MŨTHENYA ũmwe harĩ mũndũ wathiire harĩ Jesu tondũ nĩ aamenyaga atĩ Jesu nĩ mũndũ mũũgĩ mũno. Akĩmwĩra atĩrĩ: ‘Mũrutani, ĩra mũrũ wa maitũ angaĩre indo iria arĩ nacio.’ Mũndũ ũcio eeciragia atĩ nĩ aabataraga gũkorũo na indo icio.

Korũo nĩ wee warĩ Jesu-rĩ, ũngĩoigire atĩa?— Jesu nĩ aamenyire thĩna wa mũndũ ũcio. Thĩna wake ndwarĩ kwenda indo cia mũrũ wa nyina. No warĩ kwaga kũmenya ũndũ ũrĩa wa bata makĩria ũtũũro-inĩ.

Ta reke twĩcirie kaũndũ gaka. Nĩ ũndũ ũrĩkũ twagĩrĩirũo kuona ũrĩ wa bata makĩria? Hihi nĩ kũgĩa na tũindo twega twa gũthaaka, nguo njerũ, kana tũindo tũngĩ?— Aca, nĩ harĩ ũndũ wa bata makĩria. Ũndũ ũcio nĩguo Jesu eendaga kũrutana. Kwoguo akĩheana karũgano ka mũndũ ũmwe wariganĩirũo nĩ Ngai. Hihi no wende gũkaigua?—

Mũndũ ũcio aarĩ mũtongu mũno. Aarĩ na mũgũnda na makũmbĩ. Irio iria aahandĩte igĩkũra wega mũno. No makũmbĩ make matingĩaiganĩire irio iria aagethaga. Kwoguo eekire atĩa? Oigire ũũ: ‘Ngũtharia makũmbĩ makwa njake mangĩ manene makĩria. Njoke njige irio ciakwa na indo ciakwa ciothe iria njega makũmbĩ-inĩ macio.’

Mũndũ ũcio eeciririe atĩ warĩ ũndũ wa ũũgĩ gwĩka ũguo. Eyonaga arĩ mũũgĩ mũno nĩ ũndũ wa kwĩigĩra indo nyingĩ. Eeĩraga ũũ: ‘Ndĩ na indo nyingĩ njega ndĩigĩire. Na no  ndĩcihũthĩre mĩaka mĩingĩ. Kwoguo ngũhurũka, ndĩe na nyue, na ndĩkenie.’ No ũndũ ũcio eciragia warĩ na thĩna ũmwe. Wee nĩ ũĩ thĩna ũcio warĩ ũrĩkũ?— Eeciragia o ũhoro wake mwene, na ũrĩa angĩĩkenia. Akĩriganĩrũo nĩ Ngai.

Nĩ ũndũ ũcio, Ngai akĩarĩria mũndũ ũcio warĩ mũtongu. Akĩmwĩra atĩrĩ: ‘Wee mũndũ ũyũ mũkĩgu, ũtukũ wa ũmũthĩ nĩ ũgũkua. Rĩu indo iria wĩigĩire igũtuĩka cia ũ?’ Hihi mũndũ ũcio akua nĩ angĩahotire kũhũthĩra indo icio?— Aca. Ingiatuĩkire cia andũ angĩ. Jesu aarĩkĩrĩirie ũũ: ‘Ũguo noguo gũthiaga harĩ mũndũ ũrĩa wĩigagĩra indo nyingĩ, no ti mũtongu maitho-inĩ ma Ngai.’—Luka 12:13-21.

Hihi wee no wende kũhaana ta mũndũ ũcio warĩ mũtongu?— Muoroto wake warĩ o kũgĩa na indo nyingĩ cia gũkũ thĩ. Rĩu rĩarĩ ihĩtia inene. Eendaga o kuongerera indo nyingĩ makĩria. No ndaarĩ “mũtongu maitho-inĩ ma Ngai.”

 Andũ aingĩ mahaana ta mũndũ ũcio. Meendaga o kũgĩa na indo nyingĩ makĩria. No ũndũ ũcio no ũmarehere mathĩna manene. Kwa ngerekano-rĩ, nĩ njũĩ nĩ ũrĩ tũindo twa gũthaaka, gĩthĩ tiguo?— Ta njĩra nĩ tũindo tũrĩkũ ũkoragwo natuo?— Ĩ mũrata waku angĩkorũo na mũbira kana dori kana tũindo tũngĩ twa gũthaaka ũtakoragwo natuo? Hihi nĩ wega kũringĩrĩria aciari aku makũgũrĩre?—

Harĩ hĩndĩ ũngĩona kanyamũ ga gũthaaka ta karĩ ka bata mũno. No thutha-inĩ gacokaga gageka atĩa?— Gacokaga gagakũra. No gathũke, nginya ũkamene. No nĩ harĩ kĩndũ ũkoragwo nakĩo kĩa bata gũkĩra tũindo tũu. Wee nĩ ũĩ nĩ kĩĩ kĩu?—

Kĩndũ kĩu nĩ muoyo waku. Muoyo waku nĩ wa bata mũno tondũ ũtarĩ naguo, ndũrĩ ũndũ ũngĩhota gwĩka. No nĩguo ũthiĩ na mbere gũtũũra muoyo, no mũhaka wĩke ũrĩa Ngai endaga, gĩthĩ tiguo?— Kwoguo tũtiagĩrĩirũo kũhaana ta mũndũ ũcio mũkĩgu wariganĩirũo nĩ Ngai.

