KAPU 16

Inki Kima Kele Mpenza Mfunu?

KUVANDAKA ti muntu mosi kwisaka kutala Yezu kilumbu mosi. Yandi zabaka nde Yezu kuvandaka mayele mpenza, ebuna yandi tubilaka yandi nde: ‘Longi, tubila mbuta na munu nde yandi pesa munu ndambu ya bima ya yandi kele na yo.’ Muntu yina kuyindulaka nde yandi fwe baka ndambu ya bima ya mbuta na yandi.

Kana nge vandaka Yezu, inki nge zolaka kutuba?— Yezu kubakisaka nde muntu yina kuvandaka ti dikambu. Kansi dikambu na yandi kuvandaka ve nde yandi vandaka mpenza na mfunu ya bima yina mbuta na yandi kuvandaka na yo. Dikambu ya muntu yina kuvandaka nde yandi zabaka ve mambu yina kuvandaka mpenza mfunu na luzingu.

Beto yindula fyoti dyambu yai. Inki kima fwe luta mfunu na meso na beto? Kuvanda ti bima ya kusekinina ya kitoko, bilele ya mpa, to bima yankaka?— Ve, ke ti kima mosi meluta mfunu mingi mpenza. Mpi yo yai dilongi ya Yezu zolaka kulonga. Ebuna yandi taka disolo ya muntu mosi yina kuvilanaka Nzambi. Keti nge kezola kuwa yo?—

Muntu yango kuvandaka mvwama mpenza. Yandi vandaka ti bilanga mpi banzo ya nene ya kubumbila bima. Bimenina ya yandi kunaka kuyelaka mbote mpenza. Yandi vandaka ve na kisika ya kutula bima yina yonso na banzo na yandi yina yandi vandaka kubumbila bima ya yandi vandaka kukatula na bilanga. Ebuna, inki yandi zolaka kusala? Yandi tubaka na ntima na yandi nde: ‘Mono kefwa banzo na munu ya mu kebumbilaka bima, mu ketunga banzo ya kuluta nene. Ebuna mu tabumba bimenina na munu yonso ti bima na mono yonso ya kitoko na banzo yina ya mpa.’

 Mvwama yina kuyindulaka nde yo vandaka kima mosi ya mayele ya yandi fwe sala. Yandi yindulaka nde yandi vandaka na mayele mpenza na kubumba bima mingi. Yandi tubaka na ntima na yandi nde: ‘Mu ke na bima mingi ya kitoko ya mu mebumba. Yo tasadisa munu bamvula mingi. Ebuna ntangu yai, mu le pema. Mu tadya, mu tanwa, mpi mu tasala feti.’ Kansi bangindu ya mvwama yai kuvandaka ti kima mosi ya mbi. Keti nge mezaba kima yango?— Yandi vandaka kudiyindula kaka yandi mosi ti kyese na yandi. Yandi vilanaka Nzambi.

Yo yina Nzambi kusongaka mvwama yina nde: ‘Nge zoba yai. Nge tafwa na mpimpa yai. Ebuna, bima yai yonso ya nge me bumba, yo tavanda ya nani?’ Keti mvwama yina zolaka kusadila bima yina na nima ya lufwa na yandi?— Ve, muntu yankaka zolaka kubaka yo. Yezu kutubaka nde: ‘Yo ke mpidina na konso muntu yina kebumbaka kimvwama sambu na yandi mosi, kansi yandi ke mvwama ve na meso ya Nzambi.’—Luka 12:13-21.

Nge kezola ve kuvanda bonso mvwama yina, luvunu?— Lukanu na yandi ya ntete na luzingu kuvandaka ya kuzwa bima mingi ya kinsuni. Kifu ya yandi salaka kuvandaka yo yina. Yandi vandaka ntangu yonso ti nzala ya  kuvanda ti bima mingi. Kansi yandi vandaka ve ‘mvwama na meso ya Nzambi.’

Bantu mingi ke bonso mvwama yina. Bo kezolaka kuvanda ntangu yonso ti bima mingi. Kansi kikalulu yai le nata bampasi mingi. Mu mbandu, keti nge ke ti bima ya kusekinina?— Inki bima ya kusekinina nge ke na yo? Songa munu.— Inki nge tasala kana nduku na nge mosi ke ti balo to kiteki ya kusekinina to kima yankaka ya kusekinina yina nge kele na yo ve? Keti yo tavanda mbote nge sosa nde bibuti na nge kusumbila nge yo?—

Bima ya kusekinina le vanda mfunu mpenza bantangu yankaka. Kansi nki tasala nde yo vanda dyaka ve mfunu na nima ya mwa ntangu?— Yo tanuna. Yo le beba, ebuna mpusa na yo mpi kumana nge. Ya kyeleka, nge ke ti kima mosi ya ke na valere mingi mpenza kuluta bima ya kusekinina. Keti nge mezaba kima yango?—

Kima yango ke luzingu na nge. Luzingu na nge ke mfunu mpenza sambu, kana yo kele ve, nge le sala ve ata kima mosi. Kansi kima kesimbaka luzingu na nge kele kusala mambu ya kepesaka Nzambi kyese, mpidina ve?— Yo yina, beto vanda ve bonso mvwama ya zoba yina kuvilanaka Nzambi.

