WALA ta lay akagawa na makapuy ed sika?— Kasin sinakitan to ka odino angibaga na makapuy ed sika?— Kasin ombawi ka met?—

Dakel a totoo so ombawi met no walay amasakit ed sikara. Balet imbangat nen Jesus a perdonaen tayo iraman so manggawa na makapuy ed sikatayo. (Mateo 6:12) Panon to ey no aminpiga-piga lan pinasakitan itayo na sakey? Maminpiga tayo kasin perdonaen?—

Labay nen Pedro a naamtaan itan. Kanian sakey ya agew et tinepetan toy Jesus: ‘Kasin sikatoy perdonaen ko anggad maminpito?’ Balet, kulang ni so maminpito. Inkuan nen Jesus: ‘Nepeg mon perdonaen a maminpitomplo tan pito’ no mankasalanan ed sika so sakey ed ontan a karakel.

Dakerakel itan! Agtayo ingen natandaan so dakel a kasalanan odino mauges iran bengatla a ginawa na sakey ed sikatayo, agta ontan? Ontan so labay ya ibabaga nen Jesus ed sikatayo: Agtayo bibilangen iray makapuy a nayarin gawaen na arum ed sikatayo. No mipeperdonaan ira, nepeg tayo iran perdonaen.

Labay nen Jesus ya ipanengneng ed saray babangatan to ya importantin maong so pamerdona. Kanian kayari ton inebatan so tepet nen Pedro, inistoryaan toray babangatan to. Labay mon dengelen?—

 Walay sakey a maong ya ari nensaman. Sikatoy mapangasin maong. Paotangen to ni ingen na kuarta iray ariripen to no nakaukolan day tulong. Balet sinmabi panaon a labay na ari a sikatoy bayaran la na saray ariripen to ya akaotang ed sikato na kuarta. Kanian, sakey ya aripen so impatawag lapud akaotang ed ari na 60 milyon a kuarta. Dakdakel itan a kuarta!

Balet agastos la na aripen so amin a kuarta na ari tan agto nabayaran so ari. Kanian  ingganggan na ari ya ilako so aripen. Imbaga met na ari ya ilako so asawa na aripen tan ananak to tan amin a kayarian to. Insan say panlakoan so ibayar ed ari. Antoy nibagam a liknaan na aripen lapud saman?—

Sikatoy tinmalimukor ed arap na ari tan akikasi: ‘Ipangasim, ikdan moak ni na panaon, tan bayaran kon amin so inotang ko ed sika.’ No bilbilang ta sika so ari, antoy gawaen mo ed aripen ey?— Akasian na ari so aripen to. Kanian sikatoy pinerdona na ari. Imbaga to ed aripen ya agto la babayaran so otang to, anggan sakey labat ed 60 milyon. Seguradon malikeliket so aripen!

Balet anto so ginawa na aripen kayari na saman? Sikatoy inmalis la tan anengneng to so sananey ya aripen, ya akaotang ed sikato na sanlasus labat a kuarta. Siningkat to ed beklew iman a kapara ton aripen insan to titikelen, ya inkuan to: ‘Bayaran moy sanlasus ya inotang mo ed siak!’ Naisip mo kasi a nitepel a gawaen na sakey a too so ontan, lalo la ta sikatoy pinerdona la na ari?—

Onia’ay, samay aripen ya akaotang labat na sanlasus a kuarta et pobri. Agto nabayaran a tampol so kuarta. Kanian sikatoy kinmebkeb ed kapara ton aripen tan akikasi: ‘Ipangasim, ikdan moak ni na panaon, tan bayaran ko so inotang ko’d sika.’ Kasin pinasensiaan ni na too so kapara ton aripen?— No sika, antoy gawaen mo ey?—

Aliwan mapangasi iyan too, a singa ed inkamapangasi na ari. Say labay to et nabayaran a tampol so kuarta to. Tan lapud agnabayaran itan na kapara ton aripen, sikatoy impaipriso to. Anengneng na arum ya ariripen iyan amin ya agawa, et agda agustoan. Asakitan ira ed inkapriso na aripen. Kanian linma ira ed ari tan indalem da iman.

Agmet agustoan na ari so agawa. Sikatoy nampasnok a maong  lapud saman ya aripen ya ag-amerdona. Kanian impatawag to so aripen tan inkuan to: ‘Sika a mauges ya aripen, agta pinerdona ta’ka ed otang mo ed siak? Agta nepeg mo met komon a pinerdona so kaparam ya aripen?’

Akaaral la komon na leksion manlapud maong ya ari iman ya ag-amerdona ya aripen. Balet ta andi. Kanian impaipriso na ari so aripen anggad nabayaran toy 60 milyon a kuarta. Siempre, diad prisoan et agton balot makalmo na kuarta ya ibayar to ed ari. Kanian sikatoy ipriso anggad ipatey to.

Sanen asumpal nen Jesus so istorya to, inkuan to ed saray papatumbok to: “Ontan met naani gawaen nen Amak a mangatatawen ed sikayo, no sakey tan sakey ed sikayo agto perdonaen so agi to a manlapu ed puso yo.”—Mateo 18:21-35.

Antam, baleg so otang tayon amin ed Dios. Diad tua, say dilin bilay tayo et nanlapud Dios! Kanian no ikompara tayoy otang tayo ed  Dios, melag so otang na arum a totoo ed sikatayo. Say otang da ed sikatayo et singa labat sanlasus a kuarta ya otang na samay aripen ed kapara ton aripen. Balet say otang tayo ed Dios lapud mauges iran nagagawaan tayo et singa ed samay otang na aripen ed ari a 60 milyon.

Say Dios so mapangasin maong. Anggaman makakagawa tayo na saray makapuy, peperdonaen to tayo. Agto tayo pambabayaren, diad pangala toy bilay tayo ed andi-angga. Balet saya so leksion a nepeg tayon tandaan: Perdonaen itayo labat na Dios no perdonaen tayoray totoo a manggagawa na makapuy ed sikatayo. Satan so nodnonoten tayon maong, agta ontan?—

Kanian no walay sakey a nanggawa na makapuy ed sika balet ta imbaga to’d sikan “pasensia ka la,” antoy gawaen mo ey? Kasin perdonaen mo?— Panon to no aminpigapiga la ey? Kasin perdonaen mo ni?—

No sikatayoy onkekerew na panamerdona, labay tayon perdonaen itayo met na arum, agta ontan?— Kanian gawaen tayo met so ontan ed sikato. Agtayo labat basta ibaga a sikatoy perdonaen tayo noagta sikatoy perdonaen tayo manlapud puso. No gawaen tayo itan, ipapatnag tayo a talagan labay tayoy magmaliw a papatumbok na Sankamaongan a Managbangat.