenzele bualu bubi kudi muntu anyi?​— Muntu au uvuaku mukukengeshe peshi mukuambe dîyi divua dikusame ku muoyo anyi?​— Udi pebe ne bua kumuenzela bibi bu muvuaye mukuenzele amu anyi?​—

Bantu ba bungi, padi muntu ubenzela bibi, badi pabu bamuenzela bibi. Kadi Yezu wakalongesha ne: tudi ne bua kufuila bantu badi batuenzela bibi luse. (Matayo 6:12) Wewe udi mua kuenza tshinyi padi muntu ukuenzela bibi misangu ne misangu? Neumufuile luse misangu bungi munyi?​—

Ke bualu buvua Petelo ujinga kumanya abu. Nanku wakakonka Yezu dikuabu dituku ne: ‘Ndi ne bua kumufuila luse misangu nansha muanda-mutekete anyi?’ Kadi misangu muanda-mutekete ki mmikumbane to. Yezu wakamba ne: ‘Udi ne bua kumufuila luse misangu makumi muanda-mutekete ne muanda-mutekete’ bikala muntu mukuenzele bibi misangu bungi nanku.

Misangu ya bungi nanku! Katuena nansha mua kuvuluka bungi bua malu mabi onso adi muntu mutuenzele to, ki mmuomu anyi? Ke bualu mene buvua Yezu utuambila ne: kabiena bikengela bua kuteta mua kuvuluka bungi bua malu mabi adi bakuabu batuenzela to. Padibu batulomba bua kubafuila luse, mbimpe kubafuila luse.

 Yezu uvua musue kuleja bayidi bende mushindu udi difuilangana luse dikale ne mushinga wa bungi. Nunku pakajikijaye kuandamuna lukonko lua Petelo, wakalondela bayidi bende muyiki kampanda. Udi musue kuuteleja anyi?​—

Kuvua tshikondo kampanda tshivuaku mukalenge muimpe be. Mukalenge au uvua ne muoyo muimpe be. Uvua misangu mikuabu usombesha too ne bapika bende makuta pavuabu nau dijinga. Kadi dimue edi mukalenge au wakajinga bua bapika bende  bavua ne mabanza ende bamufute. Bakabueja mupika mukuabu uvua ne dibanza dia mukalenge dia mfualanga miliyo 60 kuluabu nende kumpala kua mukalenge. Avua makuta a bungi be!

Kadi mupika au ukavua mutule makuta onso a mukalenge ne kavua kabidi ne mushindu wa kufuta dibanza dia bende dia mukalenge to. Nanku mukalenge wakatuma dîyi bua bapane mupika au. Mukalenge wakatuma kabidi dîyi bua bapane too ne mukaji wa mupika au ne bana bende ne bintu biende bionso. Pashishe, makuta avuabu mua kupeta avua ne bua kufuta dibanza dia mukalenge. Udi wela meji ne: mupika au uvua mua kuikala mudiumvue munyi?​—

Wakatua binu kumpala kua mukalenge ne kumusengelelaye ne: ‘Umpesheku matuku ndambu, nenkufute dibanza dionso.’ Bu wewe muikale mukalenge au, uvua mua kuenza tshinyi ne mupika au?​— Mukalenge wakumvuila mupika wende luse. Nanku mukalenge kumufuilaye luse. Wakambila mupika bua kafutshi kabidi dikuta nansha dimue to, kumuambila bua kafutshi nansha dimue dia ku mfualanga miliyo 60 ayi to. Bualu ebu buvua ne bua kuikala bupeshe mupika au disanka dikole!

