EFIKU limwe, opa li omulumenhu umwe oo a li e uya kuJesus. Okwa li e shi shii kutya Jesus okwa li omunongo elela, onghee hano, okwa li a lombwela Jesus a ti: ‘Lombwela omumwameme a tukule naame oinima imwe oyo e na.’ Omulumenhu oo okwa li a hala oinima imwe oyo ya li i niwe kumumwaina.

Ngeno oove kwa li Jesus, mbela ngeno owa nyamukula omulumenhu oo ngahelipi? —  Jesus okwa li a mona kutya omulumenhu oo okwa li e na oupyakadi. Oupyakadi waye kawa li ashike u na sha noinima oyo ya li kumumwaina, ndele omolwaashi ka li e shi shii kutya oshike osho sha li sha fimanenena monghalamwenyo.

Natu diladile kombinga yaashi, mbela oshike osho shi na okukala sha fimanenena monghalamwenyo yetu? Mbela okukala tu na oidanaukifo iwa, oikutu ipe ile keshe tuu oinima ya yukila oko? —  Ahowe, ope na oshinima shimwe osho sha fimanenena shi dule oinima aishe oyo. Jesus okwa li a hala okuhonga ovanhu ovo a li ta popi navo oshilihongomwa osho. Onghee hano, okwa li a hokolola ehokololo kombinga yomulumenhu umwe oo a li a dimbwa Kalunga. Mbela owa hala okuuda kombinga yehokololo olo? — 

Omulumenhu oo okwa li oshipuna shinene. Okwa li e na epya nosho yo omaanda. Oilya yaye oyo a li a kuna oya li ya dala nawa, omaanda aye okwa li a yada noka li vali e na apa ta tuvikile oilya yaye. Mbela okwa li ta ka ninga po shike? Okwa li e lipopila a ti: ‘Ohandi ka hanauna po omaanda ange, ndele handi tungu po amwe manene, nohandi ka tuvikila mo oilya yange nemona lange alishe.’

 Omulumenhu oo oshipuna okwa li ta diladila kutya oshi li pandunge okuninga ngaho. Okwa li e wete a katuka pandunge eshi e lituvikilila oinima ihapu. Okwa li e lipopila a ti: ‘Onde lituvikilila oinima ihapu iwa, noya wanena eemhumbwe dange domido dihapu. Paife ohandi ka tulumukwa nee, ohandi ka lya nokunwa, nohandi ke lihafifa.’ Ndele okutomhafana kwomulumenhu oo oshipuna okwa li kwa puka. Mbela ou shi shii kutya omolwashike? —  Omolwaashi okwa li e lihole mwene nokwa li ashike te lipula shi na sha nouwa waye mwene. Okwa li a dimbwa Kalunga.

Onghee hano, Kalunga okwa li a popya nomulumenhu oo oshipuna a ti: ‘Elai ove, oto ka fya moufiku wonena, olyelye ta ka kufa po oinima aishe oyo we i lituvikilila?’ Mbela omulumenhu oo oshipuna okwa li ta ka dula okulongifa oinima yaye ngeenge a fi? —  Ahowe, oya li tai ka ninga po yaumwe. Onghee hano, Jesus okwa ti: “Hano osho ou te lilikolele emona, ye ke na oupuna puKalunga, ta ningwa.” — Lukas 12:13-21.

Mbela owa hala okukala wa fa omulumenhu oo oshipuna? —  Omulumenhu oo okwa li a lalakanena ashike okulikongela oinima yopamaliko monghalamwenyo. Osho osha li sha puka. Okwa li alushe ha kala a hala shihapu shi dulife pwaasho a li e na, ndele ka li e na “oupuna puKalunga.”

 Ovanhu vahapu ove li naanaa ngaashi omulumenhu oo oshipuna, ohava kala alushe va hala shihapu shi dulife osho ve na. Ndele okukala wa hala shihapu shi dulife osho u na otashi dulu oku ku etela omaupyakadi a kwata moiti. Pashihopaenenwa, mbela ou na oidanaukifo? —  Ou na mbela oidanaukifo ilipi? —  Ndele mbela ongahelipi ngeenge umwe womookaume koye oku na etanga ile okapopifa ile oshidanaukifo shimwe osho uhe na? Mbela otashi ka kala ngoo sha yuka okukala to kondjifa ovadali voye ve ku landele oshidanaukifo shonhumba sha fa osho wa mona kumukweni? — 

Otashi dulika pa kale omafimbo amwe oo to ka kala u wete oidanaukifo ya fa ya fimana unene i dulife oinima ikwao. Ndele mbela oshike hashi ningilwa oidanaukifo mokweendela ko kwefimbo? —  Ohai kulupa ile i nyonauke, ndele to kala ino i hala vali. Ndele ou na oshinima shimwe osho shi na ongushu shi dule oidanaukifo. Mbela ou shi shii kutya oshike? — 

Omwenyo woye. Omwenyo woye owa fimanenena, molwaashi ngeenge ku na omwenyo ito dulu okuninga sha. Ndele okukala nomwenyo kwoye okwe likolela kokulonga osho tashi hafifa Kalunga, hasho mbela? —  Onghee hano, katu na okukala ngaashi omulumenhu oshipuna elai oo a li a dimbwa Kalunga.

