CAPÍTULO 14
Xiñee naquiiñeʼ guni perdonarnu
ÑEE huayuu ora gúnicabe lii xiixa ni malu la?... Huayuninácabe lii o huayábicabe lii xiixa ni qué chulaʼdxuʼ la?... Ñee naquiiñeʼ gúniluʼ laacabe cásica rúnicabe lii la?...
Stale binni ora gúnicabe laa xiixa la? ruquíxeni laacabe. Peru Jesús bisiidiʼ laanu naquiiñeʼ guni perdonarnu (Mateo 6:12). Xi gácaxa pa gucheené binni ca laanu stale tiru yaʼ. Panda biaje naquiiñeʼ guni perdonarnu laabe yaʼ....
Apóstol Pedru gucalaʼdxiʼ ñanna panda tiru, ngue runi ti dxi gunabadiidxabe Jesús: Ñee napaʼ xidé guneʼ perdonar dede gadxe tiru la? Peru, huaxieʼruʼ nga gadxe. Jesús bicabi laabe: Napuʼ xi guni perdonarluʼ dede setenta y siete tiru pa naquiiñepeʼ.
Xi gucalaʼdxiʼ Pedru ñanna de perdón.
Nabé stálepeʼ nga. Pa tuuxa nucheené laanu stale biaje la? qué ñanda diʼ ñetenaláʼdxinu guiráʼ ni, njaʼ. Nga nga ni cusiidiʼ Jesús laanu: cadi naquiiñeʼ diʼ ugábanu guiráʼ ni gúnicabe laanu. Pa guinábacabe perdón laanu la? naquiiñeʼ guni perdonarnu.
Ni racalaʼdxiʼ Jesús guluíʼ ca discípulo stiʼ nga gúʼyacabe pabiáʼ nga risaca guni perdonárcabe. Ngue runi bicábisibe ni gunabadiidxaʼ Pedru que la? guníʼnebe laacaʼ ti historia. Riuláʼdxiluʼ gunadiágaluʼ ni la?...
Dxiqué la? guyuu ti rey guizáʼ nachaʼhuiʼ, dede rutiiñebe bueltu ca esclavu stibe ora caquiiñecaʼ. Peru ti dxi guyuube niguíxecaʼ bueltu ni nuzaabicaʼ laabe que ne biseendacaabe ca esclavu stibe. Tobi de laacabe nuzaabiʼ laabe stálepeʼ bueltu, sesenta millón de moneda.
Xi guca ora gunabaʼ esclavu que rey que gudii laabe xcaadxi dxi para quíxebe ni nuzaabibe laa yaʼ.
Peru esclavu que biquiiñeʼ guirani ne qué gapa ni quixené laabe. Ngue runi rey que biʼniʼ mandar guidoo esclavu que, xheelabe, ca xiiñibe ne guiráʼ ni nápabe. Ne zaqué bueltu ni guidoocabe que guiaxa rey que. Ximodo raʼbuʼ biʼniʼ sentir esclavu que yaʼ....
Bizuxíbibe xañee rey que ne gunábabe laa: Señor, biá naa, guleza naa caadxi dxi ti quixeʼ guiráʼ ni nuzaabeʼ lii. Xi ñúniluʼ pa lii ñácaluʼ rey que yaʼ.... Rey que biá esclavu que ne biʼniʼ perdonar laabe. Ne gúdxibe laa cadi quixe diʼ gastiʼ, nin ti moneda de ca sesenta millón ni nuzaabibe laa que. Guizáʼ biecheʼ esclavu que.
Peru, xi biʼniʼ esclavu que despué yaʼ. Bireesibe de raqué la? bidxaagabe sti esclavu ni nuzaabiʼ laabe ti gayuaa moneda si. Gudápibe laa ne gudiebe yanni, ne rábibe laa: ¡Gudixe naa yánnaca ti gayuaa moneda ni nuzaabuʼ naa que! Ñee raʼbuʼ bíʼnibe nga despué de biʼniʼ perdonar rey que laabe ni nuzaabibe laa que la?...
Xi biʼniʼ esclavu que xcompañeru ni qué ñanda niguixe laabe que yaʼ.
Esclavu ni nuzaabiʼ laabe ti gayuaa moneda que pobre laa. Qué zanda diʼ quíxebe bueltu que oraqueca. Ngue runi, biábabe xañee xcompañérube ne gúdxibe laa: Biá naa, guleza naa xcaadxi dxi ti quixeʼ lii guiráʼ ni nuzaabeʼ lii. Ñee naquiiñeʼ gudii esclavu riʼ xcaadxi dxi xcompañeru la?... Xi ñúniluʼ yaʼ....