Kadi ntshinyi tshiakenza mupika au pashishe? Wakaya kumonangana ne mupika nende mukuabu uvua ne dibanza diende anu dia mfualanga lukama patupu. Kufiekelaye mukuende mu diminu umuambila ne: ‘Futa dibanza dianyi dia mfualanga lukama diudi nadi!’ Udiku mua kuela meji muntu wenza bualu bua mushindu eu, nangananga padibu bafuminaku ku dimufuila luse lua bungi kudi mukalenge anyi?​—

Bushuwa, mupika au uvua ne dibanza dia mukuende dia mfualanga lukama patupu uvua mupele. Kavua ne mushindu wa kufuta dibanza adi anu mpidieu to. Nunku wakatua binu ku makasa a mupika nende au e kumusengelelaye ne: ‘Umfuile luse umpesheku matuku ndambu, nemfute dibanza diebe.’ Muntu au uvuaku mua kushila mupika nende matuku ndambu anyi?​— Wewe uvua mua kuenza tshinyi?​—

Muntu eu kavua muntu muimpe bu muvua mukalenge to. Uvua ukeba anu mpindieu makuta ende. Nenku bu muvua mupika nende au kayi mua kuafuta, wakamukuatshisha ne kumueleshishaye mu buloko. Bapika bakuabu bakamona malu onso aa muvuawu menzeke, kabakanyisha  bualu abu to. Biakabatonda bikole bua mupika uvuabu beleshishe mu buloko au. Nunku bakaya kulondela mukalenge bualu abu.

Mukalenge kakasanka pende bua bualu buvua buenzeke abu to. Wakafikila mupika uvua kayi mufuile mukuende luse au munda bikole. Wakamubikila e kumuambila ne: ‘Mupika mubi we, meme tshienaku mukufuile luse bua dibanza dianyi diuvua nadi anyi? Nunku wewe kuvuaku mua kufuila mukuebe luse bua tshinyi?’

Mupika wa muoyo mubi uvua kayi mufuilangane luse au uvua ne bua kuikala mupeteleku dilongesha kudi mukalenge muimpe eu. Kadi kavua mudipete to. Nanku mukalenge wakelesha mupika au mu buloko too ne pavuaye mua kulua kufuta dibanza dia mfualanga yonso miliyo 60. Kadi mu buloko muvuaye amu, kavua mua kupeta makuta bua kufuta dibanza dia mukalenge to. Nanku uvua ne bua kushalamu too ne ku lufu luende.

Pakajikija Yezu kulonda muyiki eu, wakambila bayidi bende ne: ‘Tatu wanyi wa mu diulu neanuenzele muomumue kabidi, panuikala kanuyi nulekelela mukuenu yonso mibi yende mu mitshima yenu.’​—Matayo 18:21-35.

 Udi mumone, tuetu bonso tudi ne dibanza dia Nzambi dinene menemene. Muoyo utudi nawu mmufume kudi Nzambi! Nunku patudi tufuanyikija dibanza dia Nzambi ditudi nadi, dietu dibanza didi nadi bantu bakuabu ndikese menemene. Dibanza dietu didibu nadi didi anu bu mfualanga lukama ivua mupika umue au ne bua kufuta mukuende. Kadi dibanza dia Nzambi ditudi nadi bua malu mabi atutu tuenza didi anu bu mfualanga miliyo 60 ivua mupika au ne bua kufuta mukalenge.

Nzambi mmuntu muimpe be. Nansha mutudi benze malu mabi, udi amu utufuila luse. Kena utufutshisha dibanza ufika too ne ku ditunyenga muoyo wetu bua kashidi to. Kadi tudi ne bua kuvuluka bualu budi bulonda ebu: Nzambi udi utufuila luse anu patudi tufuila petu bantu badi batuenzela bibi luse. Edi ndilongesha dia mushinga mukole, ki mmuomu anyi?​—

Nunku padi muntu ukuenzela bualu bubi kadi pashishe ukulomba luse, newenze tshinyi? Neumufuile luse anyi?​— Kadi bikalaye ukuenzela bibi misangu ne misangu? Newikale anu umufuila luse anyi?​—

Bu wewe mua kuikala muntu udi ulomba bua bamufuile luse, si newanyishe bua muntu mukuabu akufuile luse, ki mmuomu anyi?​— Nanku udi pebe ne bua kumufuile luse. Ki mbimpe anu kuamba patupu ne: udi umufuila luse to, kadi udi ne bua kumufuila luse menemene munda muebe. Paudi wenza nanku udi uleja ne: udi musue menemene kuikala muyidi wa Mulongeshi Munene.