KAI fai aka eiloa ne se tino se mea ‵se ki a koe?— E mata, ne fakalogo‵mae atu io me ne fai atu ne ia se pati sē atafai ki a koe?— E mata, e ‵tau o penā foki au faifaiga ki a ia?—

Kafai e fakalogo‵mae ne se tino a latou, ka fakalogo‵mae atu foki a tino e tokouke ki te tino tenā. Kae ne akoako mai a Iesu me e ‵tau o fakamagalo ne tatou a tino kolā e ‵se mai ki a tatou. (Mataio 6:12) Kae e a māfai e se atafai mai se tino ki a tatou i taimi e uke? E ‵tau o fakamagalo fakafia ne tatou a ia?—

Tenā eiloa te mea ne manako a Petelu ke iloa ne ia. Tela la, i te aso e tasi ne fesili atu a ia ki a Iesu: ‘E a, e ‵tau o fakamagalo fakafitu ne au a ia?’ E se lava fua i te fakafitu taimi. Ne fai mai a Iesu: ‘E ‵tau o fakamagalo fakafitu sefulu fitu taimi’ māfai e agasala se tino ki a koe i taimi e uke.

E uke ‵ki eiloa a taimi e ‵tau ei o fai penā! Ka se masaua eiloa ne tatou a te uke o mea ‵se io me ko mea ma‵sei kolā ne fai ne se tino ki a tatou, ne? Kae tenā eiloa te mea ne fai mai ne Iesu: E se ‵tau o taumafai tatou ke masaua a te aofaki o mea ‵se e fai mai ne nisi tino ki a tatou. Kafai e akai mai latou ke fakamagalo aka latou, e ‵tau o fakamagalo ne tatou a latou.

Ne manako a Iesu ke fakaasi atu ki ana soko a te tāua malosi o te fakamagalo atu. Tela la, mai tua o te taliatuga o te fesili a  Petelu, ne fai atu ne ia se tala ki ana soko. E fia iloa ne koe?—

I te taimi e tasi, e isi se tupu telā ko oko eiloa i te ‵lei. Ko ia eiloa ko atafai. E tuku fakakaitalafu sāle atu ne ia a tupe ki ana pologa māfai ne ma‵nako latou ki ei. Kae i te aso e tasi, ne manako a te tupu ke toe ‵togi atu ne ana pologa a tupe kolā ne kaitalafu ne latou mai i a ia. Ia, ne aumai ki loto a te pologa e tasi telā ne kaitalafu ne ia mai te tupu e 10,000 tālā. Ko se faka‵tau eiloa i te uke o tupe konā!

 Kae ko oti ne fakaaoga ne te pologa a tupe katoa a te tupu kae ne seki mafai ne ia o toe ‵togi atu. Tela la, ne fakatonu atu te tupu ke fakatau atu tou tagata ki tua. Ne fai atu foki te tupu ke fakatau atu te avaga a te pologa mo ana tama‵liki mo ana mea katoa. Ko tupe kolā e maua mai i ei, e ‵tau o ‵togi atu ki te tupu. Se a tau faka‵tau ki lagonaga o te pologa?—

Ne totuli ifo a ia i mua o te tupu kae fakamolemole atu: ‘Fakamolemole, toe tuku mai aka se taimi tai leva, kae ka toe ‵togi atu ne au au mea katoa.’ Moi fai koe ko te tupu, ne a au mea ka fai ki te pologa?— Ne fanaka te loto alofa o te tupu ki te pologa. Tela la, ne fakamagalo ei ne te tupu a tou tagata. Ne fai atu a ia ki te pologa ke se toe ‵togi atu so se tupe, ke oko foki loa ki se vaega o te 10,000 tālā. Ne ‵tau eiloa o fiafia malosi a te pologa tenā!

Kae ne a ana mea ne fai mai tua ifo i ei? Ne fanatu a ia kae ne maua ne ia a te suā pologa, telā ne kaitalafu ne ia se selau tenali mai i a ia. Ne puke ne ia kae ‵kumi tena ua, kae fai atu: ‘‵Togi mai nei a te selau tālā ne kaitalafu ne koe i a au!’ E a, e mafai o fakaataata ne koe se tino telā e fai ne ia se mea penā, maise eiloa mai tua o te fakamagaloga ne te tupu o tena matugā kaitalafu lasi?—

Ia, ne mativa eiloa a te pologa telā ne kaitalafu ne ia a te selau tenali. Ne seki mafai ne ia o ‵togi fakavave atu a te tupe tenā. Tela la, ne fakasiga ifo a ia i mua o tena taina pologa kae fakamolemole atu: ‘Fakamolemole, toe tuku mai aka se taimi tai leva, kae ka toe ‵togi atu ne au taku kaitalafu.’ E mata, ne ‵tau o toe tuku atu ne te tagata se taimi tai leva ki tena taina pologa?— Ne a mea ka fai ne koe?

