MAY-ADA na ba nakahimo hin sayop ha imo?— Nasul-an ka ba niya o nagyakan hin maraot ha imo?— Sadang mo ba tratuhon hiya sugad han maraot nga pagtrato niya ha imo?—

Kon may-ada nakahimo hin sayop ha ira, damu nga mga tawo an magdadaot hiton nga tawo basi makabulos ha iya. Kondi hi Jesus nagtutdo nga sadang pasayloon naton adton nagbubuhat hin sayop ha aton. (Mateo 6:12) Ano man kon damu ka beses na nga gintrato kita hin maraot han usa nga tawo? Pira ka beses nga sadang pasayloon naton hiya?—

Ito an karuyag hibaroan ni Pedro. Salit usa ka adlaw nagpakiana hiya kan Jesus: ‘Pasasayloon ko ba hiya tubtob ha makapito?’ Diri igo an makapito. Hi Jesus nagsiring: ‘Magpapasaylo ka hin kapitoan-kag-pito ka beses’ kon an tawo makasala ha imo ha sugad kadamu ka beses.

Damu ito ka beses! Diri na ngani naton mahinunumdoman an sugad kadamu nga mga sayop o maraot nga ginbuhat ha aton han usa ka tawo, diri ba? Ngan ini an karuyag ipasabot ha aton ni Jesus: Diri naton sadang dumdumon an kadamu han mga sayop nga bangin ginbuhat han iba ha aton. Kon naghahangyo hira nga pasayloon, sadang pasayloon naton hira.

Karuyag ni Jesus nga ipakita ha iya mga disipulo kon mationan-o kaimportante an  pagin mapinasayloon. Salit katapos niya batunon an pakiana ni Pedro, iya ginsumatan an iya mga disipulo hin usa nga istorya. Karuyag mo ba mabatian ito?—

May-ada hadto usa ka maopay nga hadi. Buotan gud hiya. Nagpapautang pa ngani hiya hin kwarta ha iya mga uripon kon nagkikinahanglan hira hin bulig. Kondi inabot an adlaw nga karuyag han hadi nga bayaran na hiya han iya mga uripon nga nakautang ha iya hin kwarta. Ginpatawag an usa nga  uripon nga nakautang ha hadi hin 60 ka milyon nga kwarta. Damu ito nga kwarta!

Kondi nagasto na han uripon an ngatanan nga kwarta han hadi ngan diri na hiya makakabayad ha hadi. Salit nagsugo an hadi nga ibaligya an uripon. An hadi nagsugo liwat nga ibaligya an asawa han uripon ngan an iya mga anak ngan an ngatanan nga gintatag-iya han uripon. Katapos, an kwarta nga nakarawat tikang ha iginbaligya, ibabayad ha hadi. Ano ha hunahuna mo an inabat han uripon?—

Linuhod hiya ha atubangan han hadi ngan nakimalooy: ‘Alayon, angan-angana ako, ngan babayaran ko an ngatanan nga utang ko ha imo.’ Kon ikaw an hadi, ano daw la an imo bubuhaton ha uripon?— An hadi nalooy ha iya uripon. Salit ginpasaylo hiya han hadi. Siring niya ha uripon nga diri na kinahanglan bayaran han uripon an bisan pira han kwarta, bisan usa han 60 ka milyon nga kwarta. Sigurado nga nalipay gud hito an uripon!

