UN HENDE a yega di hasi bo un kos malu?— El a yega di dal bo òf bisa bo un kos ku a hasi bo tristu?— Bo mester hasi kuné meskos ku é a hasi ku bo?—

Tin hopi hende ku, ora un hende hasi nan algu, nan ta hasi e hende ei algu bèk. Pero Hesus a siña nos ku nos mester pordoná hende ku hasi malu kontra nos. (Mateo 6:12) Awor, kiko nos mester hasi si un hende ta keda hasi malu kontra nos kada bes? Kuantu biaha nos mester pordon’é?—

Pedro tabatin gana di sa e kos ei. P’esei, un dia el a puntra Hesus: ‘Mi mester pordon’é te shete bes?’ Pero shete bes no ta basta. Hesus a kontest’é: ‘Setenta biaha shete bes bo mester pordoná’ si e hende peka asina tantu biaha kontra bo.

Setenta biaha shete ta hopi! Si un hende hasi malu asina hopi biaha kontra nos, nos lo no por kòrda mes ta kuantu biaha el a hasié, bo no ta kere? I ta esei mes Hesus tabata kier men: Nos no mester purba kòrda kuantu biaha un hende ta hasi malu kontra nos. Si e pidi nos pordon, nos mester pordon’é.

Hesus kier a mustra su disipelnan kon importante ta pa pordoná. P’esei, despues ku el a kontestá Pedro  su pregunta, el a konta su disipelnan un kuenta. Bo tin gana di tend’é?—

Un dia tabatin un bon rei. E tabata hopi bondadoso. E tabata asta fia su esklabonan plaka ora nan tabatin mester di yudansa. Pero a yega e dia ku e rei tabata ke pa su esklabonan ku a deb’é, pag’é su sèn bèk. Wèl, un di e esklabonan ku nan a trese dilanti dje rei tabata deb’é 60 mion moneda. Esei sí ta hopi plaka!

 Pero e esklabo a gasta tur e sèn dje rei, i e no por a paga bèk. Awèl, e rei a duna òrdu pa bende e esklabo. E rei a bisa pa bende e kasá di e esklabo, i su yunan, i tur loke tabata di dje. I ku e sèn ku nan haña nan mester a paga e rei bèk. Kon bo ta kere ku e esklabo a sintié?—

El a kai na rudia dilanti e rei i rog’é: ‘Por fabor, duna mi mas tempu i lo mi paga bo tur loke mi ta debe bo.’ Si abo tabata e rei, kiko lo bo a hasi ku e esklabo?— E rei a sinti duele dje esklabo, i el a pordon’é. El a bisa e esklabo ku e no tin nodi paga nada bèk, ni un sèn chikí di tur e 60 mion monedanan. E esklabo lo mester a bira hopi kontentu, no?

Pero kiko e esklabo a hasi e ora ei? El a sali i a topa un otro esklabo ku tabata debe é shen moneda so. El a gara e otro esklabo aki na su garganta i kuminsá chok’é. El a bis’é: ‘Paga mi e shen monedanan ku bo debe mi!’ Bo por kere ku un hende ta hasi un kos asina, anto nèt despues ku e rei a pordon’é un debe asina grandi?—

Wèl, e esklabo ku tabata deb’é djis shen pida plaka tabata pober. E no por a paga e plaka bèk mesora. El a tira su kurpa abou na pia di e otro esklabo i a rog’é: ‘Por fabor, duna mi mas tempu i lo mi paga bo loke mi debe bo.’ Bo ta kere ku e hòmber mester a duna e otro esklabo mas tempu pa paga?— Kiko abo lo a hasi?—

E hòmber aki sí no a mustra bondat manera e rei a mustra na dje. E tabata ke su sèn mesora. I dor ku e otro esklabo no por a pag’é, el a laga tir’é den prizon. E otro esklabonan a mira kiko a pasa, i nan no a gusta. Nan a sinti duele di e esklabo den prizon. P’esei, nan a bai konta e rei kiko a pasa.

 E rei tampoko no a gusta loke a pasa. El a rabia masha hopi mes ku e esklabo ku no kier a pordoná. Wèl, el a yam’é i bis’é: ‘Esklabo malbado, mi no a pordoná bo tur loke bo tabata debe mi? Awèl, abo tambe no mester a pordoná bo kompañero esklabo?’

E esklabo ku no kier a pordoná mester a siña un lès for di loke e bon rei a hasi p’e. Pero e no a siña nada. P’esei e rei a laga tira e esklabo ei den prizon te ora e por paga e 60 mion monedanan. Anto di mes, será den prizon e no por gana sèn pa paga e rei bèk. P’esei e mester a keda será te dia e muri.

Ora Hesus a kaba di konta e kuenta, el a bisa su siguidónan: “Asina tambe mi Tata selestial lo hasi ku boso, si kada un di boso no pordoná su ruman di henter su kurason.”—Mateo 18:21-35.

 Bo a komprondé? Nos tur debe Dios masha hopi mes. Ta Dios a duna nos asta nos bida! P’esei, ora bo kòrda kuantu kos nos debe Dios, e kosnan ku otro hende debe nos ta masha poko. Loke nan debe nos ta manera e shen monedanan ku un dje esklabonan tabata debe e otro. Pero e debe ku nos tin serka Dios dor ku nos ta hasi kos malu ta manera e 60 mion monedanan ku e esklabo tabata debe e rei.

Dios ta hopi bondadoso. Maske nos ta hasi kos malu, e ta pordoná nos. E no ta pone nos pag’é dor di kita nos bida for di nos pa semper. Pero nos mester kòrda e lès aki sí: Dios ta pordoná nos sí, basta ku nos ta pordoná hende ku ta hasi malu kontra nos. Esei ta un kos serio pa pensa ariba, no?—

P’esei, si un hende hasi bo un kos malu, pero despues e ta pidi bo despensa, kiko bo ta hasi? Lo bo pordon’é?— Awor, si e mesun kos ei bolbe sosodé kada bes, lo bo sigui pordon’é tòg?—

Ora nos pidi despensa, nos ke pa e otro hende pordoná nos, no ta asina?— P’esei, nos mester hasi meskos ku otro hende. Nos no mester djis bisa ku nos ta pordoná nan. Nos mester pordoná nan di bèrdat, di kurason. Ora nos hasi asina nos ta mustra ku di bèrdat nos ke ta siguidó di e Gran Maestro.