E seki fakaasi ne te tagata tenei a te atafai, e pelā mo te mea ne fai ne te tupu. Ne manako fakavave eiloa a ia ki ana tupe. Ona ko tena taina pologa e se mafai o ‵togi ne ia tena kaitalafu, ne ‵pei atu ne ia ki loto i te falepuipui. Ne lavea ne nisi taina pologa a te mea tenei ne tupu, kae ne seki fia‵fia latou ki ei. Ne a‵lofa latou ki te pologa i te falepuipui. Telā ne olo ei latou o fakailoa atu ki te tupu.

 Ne seki fiafia foki te tupu ki te mea tenā. Ne kaitaua malosi a ia ki te pologa sē loto fakamagalo. Telā ne kalaga atu tou tagata ki a ia kae fai atu: ‘A koe se pologa masei, e a, e seki fakamagalo ne au tau kaitalafu? E a, e seki ‵tau o fakamagalo foki ne koe tou taina pologa?’

Ne ‵tau eiloa o tauloto ne te pologa sē loto fakamagalo tenā se akoakoga tāua mai i te tupu ‵lei. Kae e seki fai eiloa a ia penā. Tela la, ko fai nei ne te tupu ke ‵pei atu a te pologa tenā ki loto i te falepuipui ke oko ki te taimi e ‵togi kātoa atu ei tena kaitalafu e 10,000 tālā. Kae ko te ‵tonuga loa, e se mafai ne ia o ‵togi atu a tupe a te tupu i te taimi e nofo atu ei a ia i te falepuipui. Tela la, ka nofo atu eiloa a ia i ei ke oko ki te taimi e mate ei a ia.

I te taimi ko fakaotioti ei te tala a Iesu, ne fai atu a ia ki ana soko: “E penā foki eiloa a mea ka fai ne toku Tamana i te lagi ki a koutou māfai e se fakamagalo ne koutou otou taina mo otou loto kātoa.”—Mataio 18:21-35.

E lavea ne koe, me e ‵nofo kaitalafu a tatou katoa i se auala lasi ki te  Atua. A te ‵tonuga loa, ne māfua mai eiloa i te Atua ‵tou ola! Tela la, kafai e fakatusa ki mea e ‵nofo kaitalafu ei tatou ki te Atua, e mu‵tana fua a mea e ‵nofo kaitalafu mai ei a nisi tino ki a tatou. A olotou kaitalafu e fai pelā mo te selau tenali telā ne kaitalafu ne te pologa e tokotasi mai i te suā pologa. Kae ko ‵tou kaitalafu ki te Atua ona ko mea ‵se e fai ne tatou e fai pelā mo te 10,000 tālā kolā ne kaitalafu ne te pologa mai i te tupu.

E atafai malosi mai te Atua. E tiga eiloa e fai ne tatou a mea ‵se, e fakamagalo ne ia tatou. E se fai ne ia tatou ke ‵togi atu mai i te ave keateaga o ‵tou ola ki te se-gata-mai. Kae tenei te akoakoga tāua ke masaua: E fakamagalo fua ne te Atua a tatou māfai e fakamagalo ne tatou a tino kolā e ‵se mai ki a tatou. E ‵tau o mafaufau faka‵lei ki te mea tenā, ne?—

Tela la, kafai e fai ne se tino se mea masei ki a koe kae ka oti ko fakatoese atu, ne a au mea ka fai? E mata, ka fakamagalo ne koe a ia?— Kae e a māfai ko fai ‵soko ne ia i taimi e uke? E mata, ka fakamagalo faeloa ne koe?—

Kafai ko tatou kolā e fakamolemole atu ke fakamagalo mai, e ma‵nako eiloa tatou ke fakamagalo tatou ne te suā tino, ne?— Tela la, e ‵tau foki o fai tatou penā ki a ia. E se ‵tau fua o fai atu me ko fakamagalo ne tatou a ia kae e ‵tau foki o fakamagalo ne tatou a ia mai i ‵tou loto. Kafai e fai ne tatou a te mea tenā, e fakaasi atu ei me e ma‵nako tonu eiloa tatou ke fai mo soko o te Faiakoga Sili.