UA FAI e se isi se mea sesē iā te oe?— Pe sa faatigā atu, po o le fai foʻi o se faamatalaga lē alofa?— Pe e ao ea ona e toe faia iā te ia mea leaga na ia fai mai iā te oe?—

O le toʻatele o tagata, latou te toe taui atu mea tigā na faia e tagata iā i latou. Ae ua aʻoaʻoina i tatou e Iesu, e faamagalo atu i ē ua agaleaga mai iā i tatou. (Mataio 6:12) Ae ā pe a agaleaga mai se tasi iā i tatou, i le tele o taimi? E faafia ona tatou faamagalo i lenā tagata?—

Na fia iloa e Peteru le mea lenā. O lea, na fesili atu ai Peteru iā Iesu: ʻPe e tatau ona ou faamagalo atu faafitu iā te ia?’ E lē lava le faamagalo atu faafitu. Na faapea atu Iesu: ʻE faafitu sefulu ma le fitu ona e faamagalo atu i ai,’ pe afai o le tele lenā o taimi e agasala atu ai se tagata iā te oe.

O le matuā tele lava o taimi! E lē mafai ona tatou faitauina le tele o mea sesē ma mea leaga ua fai mai e isi iā i tatou, a ea? E manaʻo la Iesu tatou te aʻoaʻoina le lesona lenei: E lē tatau ona tatou taumafai e manatua le aofaʻi o mea sesē ua fai mai e isi iā i tatou. A faatoese mai se tasi iā i tatou, e tatau ona tatou faamagalo i ai.

Na manaʻo Iesu e faailoa i ona soo le tāua tele o le faamagalo atu. Ina ua uma la ona tali e Iesu le fesili a Peteru, na ia  faamatala ai loa se tala. E te fia faalogo i le tala?—

I aso la, sa iai se tupu alofa ma agalelei. Na avatu e lenei tupu, tupe e aitalafu e ana auauna pe a latou moomia se fesoasoani. Ae i se tasi aso, ua manaʻo ai le tupu e toe totogi atu e ana auauna a latou aitalafu. Na avane i luma o le tupu se tasi o auauna sa iai sana aitalafu tupe e 60 miliona tenari. Oka se tupe inā telē!

 Peitaʻi, ua uma ona faaaogā e le auauna le tupe a le tupu, ma ua lē mafai ona toe totogi. O lea la, na faatonu ai e le tupu e faatau atu le auauna lenei. Na fai atu foʻi le tupu e faatau atu le toʻalua o le auauna, o lana fanau ma ana mea uma. O se tupe e maua mai ai, o le a toe totogi ai le aitalafu i le tupu. O le ā sou manatu, o ā ni faalogona o le auauna sa iai?—

Na tootuli le auauna i luma o le tupu ma ʻaiʻoi atu: ʻFaamolemole lava, seʻi tuu mai se isi taimi, ona ou toe totogi atu ai lea o mea ua ou aitalafu ai.’ Ana faapea o oe o le tupu, o le ā se mea e te fai i le auauna?— Sa tigā alofa le tupu mo lana auauna, ma na faamagalo i ai. Ua fai atu i ai le tupu e aua le popole, e lē toe totogia lana aitalafu, e oo lava i sina sene se tasi. Na matuā fiafia le auauna!

Ae o le ā na fai e lenā auauna? Na alu atu i se tasi o auauna o lē sa nofo aitalafu iā te ia i ni tupe e na o le 100 tenari. Na mau le auauna i le ua o le isi auauna ma amata ona titina ma faapea atu: ʻIa toe totogi mai aʻu tupe e 100 o loo e aitalafu ai!’ O le ā sou manatu i se tagata e amio faapena, aemaise sa matuā telē lana aitalafu na faamagalo e le tupu?—

O le mativa ia o si auauna lea na ia aitalafuina le tupe e 100 tenari. E lē mafai ona totogi vave lana aitalafu. O lea na ia tootuli ai i vae o le auauna ma ʻaiʻoi atu: ʻFaamolemole lava, tuu mai se taimi iā te aʻu e totogi atu ai mea o loo oʻu nofo aitalafu ai.’ Pe sa tatau i le tamāloa ona tuu atu se isi taimi i le auauna?— O le ā sau mea e fai pe ana o oe?—

