Cibalo 14

Ncotweelede Kulekelela

SENA kuli muntu wakakubisizya kale?— Sena wakakucisizya moyo antela kukwaambila majwi mabi?— Sena ayebo weelede kumucitila zintu zibyaabi mbubwenya mbuli mbwaakacita awalo?—

Ikuti muntu umwi wacitila bantu bamwi cintu cibi, ibantu banji balajokezya kwiinda mukumucitila cintu cibi awalo. Pele Jesu wakatuyiisya kuti tweelede kubalekelela aabo ibatubisizya. (Matayo 6:12) Ino mbuti kuti muntu ooyo katucitila zintu zibi lyoonse? Ino tweelede kumulekelela kwaziindi zyongaye?—

Aayo ngamakani ngaakali kuyanda kuzyiba Petro. Aboobo bumwi buzuba wakabuzya Jesu ategwa: ‘Sena ndeelede kumulekelela kwaziindi mane zisika kuciloba?’ Pele ziindi zili ciloba nzisyoonto kapati. Jesu wakati: ‘Weelede kulekelela kwaziindi zili makumi aali ciloba aciloba’ naa 77 ikuti muntu wakubisizya kwaziindi zinji boobo.

Eezyo nziindi zinji kapati! Tatukonzyi kuziyeeya zibi nzyatucitila muntu kusikila kumweelwe ooyo, sena taali masimpe aayo? Kweelana aceeci, Jesu wakali kuyanda kutuyiisya ciiyo eeci cakuti: Tatweelede kubikkilila mweelwe wazibi nzyobatucitila bamwi. Ikuti batulomba kuti tubalekelele, tweelede kubalekelela.

Jesu wakali kuyanda kutondezya basikwiiya bakwe mbociyandika kapati ikulekelela bamwi. Aboobo naakazwaa kwiingula  mubuzyo wa Petro, wakaambila basikwiiya bakwe kaano. Sena ulayanda kukamvwa?—

Kwakali mwami umwi mubotu. Wakali aluse kapati. Mane wakali kunga ulabakweletesya mali bazike bakwe nobakali kuyandika lugwasyo. Pele kuli ciindi mwami naakali kuyanda kuti bazike bakwe boonse bamubbadale mali ngobakakweletede. Muzike umwi iwakakweletede mali aali tuulunzuma tuli 60 twamasheleni wakaletwa kumwami. Aayo mmali manji kapati!

Pele muzike ooyo wakalaabelesyede  mali aamwami oonse alimwi tanaakali kukonzya kwaabbadala pe. Aboobo, mwami wakalailila kuti muzike ooyo auzyigwe. Alimwi mwami wakati awalo mukaintu wamuzike, ibana bakwe alimwi azintu zyoonse nzyaakajisi zyuuzyigwe. Mpoonya imali aakali kuyoojanwa akeelede kuyoopegwa mwami. Ino uyeeya kuti muzike ooyo wakalimvwa buti?—

Wakafwugamina mwami akumukombelezya kuti: ‘Ndakomba buya, amundeengelele, kamucindipa ciindi, eelyo ndizoomuboozezya mali aanu oonse.’ Ikuti nowakali mwami ooyo, ino ncinzi ncowakali kunoocita kumuzike?— Imwami wakamufwida luse muzike wakwe aboobo wakamulekelela. Wakaambila muzike ooyo kuti tanaakeelede kuyoomuboozezya mali aali woonse, noliba kkobili lyomwe aamali aayo aakali tuulunzuma tuli 60. Elo kaka eeco cakamukkomanisya kapati muzike ooyo!

Pele, ino ncinzi muzike ooyo ncaakacita? Wakaunka kumuzike uumbi wakakweletede mali aali buyo mwaanda. Wakamunyuka-nyuka muzikenyina ooyo akutalika kumusina amoyo ulaamba: ‘Bbadala mali aali mwaanda ngookakweleta kulindime!’ Ino umuyeeyela buti muntu uucita cintu cili boobo, ikapati mbwaanga wakazwide aakulekelelwa mali manji ngaakakweletede kumwami?—

Imuzike wakakweletede mali aali buyo mwaanda wakali mucete. Kunyina naakali kukonzya kwaabbadala mali aayo ndilyonya pe. Aboobo wakafwugamina muzikenyina akumukombelezya kuti: ‘Kondeengelela, kocindipa ciindi, eelyo ndiyookuboozezya mali aako oonse ngondikweletede.’ Sena mwaalumi ooyo wakeelede kumupa ciindi muzikenyina?— Ino nowakacita buti nowakali nduwe?—

Imwaalumi ooyu tanaakajisi luse pe mbuli lwakajisi mwami. Wakayanda kuti apegwe mali aakwe ndilyonya eelyo. Alimwi akaambo kakuti muzikenyina tanaakali kukonzya kubbadala mali aayo, wakamubikka muntolongo. Ibazike bamwi bakazibona zyoonse eezyi zyakali kucitika eelyo tiibakazikkomanina pe. Bakamufwida luse muzike ooyo wakali muntolongo. Aboobo bakaunka kumwami akuyoomwaambila makani aaya.

