KASI walipo muntu uyo wali kukucitirapo cintu ciheni?— Kasi wakakutimba panji wakakunena?— Kasi nawe ukwenera kumuwezgera uheni uwo wakakucitira?—

Para yunji waŵacitira musinjiro, ŵantu ŵanandi ŵakutemwa kuwezgera uheni. Kweni Yesu wakasambizga kuti tikwenera kuŵagowokera awo ŵaticitira uheni. (Mateyu 6:12) Uli usange muntu munyake wakuticitira musinjiro nyengo na nyengo? Kasi tikwenera kumugowokera kalinga?—

Zgoro la fumbo ili ndilo Petros wakakhumbanga kulimanya. Anteura zuŵa linyake wakafumba Yesu kuti: ‘Kasi nkhwenera kumugowokera mupaka kankondi na kaŵiri?’ Ndipouli, kankondi na kaŵiri nkakukwanira yayi. Yesu wakamuzgora kuti: ‘Ukwenera kumugowokera nyengo zakukwana 77’ usange muntu wakubudira kanandi nteura.

Izo ni nyengo zinandi comene! Tingakumbukira na kumbukira wuwo yayi unandi wa maubudi panji vintu viheni ivyo munyithu wangaticitira, asi ntena? Iyi ndiyo fundo iyo Yesu wakatiphaliranga: Tireke kukumbukira unandi wa maubudi agho ŵanyithu ŵaticitira. Usange ŵatipempa kuti tiŵagowokere, tikwenera kuŵagowokera.

Yesu wakakhumbanga kuti ŵasambiri ŵake ŵamanye kuzirwa kwa kugowokerana. Pamanyuma pakuti  wazgora fumbo la Petros, wakaŵaphalira ntharika. Kasi ungatemwa kuti uyipulike?—

Kale comene kukaŵa themba ilo likaŵa liweme comene. Ilo likaŵa la lusungu comene. Likabwerekeskanga ndarama ku ŵateŵeti ŵake para ŵakaŵavya. Zuŵa likafika ilo themba likakhumbanga kuti ŵateŵeti ŵake ŵawezge ngongole zawo. Muteŵeti munyake wakiza kwa themba. Iye wakaŵa na ngongole kwa themba ya ndarama zakukwana mamiliyoni 60. Izi ni ndarama zinandi comene!

Kweni muteŵeti yura  wakagwiriskira ncito ndarama zose za themba, ndipo wakatondeka kuwezga ngongole kwa themba. Anteura themba likarangura kuti muteŵeti yura waguliskike. Themba likaranguraso kuti muwoli wa muteŵeti na ŵana ŵake, pamoza na katundu wake yose viguliskike. Pamanyuma pake ndarama zakufuma ku ivyo vikaguliskika zikeneranga kuperekeka kwa themba. Kasi ukughanaghana kuti muteŵeti yura wakajipulika wuli?—

Muteŵeti yura wakajikama pantazi za themba ndipo wakati: ‘Naŵeya, munisazgireko nyengo yakuti niwezgere ngongole yinu.’ Usange iwe uŵenge themba, kasi ntena ukacita wuli na muteŵeti yura?— Themba lira likamucitira lusungu muteŵeti yura. Ilo likamugowokera. Themba likaphalira muteŵeti yura kuti wareke kuwezga ngongole, enya ndarama zose zira zakukwana mamiliyoni 60. Nako nkukondwa uko muteŵeti yura wakaŵa nako!

Kasi muteŵeti yura wakacitaci? Wati wafuma para wakajikama, wakaruta kwa muteŵeti-munyake uyo wakaŵa na ngongole kwa iye ya ndarama zakukwana handiredi limoza. Wakakora pa singo pa muteŵeti-munyake na kumufyenya na kuyowoya kuti: ‘Nipa ndarama zane zakukwana handiredi limoza izo ukakongola’! Kasi ukughanaghana kuti muteŵeti uyu wakacita makora, comene-comene pakughanaghanira kuti themba likamugowokera ngongole yake?—

