HUK runam Jesus ancha yachayniyuq kasqanta yachaspan nirqa: ‘Yachachikuq, wawqiytayá niykapuway herenciata ñuqawan rakinakunanpaq’, nispan. Chaynataqa nirqa chaskisqanmantapas aswan mastaraq munaspanmi.

Qam Jesus kaspaykiqa, ¿imatam chay runata niwaq karqa?... Jesusqa yacharqam chay runaqa Diospaq kaqkunata mana kaqpaqpas hapispan kapuqniyuq kayllata munasqanta.

Ñuqanchikpaqqa, ¿ima ruwaytaq aswan chaninniyuq kanman? ¿Pukllakuychu, musuq pachawan pachakuychu icha imataq?... Imakuna kasqanmanta yachanapaq Jesuspa willakusqanmanta yachaykusun. ¿Munawaqchu chaymanta willanayta?...

Huk apu runapam kawsaynin alli-allinta qispirurqa. Chaymi kawsaykuna huñunan wasikuna kichkiruptin sunqunpi nikurqa: ‘Kawsay waqaychana wasikunata paskaruspayá aswan hatuntaña ruwarusaq chayman lliw kawsayniykunata huñunaypaq’, nispa.

Chay apu runaqa tanteasqan allin kasqanta piensaspanmi nirqa: ‘Kunanqa, unay watakunapaqmi tukuy imaykuna achkallaña  kachkan, chaynaqa hawkallaña kawsakuspayyá mikukusaq, tomakusaq hinaspa kusikusaq’, nispa. Ichaqa manam allinchu karqa chayna piensasqanqa. ¿Imanasqa?... Apuyayllapi umayuq kasqanraykum.

Chaymi Diosqa payta nirqa: “Yaw mana yuyayniyuq runa, kunan tutam wañuchisunki. Hinaptinqa, ¿pipaqtaq kanqa tukuy huñusqaykiqa?”, nispa. Chay runa wañuruspanqa, ¿tukuy imantachu apanman karqa?... Manam, runakunapaqchiki kanman karqa. Chaymi Jesus nirqa: “Chaynam kanqa Diospaq mana imayuq kaspan kikillanpaq tukuy imata huñuq runawanqa”, nispa (Lucas 12:13-21).

¿Munawaqchu chay apu runa hina kayta?... Payqa apuyayllatam imamantapas llalliriqtaqa munarqa, chaymi ‘Diospaqqa pasaypaq mana imayuq karqa’.

 Chay apuyaylla munaq runa hinam achka runakuna tukuy imayuq kayta munanku. Ichaqa manam chayqa allinchu. ¿Qampa kanchu pukllanaykikuna?... ¿Imachakunataq?... ¿Ima niwaqtaq wakin warmachakunapa pelotanta, muñecanta utaq ima pukllanachantapas qawaspayki? ¿Hikutanaykichu tayta-mamaykita rantichikunaykipaq?...

Wakinpim chay pukllanakunata llumpayta kuyaruchwan. Ichaqa, ¿mana tukuqchu chay pukllana kanman?... Tukuqllam imapas. Ichapas pakikuruptinqa manaña kaqpaqpas hapinkiñachu. Ichaqa, ¿imataq pukllanamantapas aswan chaninniyuqqa kanman?...

Kawsakuyninchikmi. Wañusqa kaspaqa manam imatapas ruwayta atichwanchu. Chaymi hinalla kawsakunapaqqa Diospa munasqanman hina kawsakunanchik, icha ¿ima niwaqtaq?... Chayraykum Diosta qipanchaq mana yuyayniyuq chay apu runa hinaqa mana kananchikchu.

 Ichaqa manam warmakunallachu mana yuyaywan imapas ruwaqqa kanku. Yuyayniyuq runakunapas chaynam kanku. Wakinmi tukuy imayuq kayta munanku. Chaymi pachanku, wasinku hinaspa mikunanku kachkaptinpas astawanraq munanku achka pachayuq, achka mikunayuq hinaspa hatun wasiyuq kayta. Chaymi qullqita huñunankupaq mana samaykuspa tuta punchaw llamkanku.

Chayraykum wakinqa manaña haypakunkuchu wasinkupi kaqkunawan kuska kanankupaqqa nitaq Diosmanta astawan yachanankupaqqa. ¿Qullqinkuchu wañuymanta harkanqa?... Manam. ¿Wañuspa apanqakuchu chay qullqinkuta?... Manam, wañuqkunaqa manam imatapas ruwankuñachu (Eclesiastes 9:5, 10).

Hinaptinqa, ¿huchachu kanman qullqiyuq kay?... Manam. Qullqiwanmi mikuyta utaq pachata rantinchik. Bibliapas ninmi qullqiqa chaykunapaq kasqanta (Eclesiastes 7:12). Ichaqa, qullqi kuyaymi manaqa allinchu. Kuyaruspaqa Diospaqmi pasaypaq mana imayuq kachwan chay apu runa hina.

¿Ima ninantaq Diospaq mana imayuq kayqa?... Diospaq kaqkunata mana kaqpaqpas hapiymi. Wakin runakunaqa Diospi iñichkaspankupas manam kamachisqankunataqa kasukunkuchu. Chaymi chay mana yuyayniyuq apu runa hina Diospaqqa pasaypaq mana imayuq kachkanku, ¿icha manachu?...

Jesusqa manam chaynachu karqa. Payqa manam apuyaytaqa maskarqachu. ¿Imatataq nis maskarqa?... Diospa munaynin ruwaytam.

¿Imata ruwaspam Jesusta qatipakuchwan?... Jesus hina ñuqanchikpas ‘Diospa munayninta ruwaspam’ (Juan 8:29). Hinaptinqa,  ¿imakunataq kanman chay ruwaykunaqa?... Bibliata leeymi, huñunakuykunaman riymi, Diosta mañakuymi hinaspa runamasikiman paymanta yachachiymi. Chay ruwaykunatam imamantapas llalliriqtaqa ruwananchik. Chayqa Diospa sunquntam kusichin.

Jesusqa Diospa munaynin ruwasqanraykum wiñay kawsayta chaskirqa. Chaymi Jesus hina kaspanchikqa Diospa kuyasqan hinaspa yanapasqan kasun. Chaynaqa Jesustayá qatipakusun, ama chay mana yuyayniyuq apu runatachu.