OITI wan sma du wan ogri nanga yu?— A sma ben du wan hati sani nanga yu, noso a ben taigi yu wan sani di yu no lobi?— Yu musu du a srefi sani nanga a sma dati?—

Furu sma sa du wan hati sani baka nanga a sma di ben du den ogri. Ma Yesus ben leri wi taki wi musu gi pardon na den sma di e du ogri nanga wi (Mateyus 6:12). Fa a de te wan sma no e handri bun nanga wi furu tron? Omeni leisi wi musu gi en pardon?—

Na dati Petrus ben wani sabi. Sobun, wan dei a aksi Yesus: ’Mi musu gi a sma dati pardon seibi tron srefi?’ Seibi tron no sari. Yesus piki en: ’Yu musu gi a sma pardon seibitenti na seibi tron’ efu na someni leisi a e sondu teige yu.

Dati na furu leisi trutru! Wi no ben o memre someni fu den ogri noso takru sani srefi di wan sma du nanga wi, a no so? Èn na dati Yesus ben wani leri wi: Wi no musu pruberi fu memre ala den ogri di sma du nanga wi kande. Efu den sma e aksi wi pardon, dan wi musu gi den pardon.

Yesus ben wani sori den disipel fu en o prenspari a de fu gi sma pardon. Sobun, baka di a piki na aksi fu Petrus, dan a fruteri den disipel fu en wan tori. Yu wani yere en?—

 Wan leisi, wan bun kownu ben de. A ben abi switifasi trutru. A ben gwenti srefi fu leni moni na den srafu fu en te den ben abi yepi fanowdu. Ma a dei ben doro di a kownu ben wani taki den srafu di ben leni moni fu en, ben musu pai en baka. We, sma tyari wan srafu kon na fesi a kownu, èn a srafu disi ben musu pai a kownu 60 milyun denari. Dati na bun furu moni!

Ma a srafu ben gebroiki ala moni fu a kownu èn a no ben man pai a kownu baka. Fu dati  ede a kownu taigi sma fu seri a srafu disi. A kownu taigi den sosrefi fu seri a wefi fu a srafu, den pikin fu en, nanga ala sani di a ben abi. Dan, te den ben seri den sani, dan den ben musu gi a kownu a moni di den ben kisi. Fa yu denki a srafu ben e firi di a sani disi pasa?—

A saka kindi na fesi a kownu èn a begi en: ’Grantangi, gi mi moro ten, èn mi o pai yu ala sani di mi musu pai yu.’ Efu yu ben de a kownu, dan san yu ben o du nanga a srafu?— A kownu ben abi sari-ati nanga a srafu fu en. Fu dati ede a kownu gi en pardon. A taigi a srafu taki a no ben abi fu pai en notinoti fu a moni baka, iya, a no ben abi fu pai nowan enkri fu den 60 milyun denari. A srafu ben musu fu breiti fu a sani dati!

Ma san a srafu du baka dati? A go na dorosei èn a si wan tra srafu di ben musu pai en wán hondro denari nomo. A grabu a srafu dati na en neki, a bigin tyokro en, èn a taigi en: ’Pai mi den wán hondro denari di yu musu pai mi!’ Yu kan bribi taki wan sma kan du so wan sani? Èn spesrutu baka di a kownu taigi en taki a no ben abi fu pai en a bigi moni moro.—

We, a tra srafu di ben abi wan paiman fu wán hondro denari nomo, ben de wan pôtiman. A no ben man pai a moni baka wantewante. Fu dati ede a fadon na den futu fu a srafu èn a begi en: ’Grantangi, gi mi moro ten, èn mi sa pai yu san mi musu pai yu.’ A man ben musu gi a srafu moro ten?— San yu ben o du?—

A man disi no ben abi switifasi, soleki fa a kownu ben abi dati. A ben wani en moni wantewante. Èn fu di a tra srafu no ben man pai a moni dati, dan a man meki sma poti en na strafu-oso. Tra srafu ben si ala san ben pasa, èn den no ben feni en bun. Den ben e firi sari gi a srafu di ben de na strafu-oso. Fu dati ede, den go taigi a kownu san ben pasa.

 A kownu no ben feni en bun tu san ben pasa. A atibron srefisrefi nanga a srafu di no ben gi a trawan pardon. Fu dati ede a kari en èn a taigi en: ’Yu takru srafu yu, mi no gi yu pardon so taki yu no ben abi fu pai mi a moni moro? Sobun, yu no ben musu gi a tra srafu pardon tu?’

A srafu di no ben wani gi a trawan pardon ben musu leri wan sani fu a bun kownu. Ma a no ben leri noti. Fu dati ede a kownu meki sma poti a srafu dati na strafu-oso, teleki a ben kan pai en den 60 milyun denari baka. Ma a no de fu taki, dati na strafu-oso a srafu disi noiti no ben o man wroko a moni, fu man pai a kownu baka. Sobun, a ben o tan drape teleki a dede.

Di Yesus kaba fruteri a tori disi, dan a taigi den bakaman fu en: „Na so mi Tata na hemel sa du tu nanga unu te unu no e gi un brada pardon nanga un heri ati.”​—Mateyus 18:21-35.

 Yu musu frustan taki ibriwan fu wi abi wan bigi paiman na Gado. Fu taki en leti, srefi a libi di wi abi na wan sani di Gado gi wi! Sobun, te wi e luku a paiman di wi abi na Gado, dan a paiman di tra sma abi na wi no bigi kwetikweti. A paiman di den abi na wi, de leki den wán hondro denari di a wan srafu ben musu pai a trawan. Ma a paiman di wi abi na Gado fu di wi e du sani di no bun, de leki den 60 milyun denari di a srafu ben musu pai a kownu.

Gado abi switifasi trutru. Aladi wi du sani di no bun, toku a e gi wi pardon. A no teki wi libi puru fu wi fu ala ten, soso fu strafu wi. Ma disi na a sani di wi musu hori na ede: Gado e gi wi pardon soso te wi e gi pardon na sma di e du ogri nanga wi. Dati na wan seryusu sani di wi musu hori na prakseri, a no so?—

Sobun, efu wan sma e du wan sani nanga yu di yu no lobi, èn te a sma dati e aksi pardon bakaten, dan san yu o du? Yu sa gi a sma dati pardon?— San yu o du te disi e pasa furu tron? Yu sa tan gi en pardon?—

Efu wi ben de a sma di e aksi wan trawan pardon, dan wi ben o wani taki a sma dati e gi wi pardon, a no so?— Fu dati ede wi musu du a srefi gi en. Wi no musu taki nomo taki wi e gi en pardon, ma wi musu gi en pardon trutru nanga wi heri ati. Te wi e du dati, dan wi e sori taki trutru wi wani de bakaman fu a Bigi Leriman.