Muteŵeti-munyake uyo wakakongora ndarama kwa iye wakaŵa mukavu. Cikaŵa cakusuzga kuti wawezge ngongole kwa nyengo yeneyiyo. Anteura wakajikama pantazi pa muteŵeti-munyake na kuŵeyelera kuti: ‘Naŵeya, munisazgireko nyengo yakuti niwezgere ngongole yinu.’ Kasi muntu uyu wakeneranga kupereka nyengo yitari wuli yakuti muteŵeti-munyake wawezge ngongole?— Kasi iwe ntena ukacita wuli?—

Muntu uyu wakaŵa walusungu yayi, wakatondeka kurondezga themba lira likamugowokera. Muntu uyu wakakhumbanga ndarama zake pa nyengo yeneyiyo. Cifukwa cakuti muzga-munyake wakatondeka kuwezga ngongole, wakamuŵika mu jere. Ŵateŵeti ŵanji ŵakawona vyose ivyo vikacitika ndipo ŵakakondwa navyo yayi. Ŵateŵeti aŵa ŵakaŵa na citima cifukwa ca muteŵeti uyo wakaŵikika mu jere. Anteura ŵakaruta na kukaphalira themba ivyo vikacitika.

 Themba nalo likakondwa yayi na ivyo vikacitika. Likakwiya comene na muteŵeti uyo wakatondeka kugowokera munyake. Anteura likacema muteŵeti wankaza yura na kumuphalira kuti: ‘Muteŵeti muheni iwe, kasi nkakugowokera yayi ngongole iyo ukaŵa nayo kwa ine? Kasi iwe nawe ntena ukamugowokera yayi muteŵeti-munyako?’

Muteŵeti wankaza yura ntena wakatorapo sambiro pa ivyo themba liweme likamucitira. Kweni wakasambirapo kantu yayi. Pamanyuma pake themba likacema muteŵeti wankaza na kumuŵika mu jere mupaka pa nyengo iyo wakeneranga kumalizga kuwezga ngongole ya ndarama zakukwana mamiliyoni 60. Nadi pano, mu jere mura wakawezga yayi ngongole cifukwa kukaŵavya kwakusanga ndarama. Anteura wakeneranga kukhala mwenemura mupaka nyifwa yake.

Apo Yesu wakamalizga kuyowoya ntharika iyi, wakaphalira ŵarondezgi ŵake kuti: ‘Nteura Ŵadada ŵa kucanya ndimo ŵati ŵacitirenge na imwe, usange mukureka kugowokera muntu yose kufumira pasi pa mitima yinu.’—Mateyu 18:21-35.

 Umanye kuti, ise tose tiri na ngongole kwa Ciuta. Umoyo uwo tiri nawo ngwa Ciuta! Anteura, para tingaghanaghanira ngongole iyo tiri nayo kwa Ciuta, ŵantu ŵali na ngongole yicoko comene kwa ise. Iwo ŵali na ngongole kwa ise yakuyana na ndarama zakukwana handiredi limoza izo muteŵeti yura wakakongora kwa munyake. Kweni ngongole iyo tiri nayo kwa Ciuta ya mauheni agho tikucita, yikuyana waka na ndarama zakukwana mamiliyoni 60 izo muteŵeti wakakongora kwa themba.

Ciuta ngwalusungu comene. Nangauli tikucita vintu viheni, wakutigowokera. Iye kuti wakutipoka umoyo withu kuti uŵe nga ni malipiro gha maubudi agho tikumucitira yayi. Kweni pali sambiro ilo nyengo zose tikwenera kulikumbukiranga: Ciuta wangatigowokera pekha usange tikugowokera ŵantu awo ŵakutibudira. Ili ni sambiro lakuzirwa comene, asi ntena?—

Usange muntu wakucitira musinjiro kweni pamanyuma pake waphepiska, kasi ucitengeci? Kasi umugowokerenge?— Uli usange wakukubudira kwa nyengo zinandi? Kasi urutilirenge kumugowokera?—

Usange ise ndise muntu uyo wakupempa kugowokereka, mbwenu tingatemwa comene kuti muntu uyo tamubudira watigowokere, asi ntena?— Anteura tikwenera kumugowokera. Tingayowoyanga waka pa mlomo pera yayi kuti tamugowokera, kweni tikwenera kumugowokera kufumira pasi pa mtima withu. Para tingacita nteura, cirongorenge kuti tikukhumba nadi kuŵa ŵasambiri ŵa Msambizgi Waluso.