Kondi ano an ginbuhat hiton nga uripon katapos hito? Ginawas hiya ngan nakita an usa pa nga uripon, nga nakautang ha iya hin usa la ka gatos nga kwarta. Iya ginkaptan ha liog inin igkasi-uripon ngan gintilo hiya, nasiring: ‘Bayari na an usa ka gatos nga kwarta nga utang mo ha akon!’ Mahuhunahuna mo ba an usa ka tawo nga nagbubuhat hin sugad hito, labi na katapos pasayloon hiya han hadi ha daku hinduro nga utang?—

Aw, kablas an uripon nga nakautang hin usa la ka gatos nga kwarta. Diri hiya makakabayad dayon han kwarta. Salit hinapa hiya ha tiilan han iya igkasi-uripon ngan nakimalooy: ‘Alayon, angan-angana ako, ngan babayaran ko an utang ko ha imo.’ Sadang ba angan-anganon han tawo an iya igkasi-uripon?— Kon ikaw, ano an imo bubuhaton?—

Ini nga tawo diri buotan, diri sugad han hadi nga buotan. Karuyag niya nga makuha dayon an iya kwarta. Ngan tungod kay an iya igkasi-uripon diri makakabayad hito, iya iginpapriso hiya. Nakita han iba nga mga uripon ini ngatanan nga nahitabo, ngan waray hira malipay hito. Nalooy hira  ha uripon nga ginpriso. Salit kinadto hira ha hadi ngan ginsumatan hiya mahitungod hito.

An hadi waray liwat malipay ha nahitabo. Nasina hiya hinduro ha diri mapinasayloon nga uripon. Salit iya gintawag hiya ngan nagsiring: ‘Ikaw nga maraot nga uripon, diri ba ginpasaylo ko an ngatanan nga utang mo ha akon? Diri ba sadang mo pasayloon an imo igkasi-uripon?’

An diri mapinasayloon nga uripon nahibaro unta hin leksyon tikang ha maopay nga hadi. Kondi waray hiya mahibaro han leksyon. Salit yana iginpapriso hiya han hadi tubtob nga mabayaran niya an 60 ka milyon nga kwarta. Ngan, siyempre, ha prisohan diri gud hiya makakaagi hin kwarta nga maibabayad ha hadi. Salit magpapabilin hiya didto tubtob nga hiya mamatay.

Han natapos hi Jesus ha pagsumat hini nga istorya, hiya nagsiring ha iya mga sumurunod: “Amo man ito an bubuhaton han akon langitnon nga Amay ha iyo, kon diri an tagsatagsa ha iyo magpasaylo ha iyo bugto tikang ha iyo mga kasingkasing.”​—Mateo 18:21-35.

 Maaram ka, damu hinduro an utang naton ngatanan ha Dios. An aton kinabuhi mismo nagtitikang ha Dios! Salit kon itanding ha aton utang ha Dios, gutiay la an utang han iba nga mga tawo ha aton. An ira utang ha aton pariho la han usa ka gatos nga kwarta nga inutang han usa nga uripon ha igkasi-uripon. Kondi an utang naton ha Dios tungod han mga sayop nga nabubuhat naton pariho han 60 ka milyon nga kwarta nga utang han uripon ha hadi.

Buotan gud an Dios. Bisan kon nagsasayop kita, ginpapasaylo kita niya. Diri niya kita pababayaron pinaagi han pagkuhaa han aton kinabuhi ha kadayonan. Kondi ini an leksyon nga kinahanglan hinumdoman naton: Pasasayloon la kita han Dios kon aton pasayloon an mga tawo nga nakakahimo hin sayop ha aton. Importante ito nga leksyon, diri ba?—

Salit kon may-ada nagbubuhat ha imo hin maraot kondi katapos nasiring nga nasusubo hiya, ano an imo bubuhaton? Pasasayloon mo ba hiya?— Ano man kon damu ka beses na nga nahitatabo ito? Pasasayloon mo pa ba gihapon hiya?—

Kon kita an tawo nga naghahangyo nga pasayloon, karuyag naton nga pasayloon kita niya, diri ba?— Salit sadang pasayloon liwat naton hiya. Diri la kita sadang sumiring nga ginpapasaylo naton hiya kondi sadang pasayloon gud naton hiya hin kinasingkasing. Kon buhaton naton ito, ipinapakita naton nga karuyag gud naton magin mga sumurunod han Bantogan nga Magturutdo.