ILAANNI angutip Jiisusi ornippaa. Qularinnginnamiuk Jiisusip ikiorsinnaagaani ima oqarfigaa: ‘Ajoqersuisoq, qatanngutiga oqarfigiuk pimi ilaat uannut tunniutissagai.’ Isumaqarami qatanngutimi piisa ilaat pigisariaqaraluarlugit.

Illit Jiisusiusuuguit qanoq oqassagaluarpit? — Jiisusip takusinnaavaa angut ajornartorsiuteqartoq, imaanngilarli qatanngutimi pigisaasa ilai amigaatigigai. Naamik, angutilli ajornartorsiutaa tassaavoq takusinnaannginnamiuk inuunermi suna pingaarnerpaanersoq.

Eqqarsaatigilaariartigu. Uagutsinnut suna pingaarnerpaassava? Tassaanerpat atisat nutaat, pinngussat akisuut tamakkualu assigisaat? — Naamik, suli pingaarnerujussuaqarpoq tamatuminngalu Jiisusip angut paasitikkusuppaa. Taamaattumik Jiisusip angummik Guutimik puiuisumik oqaluttuutilerpaa. Oqaluttuaq tusarusuppiuk? — Ima oqaluttuarpoq.

Ilaannigooq anguteqarpoq pisoorujussuarmik. Arlalinnik narsaaterujussuaqarpoq karrinullu querpassuaqarluni. Narsaatimini karrit naatitai amerliartuinnavipput naggataatigut ima amerlatigilerput allaat quiani inissaarullutik. Qanormi iliussava? Imminut ima oqarfigivoq: ‘Quikka ingutserniarpakka nutaanillu anginerujussuarnik sanallunga. Taava katersukkakka tamarmik pigisakkalu ajunngitsut tamarmik inissaqalissapput.’

Angut pisooq isumaqarpoq karrerpassuaatini inissaqartikkumallugit arlalinnik angisuunik quilioruni  silatusaassalluni. Imminut ima oqarfigivoq: ‘Maanna quinni perpassuaqarpunga ajunngitsunik. Ukiorpassuarnut naammammata eqqissisimaalerniarpunga. Nerillungalu imerniarpunga inuulluataarlungalu.’ Kisianni angutip pisuup taamatut eqqarsarnera ajorpoq. Sunartaa ajornersoq nalunngiliuk? — Imminuinnaq ilorrisimaarlunilu inuunissani kisiisa eqqarsaatigigamigit. Guuti puiorpaa.

Taava Guutip angut pisooq oqarfigaa: ‘Sianiitsutit. Unnuaru toqussaatit. Kiammi taava katersugarpassuatit pissavai?’ Angutip pisuup toqoreeruni pigisarpassuani nuannaarutigisinnaavai? — Naamik, ilaa? Allat pigisarpassui kingornutissavaat. Jiisusi ima oqarpoq: “Taama pisarpoq pisuussutinik katersisoq Guutimili pisuujunani.” — Lukasi 12:13-21.

Angutitut pisuutut iliorusunngilagut, ilaa? — Pigisarpassuaqalernissani kisiat eqqarsaatigaa. Tamannalu ajortuuvoq. Suli amerlanerusunik pigisaqarnerulerusuunnavippoq. Kisiannili ‘Guutimi pisuujunngilaq’.

 Inuppassuit angutitut taassumatut iliorput. Suli amerlanerusunik pigisaqarnerulerusupput. Tamannali ajornartorsiuterpassuarnik kinguneqarsinnaavoq. Pinnguaqarputit, ilaa? — Misilillugu pinngussat suut piginerlugit taagulaariakkit. — Ikinngutivimmi ilaat arsaqarpat imaluunniit inuusaqarpat arlaannilluunniit illit piginngisannik peqarpat? Taava angajoqqaannut uteriisissavit taamaattumik pitsiseqqullutit? —

Ilaannikkut immaqa pinngussap aalajangersimasup piginissaa pingaartittorujussuusarpat. Pinngussalli kingusinnerusukkut susarpat? — Nutaanngilisarput immaqalu sequmittarlutik naggataatigullu soqutigineeruttarlutik. Pinngussanilli pingaarnerujussuarmik peqarputit. Suunersoq nalunngiliuk? —

Tassa inuunerit. Inuunerit pingaaruteqartorujussuuvoq inuuneqanngikkuit susinnaannginnavit. Inuunerlu naassaanngitsoq taamaallaat pisinnaavat Guutip iluarisaanik ilioruit. Taamaattumik angutitut pisuutut issanngilagut taanna sianiillioqaluni Guutimik puiuimmat.

