¿YAAN wa baʼax kʼaas beetaʼantech?... ¿Tsʼoʼok wa u yaʼalaʼaltech wa baʼax beet u lúubul a wóol?... ¿Unaj wa a sutik u jeel?...

² Yaʼab máakeʼ ku sutik u jeel le baʼax kʼaas ku beetaʼaltiʼoʼ. Baʼaleʼ Jesuseʼ tu kaʼanseʼ unaj k-perdonar (Mateo 6:12). ¿Kux túun wa yaʼab u téenel ku beetaʼaltoʼon baʼax kʼaas tumen wa máax? ¿Jaytéen unaj k-perdonartik?...

³ Apóstol Pedroeʼ jach u kʼáat u yojéelte, le oʼolal juntéenjeakileʼ tu kʼáataj tiʼ Jesús: ‹¿Unaj wa in perdonar tak siete u téenel?›. Baʼaleʼ maʼ chúukaʼan chéen yéetel siete u téeneliʼ. Jesuseʼ tu yaʼalajtiʼ: ‹Unaj a perdonar tak setentisiete u téenel› wa ku kʼaʼabéettal.

⁴ Lelaʼ jach yaʼab u téenel. Wa ka beetaʼaktoʼon kʼaas le jaytéen tu yaʼaloʼ, maʼ kun láaj kʼaʼajaltoʼon, ¿máasaʼ? Leloʼ letiʼe baʼax u kʼáat Jesús ka naʼataʼakoʼ: maʼ unaj k-beetik u cuentail jaytéen ku beetaʼaltoʼon baʼax kʼaasiʼ. Wa ku kʼáataʼaltoʼon perdoneʼ, unaj k-perdonar.

⁵ Jesuseʼ u kʼáat kaʼach u yeʼes tiʼ u disipuloʼob jach kʼaʼanaʼan u perdonaroʼob.  Le oʼolaleʼ le ka tsʼoʼok u núukik le kʼáatchiʼ tiʼ Pedrooʼ, tu tsikbaltaj junpʼéel tsikbalil tiʼ. ¿A kʼáat wa a wuʼuye?...

⁶ Juntéenjeakileʼ anchaj juntúul rey jach uts, letiʼeʼ ku majáantik taakʼin tak tiʼ u palitsiloʼob. Baʼaleʼ junpʼéel kʼiineʼ kʼaʼabéetchaj le taakʼin tiʼoʼ, ka tu kʼáataj tiʼ le máaxoʼob majáantmiloʼ. Juntúul tiʼ letiʼobeʼ u pʼaxmaj sesenta millones, jach yaʼabkach taakʼin.

⁷ Baʼaleʼ le palitsiloʼ u láaj xupmaj le taakʼinoʼ,  le oʼolal maʼ tu páajtal u sutik. Le rey túunoʼ tu yaʼalaj ka koʼonok le palitsiloʼ, u yatan, u paalal yéetel tuláakal baʼaxoʼob yaantiʼ. Le taakʼin túun kun juntartbiloʼ yaan u meyaj utiaʼal u boʼotik u pʼaax tiʼ le reyoʼ. ¿Bix a tuklik tu yuʼubiluba le palitsiloʼ?...

⁸ Xolaj tu táan le reyoʼ, ka tu kʼáat óoltaj tiʼ: «Beet uts a páaʼtik wa jaypʼéel kʼiin, jeʼel in láaj boʼotiktecheʼ». Wa teech kaʼach le reyoʼ, ¿baʼax jeʼel a beetkeʼ?... Le reyoʼ tu chʼaʼaj óotsilil tiʼ le palitsiloʼ ka tu perdonartaj. Tu yaʼalajtiʼ maʼ u sutik mix junpʼíit tiʼ le sesenta millones u pʼaxmoʼ. Le palitsiloʼ jach kiʼimakchaj u yóol.

⁹ Baʼaleʼ ¿baʼax tu beetaj le palitsil ka tsʼoʼokoʼ? Ka jóokʼeʼ tu yilaj juntúul u yéet palitsilil pʼaxmil cien denarioʼob tiʼ. Tu cháacheʼ ka joʼopʼ u bitsʼik u kaal táan u yaʼaliktiʼ: «Boʼot tuláakal le bajux a pʼaxmajtenoʼ». A tuklikeʼ, ¿maʼalob wa le baʼax tu beetaj kex táant u perdonartaʼal tumen le reyoʼ?...

¹⁰ Le palitsil pʼaxmil le cien denarioʼoboʼ óotsil. Maʼ tu páajtal u sutik le taakʼin teʼ súutukiloʼ. Le oʼolal xolaj tu táaneʼ ka tu yaʼalajtiʼ: «Beet uts a páaʼtik wa jaypʼéel kʼiin, jeʼel in láaj boʼotiktecheʼ». ¿Unaj wa kaʼach u páaʼtik u boʼotaʼal?... Wa techeʼ, ¿baʼax jeʼel a beetik kaʼacheʼ?...