 Awalo mwami wakabijilwa kapati kuli ceeco cakacitikide. Wakanyema kapati kujatikizya zyakacita muzike ooyo uutalekeleli. Eelyo wakamwiita akumwaambila kuti: ‘Yebo omuzike mubi, sena tiindakakulekelela mali ngookakweletede? Sena teewakeelede ayebo kumulekelela muzikenyoko?’

Imuzike uutalekeleli wakeelede kwiiya ciiyo kumwami mubotu. Pele kunyina naakacita oobo pe. Aboobo imwami wakabikka muzike ooyo muntolongo kusikila leelyo naakali kuyoowabbadala mali aayo oonse aali tuulunzuma tuli 60. Pele muntolongo kunyina naakali kunga wajana mali aakubbadala mwami. Aboobo wakali kunooli muntolongo kusikila leelyo naakali kuyoofwa.

Jesu naakamanizya kwaana kaano aaka, wakaambila basikumutobela kuti: “Mbubonya obo alakwe Taata uuli kujulu mbwazoomucitila nywebo kuti tamulekeleli nyoonse bakwanu camumyoyo yanu.”—Matayo 18:21-35.

Weelede kuteelela kuti toonse tulaacikwelete cipati kuli Leza. Mubwini,  ibuumi mbotujisi buzwa kuli Leza! Aboobo, eelyo notweezyanisya cikwelete ncotujisi kuli Leza, zikwelete zyoonse nzyobajisi bantu kulindiswe nzisyoonto kapati. Zikwelete nzyobajisi zili mbuli mali aali buyo mwaanda aayo muzike ngaakakweletede kumuzikenyina. Pele zikwelete nzyotujisi kuli Leza akaambo kazibi nzyotucita zili mbuli mali aali tuulunzuma tuli 60 ngaakakweletede muzike kumwami.

Leza ngusiluse kapati. Nokuba kuti twakacita zintu zibi, ulatulekelela. Kunyina natusubula kwiinda mukutunyonyoona kukabe kutamani. Pele lyoonse tweelede kunooyeeya ciiyo eeci citobela cakuti: Leza ulatulekelela lilikke notulekelela bamwi ibatubisizya. Eeci nciiyo ciyandika kapati, tee kayi?—

Aboobo, ino ncinzi ncoyoocita ikuti muntu umwi wakulubizyila amane waamba kuti kondilekelela? Sena uyoomulekelela?— Ino mbuti kuti wacita cintu eeco kwaziindi zili mbozibede? Sena neliba leelyo uyoomulekelela?—

Ikuti katuli ndiswe notulomba kulekelelwa, tee inga twayanda kuti muntu ngotwabisizya atulekelele, sena tabusyi oobo?— Aboobo aswebo tweelede kumulekelela. Tatweelede buyo kwaamba kuti twamulekelela, pele tweelede kumulekelela ncobeni kuzwa mumoyo. Notucita boobo, tutondezya kuti ncobeni tuyanda kuba basikutobela ba Mwiiyi Mupati.

Ikutegwa tuteelele mbociyandika kulekelela bamwi, atwaabale amagwalo aaya, Tusimpi 19:11; Matayo 6:14, 15; alimwi a Luka 17:3, 4.

[Cifwanikiso icili apeeji 77]

Ino ncinzi Petro ncaakali kuyanda kuzyiba kujatikizya kulekelela?

[Cifwanikiso icili apeeji 78]

Ino ncinzi cakacitika eelyo muzike naakakombelezya mwami kuti kacimupa ciindi cakwaabbadala mali?

[Zifwanikiso izili apeeji 78]

Mbuti muzike mbwaakamucita muzikenyina iwakakakilwa kumubbadala mali ngaakakweletede?

[Cifwanikiso icili apeeji 80]

Ino ncinzi mwami ncaakacitila muzike uutalekeleli?

[Cifwanikiso icili apeeji 81]

Ino ncinzi ncoyoocita ikuti muntu umwi wakulomba kuti umulekelele?