Meeraannaanngillat Jiisusip angummik pisuumik oqaluttuaanik ilinniarfiginnissinnaasut. Aamma inersimasut amerlasuut tamanna  ilinniarfigisinnaavaat. Inuit ilaat pisaarusuinnavittarput. Naak atisaqaraluarlutik, nerisassaqaraluarlutik inissaqaraluarlutillu naammaginnilerneq ajorput. Suli amerlanerusunik atisartaarusupput sulilu anginerujussuarmik illutaarusullutik. Tamakkulu soorunami akeqarput. Taamaattumik suleruloortariaqartarput aningaasarsiorniarlutik. Sulili aningaasarsiornerujartortillutik amerlanerusunik pigisaqalerusuttarput.

Inersimasut ilaat ima aningaasarsiornissartik ulapputigisartigaat allaat ilaquttamik ilaginissaat piffissaqarfigiunnaartarlugu. Aamma Guutimut piffissaaruttarput. Aningaasaataasali inuuginnartissinnaavaat? Toqoreerunik pisiniarsinnaappat? — Naamik, toqungasummi sunnguamilluunniit iliorsinnaanngillat. — Oqaluussisartup oqaasii 9:5, 10.

Tamanna isumaqarpa aningaasaateqarneq ajortuusoq? — Naamik, aningaasammi atorlugit nerisassanik atisanillu pisisarpugut. Biibilimi aamma allassimavoq aningaasat iluaqutigisinnaagivut. (Oqaluussisartup oqaasii 7:12) Kisianni aningaasat asagutsigit ajornartorsiulissaagut. Taava angutitut pisuussutinik katersisutut, Guutimili pisuujunngitsutut, issaagut.

Guutimi pisuujuneq qanoq paasisariaqarami? — Ima paasisariaqarpoq Guutimut kiffartorneq uagutsinnut pingaarnerpaasoq. Inuppassuit oqartarput Guuti upperalugu isumaqaramik upperisaqarneq kisimi naammattoq. Ilumulli Guutimi pisuujuppat? — Naamik, angutitut Guutimik puiuisutut ipput.

Jiisusip Ataatani qilammiittoq puiunngisaannarpaa. Aningaasarpassuarnik katersiniarsarinngilaq. Pigisarpassuaqanngilarlu. Nalunnginnamiuk suna pingaarnerpaanersoq. Aamma illit nalunngilat sunaanersoq, ilaa? — Aap, tassa Guutimi pisuujuneq.

Qanormi ililluta Guutimi pisuunngorsinnaagatta? — Taamaalisinnaavugut iluarisaanik iliorutta. Jiisusi ima oqarpoq: ‘Tamatigut iluarisaanik iliortarpunga.’ (Johannesi 8:29) Guutip piumasaanik ilioraangatta taassuma nuannaarutigisarpaa. Qanoq illit Guutip iluarisaanik  iliorsinnaavit? Suna nuannaarutigisarpaa? — Biibili atuarsinnaavat, ataatsimiigiartarsinnaavutit, Guutimut qinusarsinnaavutit, allallu Guutimik ilinniarnissaannut ikiorsinnaavatit. Taakkuuppullu inuunitsinni pingaarnerpaasussat.

Jiisusi Guutimi pisuujummat Guutip isumagaa. Akissarsisingaarpaa inuunermik naassaanngitsumik tunineratigut. Jiisusitut iliortarutta Jehovap uaguttaaq asassavaatigut isumagissallutalu. Taamaattumik Jiisusitut iliortarniarta angutitut pisuutut Guutimik puiuisutut iliornata.