 Bana mpamba ve le sala mambu ya buzoba bonso mvwama yina. Bambuta mingi mpi kesalaka mutindu yina. Mingi na kati na bo kezolaka kuzwa ntangu yonso bima mingi kuluta yina ya bo ke na yo. Bo le vanda ti madya ya kudya konso kilumbu, bilele ya kulwata, mpi kisika ya kuzinga. Kansi bo kezolaka bima mingi kuluta. Bo kezolaka kuvanda ti bilele mingi dyaka. Mpi bo kezolaka kuvanda ti banzo ya nene-nene. Bima yai yonso kelombaka mbongo mingi. Yo yina bo kesalaka bisalu mingi sambu na kuzwa mbongo mingi. Ebuna ntangu bo kezwaka mbongo mingi, mpusa ya kuzwa yo dyaka mingi keyelaka kaka.

Bambuta mingi kekudipesaka kibeni na kusala bisalu sambu na kusosa mbongo mingi na mpila nde bo kevandaka dyaka ve ti ntangu ya kuvanda ti dibuta na bo. Mpi bo kevandaka dyaka ve ti ntangu sambu na Nzambi. Keti mbongo na bo le gulusa bo?— Ve, ata fyoti ve. Keti bo le sadila mbongo na bo na nima ya lufwa na bo?— Ve. Sambu bantu ya kufwa le sala ve ata kima mosi.—Longi 9:5, 10.

Keti yo ketendula nde yo ke mbi na kuvanda na mbongo?— Ve. Mbongo le sadisa beto na kusumba madya mpi bilele. Biblia ketuba nde yo ketaninaka. (Longi 7:12) Kansi kana beto kezolaka mbongo, beto takudisosila makambu. Beto tavanda bonso mvwama ya zoba yina kubumbaka bimvwama sambu na yandi mosi kansi yandi vandaka ve mvwama na meso ya Nzambi.

Kuvanda mvwama na meso ya Nzambi ketendula inki?— Yo ketendula kutula Nzambi na kisika ya ntete na luzingu na beto. Bantu mingi ketubaka nde bo kekwikilaka na Nzambi. Bo keyindulaka nde lukwikilu yo mosi mpamba mefwana. Kansi, keti bo ke mpenza bamvwama na meso ya Nzambi?— Ve, bo ke bonso mvwama yina kuvilanaka Nzambi.

Yezu kuvilanaka ve ata fyoti Tata na yandi ya zulu. Yandi sosaka ve kuzwa mbongo mingi. Mpi yandi vandaka ve ti bima mingi ya kinsuni. Yezu kuzabaka kima yina kuvandaka mpenza mfunu na luzingu. Keti nge mezaba kima yango?— Kima yango kele kuvanda mvwama na meso ya Nzambi.

Tela munu, inki mutindu beto le vanda bamvwama na meso ya Nzambi?— Beto le vanda bamvwama na meso ya Nzambi kana beto kesala mambu yina kepesaka yandi kyese. Yezu kutubaka nde: ‘Ntangu yonso  mu ke salaka mambu yina ke pesaka yandi kyese.’ (Yoane 8:29) Nzambi kevandaka na kyese na ntangu beto kesalaka mambu yina yandi kezolaka nde beto sala. Ntangu yai, songa munu, inki mambu nge le sala sambu na kupesa Nzambi kyese?— Mambu ya nge le sala yo yai: Kutanga Biblia, kukwenda na balukutakanu ya Bukristu, kusamba Nzambi, mpi kusadisa bankaka na kulonguka mambu na yandi. Bima yai ke mpenza bima ya kuluta mfunu na luzingu.

Sambu Yezu vandaka mvwama na meso ya Nzambi, Yehowa kutaninaka yandi. Yandi pesaka Yezu dikabu ya kuzinga kimakulu. Kana beto ke bonso Yezu, Yehowa tazola beto, yandi tatanina beto mpi. Yo yina, beto vanda bonso Yezu mpi beto vanda ve ata fyoti bonso mvwama yina kuvilanaka Nzambi.

Tala mwa baverse ya Biblia ya kesonga mutindu ya kuvanda ti mabanza ya mbote na bima ya kinsuni: Bingana 23:4; 28:20; 1 Timoteo 6:6-10; mpi Baebreo 13:5.

[Kifwanisu ya kele na lutiti 87]

Inki dikambu muntu yai kuvandaka na yo?

[Kifwanisu ya kele na lutiti 88]

Inki mambu mvwama yai ke na kuyindula?

[Kifwanisu ya kele na lutiti 89]

Inki kima ya mfunu mingi nge kele na yo yina meluta bima ya kusekinina?

[Bifwanisu ya kele na lutiti 91]

Inki mambu ya mfunu mingi mpenza mwana yai ke na kusala?