DIFUKU dimo, mwana-mulume umo wāile kudi Yesu. Wādi uyukile amba Yesu i muntu wa ñeni mivule, o mwana wāmunene amba: ‘Abe Mufundiji, banenene mwanetu angabile’ko bintu bimo byadi nabyo.’ Muntu’wa wādi ufwatakanya amba nandi ufwaninwe kwikala’ko na bintu kampanda.

Shi abe wādi Yesu, longa wālongele’po namani?—Yesu wājingulwile amba muntu’wa udi na mwanda umukoleja. Ino mwanda mwine kewādipo wa kusaka bintu bidi na mwanabo. Mwanda mwine i uno: muntu’wa kādipo uyukile bintu bya mvubu binebine umbūmi.

Tulange’po bidi. Lelo kotudi i bintu’ka bya mvubu kupita byonso? Lelo i bintu bikaibwa nabyo biyampe’ni, i bisandi bipya’ni, nansha bintu bya uno muswelo?—Ehe, kudi kintu kampanda kya mvubu kupityidila. Buno bo bufundiji bwāsakile Yesu kufundija. O mwanda wāsekunwine lusango lwa muntu wāidilwe Leza. Lelo nobe usaka kwilwivwana?—

Uno muntu wādi mpeta byamwiko. Wādi na ntanda yandi ne bibīko bya bidibwa. Bidibwa byaādi udimine byātambile biyampe mpata. Wābulwa ne kyaba mu bibīko byandi kya kubika bidibwa byonso. Le penepo wālongele’po namani? Ebiya, kaineneja aye mwine amba: ‘Nkatūte bibīko byami’bya, nkashimike’po bikwabo bikatampe. Ebiya nkomeke’mo bidibwa byami, ne bintu byami byonso biyampe.’

 Mpeta’wa wāfwatakenye amba kulonga namino yo ñeni. Wālangile amba shi webikila bintu bivule nabya udi na ñeni mivule mpata. Kupwa kaineneja aye mwine amba: ‘Kendi na bintu bingibingi binengele bibikilwe. Bikankwasha myaka mivule. Nanshi pano nkeneikadila bitupu. Nsa kudya ne kutoma, kadi ne kwisangaja ami mwine.’ Inoko mpeta’wa wādi na kintu kimo kibi mu mifwatakanyo yandi. Lelo abe wikiyukile?—Wādi wilangila’nka aye mwine ne nsangaji ya aye mwine. Wāidilwe Leza.

Ebiya kwivwana kudi Leza kanena mpeta’wa amba: ‘Abe kivila. Mu bonka buno bufuku ukafwa. Lelo bintu byowadi wiungwijija bikekalanga pano bya ani?’ Lelo uno mpeta ukengidija monka bintu’bya shi wafu?—Ehe, muntu mukwabo ukayata’byo. Kupwa Yesu wānena’mba: “I mo mwikadile ne ku yewa muntu wiungwijija byabupeta bya aye mwine, kumweka bu mpeta kudi Leza mpika.”—Luka 12:13-21, MB.

Abe shobe kusenswepo kwifwana uno mpeta, mwene i amo?—Kitungo kyandi umbūmi kyādi enka kya kupeta bupeta bwa bintu bya ku  ngitu. Kino i kilubo. Mafuku onso wādi ukimba enka kupetela’ko. Ino kādipo “mpeta kudi Leza.”

Bantu bavule badi pamo bwa uno mpeta. Bakimbanga nyeke byabupeta bivule. Ino kino kibwanya kwibafikija ku makambakano makatampe. Tulete’po kimfwa, udi na bintu bya kukaya nabyo, mwene i amo?—Le i bintu’ka bimobimo byodi nabyo? Ntelele’byo.—Le umona namani shi mulunda nobe umo udi shi na futu nansha kikololo (kipopi) nansha kintu kikwabo kya kukaya nakyo kyobudilwe? Lelo bikekala biyampe ukolele bambutwile bobe amba enka bakupotele nobe kyobe?—

Bitatyi bimo kintu kikaibwa nakyo kikokeja kwikala na kamweno mpata. Ino le kikalanga namani shi mafuku mavule apite’po?—Kyonekanga. Kikasusakana, kukiswe’kyopo nansha dimo. Ino na bubine, udi na kintu kya bulēme mpata kitabukile bintu bikaibwa nabyo. Lelo wikiyukile amba i kika?—

I būmi bobe. Būmi bobe budi na mvubu mpata mwanda shi kudipo nabo, kubwanyapo kulonga kintu nansha kimo kine. Inoko būmi bobe  bwimanine pa kulonga byobya bisangaja Leza, mwene i amo?—Nanshi ketwakikala bwa yewa mpeta kivila wāidilwe Leza.