E leʻi agalelei lenei tagata e pei o le tupu. Na manaʻo i lana tupe i le taimi lava lenā. Talu ai e leʻi mafai e le isi auauna ona toe totogi lana aitalafu, na loka ai loa i le falepuipui. Na iloa e isi auauna le mea na tupu, ma e leʻi fiafia i ai. Sa latou alolofa i si auauna lea na loka i le falepuipui. O lea na latou ō ai i le tupu ma faamatala i ai le mea na latou iloa.

 E leʻi fiafia foʻi le tupu i tala na faalogo ai. Ua oso aʻe le ita o le tupu i le auauna lē loto faamagalo. Na aami e le tupu le auauna ma fai atu i ai: ʻLe auauna leaga e, pe ou te leʻi faamagaloina aʻu mea uma ua iā te oe? Pe na lē tatau foʻi ona e faamagalo i le isi auauna?’

Na tatau ona aʻoaʻoina e lenei auauna lē loto faamagalo, se lesona mai lenei tupu lelei. Ae e leai ma sana mea na aʻoaʻoina mai le tupu. O lea na loka ai e le tupu lenei auauna i le falepuipui seʻia uma ona toe totogi lana aitalafu tupe e 60 miliona tenari. O le mea moni, e lē mafai ona maua e le auauna se tupe faapena i totonu o le falepuipui e totogi atu i le tupu. O lea la, o le a faaauau ona loka i le falepuipui seʻia oo ina oti.

Na fetalai atu Iesu i ona soo ina ua uma le tala: “E faapea foʻi ona faia iā te outou e loʻu Tamā o i le lagi, pe afai tou te lē taʻitasi ma faamagalo ma o outou loto atoa i o outou uso.”​—Mataio 18:21-35.

E tatau ona tatou malamalama, e tele mea ua tatou nofo aitalafu ai i le Atua. O o tatou ola, e mai i le Atua! O lea la, e itiiti mea ua nofo  aitalafu ai tagata iā i tatou, pe a faatusatusa i mea ua tatou nofo aitalafu ai i le Atua. O mea ua nofo aitalafu ai tagata iā i tatou, e mafai ona faatusa i tupe e 100 lea na nofo aitalafu ai le tasi auauna i le isi auauna. Ae o mea ua tatou nofo aitalafu ai i le Atua ona o a tatou mea sesē e fai, e mafai ona faatusa i tupe e 60 miliona lea na nofo aitalafu ai le auauna i le tupu.

E ese le agalelei o le Atua. E ui i a tatou mea sesē e fai, ae e faamagalo i tatou e le Atua. E lē o fetalai mai le Atua e toe totogi atu a tatou aitalafu, e ala i le aveesea e faavavau o o tatou ola. Ae e tatau ona tatou manatua le lesona lenei: E faatoʻā faamagalo i tatou e le Atua pe afai tatou te faamagalo atu i isi ua agaleaga mai iā i tatou. O se lesona tāua tele lenei tatou te mafaufau i ai, a ea?—

O lea la, a faapea e agaleaga atu se tagata iā te oe ae mulimuli ane toe faatoese atu, o le ā lau mea e fai? Po o le a e faamagalo i lenā tagata?— Ae ā pe a agaleaga atu le tagata lenā, i le tele o taimi? Po o le a e faamagalo pea i ai?—

A faapea o i tatou lea o loo faatoese atu i se tagata, tatou te mananaʻo e faamagalo mai i tatou e le tagata lenā, a ea?— O lea la, e tatau foʻi ona tatou faamagalo atu. E lē gata tatou te faapea atu ua tatou faamagalo iā te ia, ae e ao ona tatou faamagalo atu mai o tatou loto. A tatou faia le mea lenā, ua faaalia ai tatou te mananaʻo moni lava e mulimuli atu i le Faiaʻoga Sili.