Hombre que cadi nachaʼhuiʼ diʼ cásica guca rey que. Guyuube ñaxa xpuéltube oraqueca. Ne cumu xcompañérube qué ñanda niguíxeni la? bitaguyoobe laa. Xtuudxi esclavu ni biiyacaʼ ni guca que la? qué ñuláʼdxidicaʼ modo bíʼnibe. Biácabe esclavu ni daguyoo que, ne yetídxicabe rey que xi guca.
Rey que laaca qué ñulaʼdxiʼ diʼ ni. Guizáʼ bidxiichinebe esclavu ni qué niná ñuni perdonar xcompañeru que, para bisendacaabe laa ne rábibe laa: Esclavu malu, cadi bineʼ perdonar lii ni nuzaabiluʼ naa que la? Xiñee qué ñaluʼ xcompañéruluʼ pue.
Xi biʼniʼ rey que ne esclavu ni qué ñuni perdonar que.
Esclavu malu que naquiiñeʼ niziidibe ñúnibe casi biʼniʼ rey chaʼhuiʼ que laabe. Peru qué ñúnidibe ni, ngue runi rey que biʼniʼ mandar gutaguyoocabe laabe dede quíxebe laa ca sesenta millón de moneda ni nuzaabibe laa que. Yanna, cumu daguyoobe la? qué zanda diʼ guni ganarbe bueltu para quíxebe rey que. Raqué ziaanabe dede gátibe.
Biluxe guníʼ si Jesús historia que gúdxibe cani zinanda laabe: «Zacaca zuni Bixhoze ni nuu ibáʼ laatu pa qué guni perdonar tu ca hermanu stitu ni uchee né laatu, de idubi ladxidóʼ to» (Mateo 18:21-35).
Ya, dxandíʼ nga guiranu nuzáʼbinu Dios stálepeʼ; casi xquendanabáninu. Nga runi, pa guchaaganu biaʼ nuzáʼbinu laabe ne cani nuzaabiʼ binni laanu la? huaxiéʼ nga nuzaabicabe laanu. Zeeda gácani casi ti gayuaa moneda ni bizaabiʼ esclavu que xcompañeru. Peru ni nuzáʼbinu Dios pur ca cosa malu ni rúninu ca zeeda gácani casi sesenta millón de moneda ni bizaabiʼ esclavu que rey que.
Dios guizáʼ nachaʼhuiʼ. Neca maʼ huacheʼnu la? laabe runi perdonarbe laanu. Qué rucaadibe laanu quíxenu ne xquendanabáninu ni nuzáʼbinu laabe. Peru naquiiñeʼ guietenaláʼdxinu ndiʼ: Dios zuni perdonar laanu ora si guni perdonarnu binni ni gucheené laanu. Cadi naquiiñeʼ guiníʼ íquenu ndiʼ la?...
Xi guʼnuʼ pa tuuxa guinabaʼ lii guni perdonarluʼ laa yaʼ.
Yanna, pa tuuxa gucheené lii, ne despué gábibe lii cadi nuube galán pur ni bíʼnibe que, xi gúniluʼ yaʼ. Zuni perdonarluʼ laabe la?... Xi gácaxa pa gúnibe ni lii stale biaje yaʼ. Zuni perdonarluʼ laabe guiráʼ biaje ca la?...
Pa ñácanu binni ni canabaʼ perdón ca, ñuláʼdxinu ñuni perdonárcabe laanu, njaʼ.... Nga runi naquiiñeʼ gúninu zaqueca. Cadi naquiiñeʼ guinísinu zuni perdonarnu, sínuque guni perdonarnu de guidubi ladxidoʼno. Zacá la? zusihuínninu dxandíʼ racaláʼdxinu gúninu casi biʼniʼ Maestru Ni Jma Nanna Gusiidiʼ que.
Para guiénenu pabiáʼ ndiʼ risaca guni perdonarnu la? laaca galán gúʼndanu ni cá ndaaniʼ Proverbios 19:11; Mateo 6:14, 15, ne Lucas 17:3, 4.
Laaca zándaca ziuuláʼdxiluʼ ca ndiʼ
JESÚS: NEZA, NI DXANDÍʼ NE GUENDANABANI
Bisiidiʼ Jesús guni perdonarnu
Biʼniʼ perdonar Jesús ca pecadu stiʼ ti gunaa ni zándaca naca prostituta. ¿Ñee caniʼbe gastiʼ naca gucheené binni Ley stiʼ Dios la?
JESÚS: NEZA, NI DXANDÍʼ NE GUENDANABANI
Risaca nga guni perdonarnu
Biquiiñeʼ Jesús ejemplu stiʼ esclavu ni qué ñá xcompañeru que para gusihuinni pabiáʼ risaca para Dios guni perdonarnu binni.