Ke’nkapo banuke kete bakokeja kulonga bintu bya buvila pamo bwa yewa mpeta. Batame bavule nabo baloñanga’byo. Bamo bakimbanga nyeke bintu bipite bungi kutabuka’ko byobadi nabyo. Bakokeja kwikala na bidibwa bya difuku ne difuku, bivwalwa, ne pa kwikala. Inoko bakimba bitabuke pene’pa. Bakimba bivwalwa bingibingi. Kadi bakimba mobo mapite bukata. Bino bintu bilombanga lupeto luvule. O mwanda bengila mpata mwanda wa kumona lupeto luvule. Abo basokola lupeto luvule kadi po pene basakila’ko lukwabo.

Batame bamobamo beelelelanga mu kukimba lupeto babulwa ne kitatyi kya kushikatyila pamo na bisaka byabo. Ne kebakidipo na kitatyi kya kwingidila Leza kine. Lelo lupeto lwabo lubwanya kwibalamina būmi?—Mhm, kelubwanyapo. Lelo shi bafwe babwanya monka kwingidija lupeto lwabo?—Ehe. Mwanda bafwe kebakokejapo kulonga kantu nansha kamo kene.—Musapudi 9:5, 10.

Lelo ko kunena amba i kibi kwikala na lupeto?—Anha. Mwanda tukokeja kupota bidibwa ne bivwalwa na lupeto. Bible unena amba lupeto lwitukiñanga. (Musapudi 7:12) Inoko shi tuswe lupeto, nankyo tukekokela makambakano. Tukekala pamo bwa yewa mpeta kivila wēungwijije bya bupeta ino kādipo mpeta kudi Leza.

Le kwikala mpeta kudi Leza kishintulula namani?—I kutangidija Leza ku meso mu būmi bwetu. Bantu bamo banenanga amba i betabije mudi Leza. Bafwatakanya amba kisakwa’tu kine i enka kwitabija kete. Ino lelo bine bano bantu i bampeta kudi Leza?—Ehe, badi pamo bwa yewa mpeta wāidilwe Leza.

Yesu kāidilwepo kashā Shandi wa mūlu. Kātompelepo kwiungwijija lupeto luvulevule. Ne kādipo na bintu bivule bya ku ngitu. Yesu wādi muyuke kintu kya mvubu binebine umbūmi. Le nobe wikiyukile?—I kwikala mpeta kudi Leza.

Nsapwile bidi, le i muswelo’ka otukokeja kwikala bampeta kudi Leza?—Tubwanya kwikala bampeta kudi Leza shi tulonga bintu bimusangaja.  Yesu wānene amba: “Ami nami noñanga byonka bya kumutōkeja ku mutyima wandi mafuku onso.” (Yoano 8:29) Leza usangalanga shi tulonga bintu byaetusakila kulonga. Shi ke pano nsapwile, i bintu’ka byokokeja kulonga mwanda wa kusangaja Leza?—Eyo, ukokeja kutanga Bible, kwenda ku kupwila kwa bwine Kidishitu, kulombela Leza, ne kukwasha bantu bakwabo bamuyuke. Na bubine bino byo bintu bya mvubu mpata mu būmi.

Yesu wādi mpeta kudi Leza, o mwanda Yehova wāmulamine. Wāpadile Yesu mpalo ya kwikala mūmi nyeke. Shi netu twifwane Yesu, Yehova uketuswa kadi uketulama. Nanshi twifwanei Yesu ino ketwakefwanaipo nansha dimo yewa muntu wāidilwe Leza.