¹¹ Le máakoʼ kʼasaʼan, maʼ jeʼex le rey jach utsoʼ. U kʼáat kaʼach ka suʼutuk u taakʼin teʼ súutukoʼ. Baʼaleʼ tumen maʼ béeychaj u suʼutultiʼeʼ, tu beetaj u kʼaʼalal cárcel. U maasil palitsiloʼoboʼ maʼ maʼalob úuchik u yilkoʼob le baʼax tu beetoʼ. Tu chʼaʼajoʼob óotsilil tiʼ le palitsiloʼ, le oʼolal bin u yaʼaloʼob tiʼ le reyoʼ.

¹² Le reyoʼ maʼ maʼalob xan úuchik u yilkiʼ. Jach pʼuʼuj yéetel le palitsil maʼ tu perdonartaj u yéet palitsililoʼ, ka tu túuxtaj tʼanbileʼ, ka tu yaʼalajtiʼ: «Kʼasaʼan palitsil, teneʼ tin perdonartajtech  tuláakal a pʼaax le ka ta sen kʼáatajten ka in páaʼt a boʼotkoʼ. ¿Maʼ wa túun unaj kaʼach a chʼaʼik óotsilil tiʼ a wéet palitsil[il] jeʼex úuchik xan in chʼaʼiktech óotsililoʼ?».

¹³ Le kʼasaʼan palitsiloʼ unaj kaʼach u beetik jeʼex beetaʼabik tumen le reyoʼ. Baʼaleʼ maʼ bey tu beetiliʼ, le oʼolaleʼ tu yaʼalaj ka kʼaʼalak tak ken u sut le sesenta millones denarioʼob u pʼaxmoʼ. Le palitsilaʼ maʼ kun béeytal u náajaltik teʼ cárcel le bukaʼaj taakʼin unaj u sutik tiʼ le reyoʼ. Le oʼolaleʼ tiʼ kun kíimiliʼ.

¹⁴ Ka tsʼoʼok u tsikbaltik Jesús lelaʼ, tu yaʼalaj tiʼ u disipuloʼob: «Bey xan ken u beetteʼex in Taata yaan teʼ kaʼan wa maʼ tu síijil ta puksiʼikʼaleʼex a perdonartikeʼex a sukuʼuneʼexoʼ» (Mateo 18:21-35).

¹⁵ U jaajileʼ toʼoneʼ jach yaʼab k-pʼaax tiʼ Dios; tumen tak k-kuxtaleʼ letiʼ tsʼaamil. Le oʼolal jach mix baʼal tu tséel le  bukaʼaj ku pʼaxiktoʼon k-éet máakiloʼ. Le ku pʼaxiktoʼon k-éet máakiloʼ chéen bey jeʼex le cien denarioʼob pʼaʼax tiʼ le palitsileʼ. Baʼaleʼ tuláakal le baʼaloʼob maʼ maʼalob k-beetik tu táan Diosoʼ, bey jeʼex le sesenta millones denarioʼob tu pʼaxaj le palitsil tiʼ le reyoʼ.

¹⁶ Dioseʼ jach uts. Kex tsʼoʼok k-beetik baʼaloʼob maʼ maʼalobtakeʼ, ku perdonartikoʼon. Maʼatech u luʼsik k-kuxtal utiaʼal k-boʼotik k-kʼeban. Baʼaleʼ unaj u kʼaʼajaltoʼon: Chéen jeʼel u perdonartikoʼon Dios wa k-perdonartik le máaxoʼob beetiktoʼon baʼax kʼaasoʼ. ¿Máasaʼ maʼalob ka tuukulnakoʼon tiʼ lelaʼ?...

¹⁷ Le oʼolal wa ku beetaʼaltech kʼaas tumen wa máax, tsʼoʼoleʼ ku kʼáatiktech ka a perdonarteʼ, ¿baʼax ken a beete? ¿Yaan wa a perdonartik?... ¿Kux túun wa ku beetik yaʼab u téenel? ¿Yaan wa u seguer a perdonartik?...

¹⁸ Wa toʼon kʼáatik perdoneʼ, ¿máasaʼ k-kʼáat ka perdonartaʼakoʼon?... Le oʼolal toʼoneʼ unaj k-beetik xan beyoʼ. Maʼ chéen unaj k-aʼalik k-perdonartik wa máaxiʼ, baʼaxeʼ unaj k-beetik tu jaajil k-óol. Beyoʼ yaan k-eʼesik k-kʼáat k-beet jeʼex úuchik u beetik Jesús, le Maʼalob j-Kaʼansajoʼ.