Ciana to cio ciĩkaga maũndũ ma ũrimũ ta mũndũ ũcio warĩ mũtongu. O na andũ amwe agima nĩ meekaga maũndũ ma ũrimũ. Andũ  amwe mendaga kũgĩa na indo nyingĩ makĩria ma iria marĩ nacio. No makorũo na irio cia kũrĩa, nguo cia kwĩhumba, na nginya handũ ha gũikara. No makaaga kũiganĩra. Meendaga kũgĩa na nguo nyingĩ na nyũmba nenanene. No nĩguo mũndũ agĩe na indo icio nĩ abataraga mbeca. Kwoguo andũ acio marutaga wĩra mũingĩ mũno magĩcaria mbeca nyingĩ. Na o ũrĩa maragĩa mbeca nyingĩ, noguo meriragĩria kũgĩa na nyingĩ makĩria.

Andũ amwe makoragwo na mĩhang’o mĩingĩ mũno ya gũcaria mbeca nginya makaaga ihinda rĩa gũkorũo hamwe na famĩlĩ ciao. O na makaaga ihinda rĩa gwĩciria ũhoro wa Ngai. Hihi mbeca ciao no imahotithie gũtũũra muoyo?— Aca, itingĩhota. Hihi mangĩkua no mahote kũhũthĩra mbeca icio?— Aca. Matingĩhota gũcihũthĩra tondũ andũ arĩa makuĩte hatirĩ ũndũ mangĩhota gwĩka.—Kohelethu 9:5, 10.

Hihi ũguo nĩ kuuga atĩ nĩ ũũru gũkorũo na mbeca?— Aca. Mbeca nĩ itũhotithagia kũgũra irio na nguo. Bibilia yugaga atĩ mbeca nĩ ũgitĩri. (Kohelethu 7:12) No tũngĩenda mbeca mũno, no twĩrehere mathĩna. Tũngĩhaana ta mũndũ ũcio mũtongu weigĩire indo nyingĩ no ndaarĩ mũtongu maitho-inĩ ma Ngai.

Hihi gũkorũo tũrĩ atongu maitho-inĩ ma Ngai nĩ kuuga atĩa?— Nĩ kuuga tũigage Ngai mbere ũtũũro-inĩ witũ. Andũ amwe nĩ moigaga atĩ nĩ metĩkĩtie Ngai. Meciragia atĩ gwĩtĩkia Ngai gwiki nĩ kũiganu. No hihi ũguo nĩ kuuga atĩ nĩ atongu maitho-inĩ ma Ngai?— Aca, mahaana o ta mũndũ ũcio mũtongu wariganĩirũo nĩ Ngai.

Hatirĩ hĩndĩ Jesu aariganĩirũo nĩ Ithe ũrĩa ũrĩ igũrũ. Ndaarĩ na mĩhang’o mĩingĩ ya gũcaria mbeca. O na ndaarĩ na indo nyingĩ cia gũkũ thĩ. Jesu nĩ aamenyaga ũndũ ũrĩa wa bata makĩria ũtũũro-inĩ. Wee nĩ ũĩ ũndũ ũcio nĩ ũrĩkũ?— Nĩ gũkorũo tũrĩ atongu maitho-inĩ ma Ngai.

Rĩu ta njĩra atĩrĩ, tũngĩka atĩa nĩguo tũtuĩke atongu maitho-inĩ ma Ngai?— Twagĩrĩirũo gwĩkaga maũndũ marĩa makenagia Ngai. Jesu oigire  ũũ: ‘Hingo ciothe njĩkaga maũndũ marĩa makenagia Ngai.’ (Johana 8:29) Ngai nĩ akenaga rĩrĩa tweka maũndũ marĩa endaga twĩke. Hihi nĩ maũndũ marĩkũ ũngĩka nĩguo ũkenie Ngai?— Nĩ gũthomaga Bibilia, gũthiĩ mĩcemanio ya Gĩkristiano, kũhoya Ngai, na gũteithia andũ arĩa angĩ mamũmenye. Macio nĩmo maũndũ marĩa ma bata makĩria ũtũũro-inĩ.

Tondũ Jesu aarĩ mũtongu maitho-inĩ ma Jehova, Jehova nĩ aamũteithirie. Nĩ aaheire Jesu kĩheo kĩa muoyo wa tene na tene. O na ithuĩ tũngĩtuĩka ta Jesu, Jehova nĩ arĩtwendaga, na agatũteithia. Kwoguo twagĩrĩirũo gũtuĩka ta Jesu, no ti ta mũndũ ũcio mũtongu wariganĩirũo nĩ Ngai.