Ounona havo aveke tashi dulika va ninge oinima ihe li pandunge ngaashi omulumenhu oshipuna. Ovakulunhu vahapu navo ohava dulu okuninga  oinima ihe li pandunge. Ovakulunhu vamwe navo ohava kala alushe va hala oinima ihapu i dulife oyo ve na. Otashi dulika va kale ve na oikulya ya wana, oikutu nosho yo onhele yokukala. Ndele nande ongaho, ohava kala va hala shihapu shi dulife pwaasho ve na. Ova hala okukala ve na oikutu ihapu neenghono nosho yo omaumbo manene. Oinima oyo oi na ondilo. Onghee hano, ohava longo eevili dihapu opo va dule okumona oimaliwa ihapu. Apa ngoo pe fike tava mono oimaliwa ihapu, opo ngoo pe fike ehalo lavo lokukala va hala oimaliwa ihapu.

Ovakulunhu vamwe ohava kala ve lipyakidila unene tava kendabala okulikongela oimaliwa, ndele ihava kala vali ve na efimbo lokukala pamwe nomaukwaneumbo avo. Ihava kala yo ve na efimbo loinima yopakalunga. Mbela oimaliwa yavo otai dulu oku va kaleka nomwenyo? —  Ahowe, itai dulu. Mbela otava ka dula ngoo okulongifa oimaliwa yavo ngeenge ova fi? —  Ahowe, molwaashi oonakufya ihava dulu okuninga sha. — Omuudifi 9:5, 10.

Mbela osho osha hala okutya osha puka okukala tu na oimaliwa? —  Ahowe. Otwa pumbwa oimaliwa opo tu dule okulanda oikulya nosho yo oidjalomwa. Ombibeli otai ti kutya oimaliwa oi li epopilo. (Omuudifi 7:12) Ndele ngeenge otwa kala tu hole oimaliwa, ohatu ka hangika komaupyakadi a kwata moiti. Ohatu ka kala twa fa oshipuna elai osho sha li she lituvikilila omamona ndele kasha li shi na oupuna puKalunga.

Mbela osha hala okutya ngahelipi okukala noupuna puKalunga? —  Osha hala okutya tu pitife komesho oinima yopakalunga monghalamwenyo yetu. Ovanhu vamwe ohava ti kutya ova itavela muKalunga. Ohava diladila kutya shimha ashike wa itavela muKalunga ino pumbwa vali okuninga sha. Ndele mbela ove na ngoo oupuna puKalunga? —  Ahowe, ova fa ashike oshipuna elai osho sha li sha dimbwa Kalunga.

Jesus ka li nande a dimbwa Xe womeulu. Ka li a kendabala okulikongela oimaliwa ihapu, noka li e likongela oinima ihapu yopamaliko. Jesus okwa li e shii kutya oshike osho sha fimanenena monghalamwenyo. Mbela ou shi shii kutya oshike osho sha fimanenena monghalamwenyo? —  Okukala noupuna puKalunga.

Lombwele nge kutya ongahelipi hatu dulu okukala tu na oupuna puKalunga? —  Ohatu dulu okukala tu na oupuna puKalunga mokulonga nokuninga osho tashi mu hafifa. Jesus okwa ti: “Ohandi longo ashishe eshi she mu  wapalela.” (Johannes 8:29) Kalunga oha kala a hafa ngeenge hatu longo oinima oyo a hala tu longe. Mbela oinima ilipi to dulu okuninga oyo tai hafifa Kalunga? —  Heeno, oto dulu okulesha Ombibeli, okuya kokwoongala kwopaKriste, okwiilikana kuKalunga nosho yo okukwafela vamwe ve lihonge kombinga yaKalunga. Oyo oyo oinima ya fimanenena monghalamwenyo.

Molwaashi Jesus okwa li e na oupuna puKalunga, Kalunga okwa li e mu fila oshisho. Okwa pa Jesus ondjabi yokukala nomwenyo fiyo alushe. Ngeenge otwa kala ngaashi Jesus, Jehova ota ka kala e tu hole note ke tu fila yo oshisho. Onghee hano, natu kale ngaashi Jesus ndele hangaashi omulumenhu winya oshipuna oo a li a dimbwa Kalunga.