MBENI lâ, mbeni koli aga ti bâ Jésus. Lo hinga so Jésus ahinga ye mingi, si lo tene na lo: ‘Wafango ye, tene na ita ti mbi ti mû na mbi ambeni ye so lo yeke na ni.’ Na bê ti koli ni, a lingbi lo wara aye so.

Tongana mo yeke lani Jésus, mo yeke tene nyen?— Jésus abâ so koli ni ayeke na mbeni kpale. Kpale ti lo ni ayeke pëpe so a lingbi lo wara ye so ita ti lo ayeke na ni. Me kpale ni ayeke so lo hinga pëpe ye so ayeke biani kota ye na yâ fini.

Zia e gbu li ti e dä kete e bâ. Nyen la a lingbi a duti kota ye mingi na e? A yeke ti wara apendere ye ti ngia, afini bongo, wala aye tongaso?— Oko pëpe, mbeni ye ayeke dä so ayeke tâ kota mingi ahon aye so. A yeke ye so Jésus aye lani ti fa la. Tongaso, lo tene mbeni mbaï na ndo mbeni koli so agirisa Nzapa. Mo ye ti mä ni?—

Koli so ayeke lani na nginza mingi. Lo yeke na ayaka nga na agogoro. Alê ti kobe so lo lu asigigi nzoni mingi. Me place ahunzi na yâ ti agogoro ti lo. Lo yeke sala ande nyen? Lo tene na bê ti lo: ‘Mbi yeke kungbi agogoro ti mbi ti leke ambeni kota ni na place ni. Na pekoni awe, mbi yeke zia alê ti kobe ti mbi ni nga na anzoni ye kue so mbi yeke na ni na yâ afini gogoro so.’

Zo ti nginza ni abâ ti lo lani so a yeke nzoni mingi ti sala ye tongaso.  Ti lo, tongana lo bata gbâ ti aye, a yeke fa so lo hinga ndo mingi la. Lo tene na bê ti lo: ‘Mbi yeke na aye mingi so mbi bata. A yeke ngbâ ande teti angu mingi. Fadeso, mbi lingbi ti hu tele ti mbi. Mbi yeke te, mbi yeke nyon, na mbi yeke sala ngia.’ Me mbeni ye ayeke dä so ayeke nzoni pëpe na yâ tënë ti koli so. A yeke nyen? Mo hinga ni?— Lo yeke bâ gi tele ti lo mveni nga na anzara ti bê ti lo. Lo girisa Nzapa.

Me Nzapa atene na lo: ‘Mo buba zo. Gi na bï ni so mo yeke kui. Aye so mo bungbi ni kue so, zo wa si ayeke wara ni?’ Zo ti nginza so alingbi ti te aye ti lo so na peko ti kuâ ti lo?— Oko pëpe, mbeni zo nde si ayeke te ni. Jésus atene: “Tongaso zo so abungbi mosoro teti lo mveni, me lo yeke na mosoro na gbele Nzapa pëpe, lo yeke tongana zo so.”​—Luc 12:13-21.

Mo ye ti duti tongana zo ti nginza so?— Ye kue so lo ye na yâ fini ti lo ayeke ti wara gbâ ti akungba. So ayeke na lege ni pëpe. Lani lo ye lakue ti wara ye mingi. Me lo yeke na “mosoro na gbele Nzapa pëpe”.

 Azo mingi ayeke tongana zo ti nginza so. Ala ye lakue ti wara ye mingi. Me ye so alingbi ti ga na akota kpale na ala. Na tapande, mo yeke na aye ti ngia?— Aye ti ngia wa mo yeke na ni?— Ka tongana mbeni kamarade ti mo ayeke na mbeni ballon wala poupée wala mbeni ye ti ngia nde so mo yeke na ni pëpe? A yeke duti ande nzoni ti gi ti sala si babâ na mama ti mo avo mbeni na mo?—

Ambeni ngoi alingbi ti duti dä so mbeni ye ti ngia ayeke kota ye mingi. Me tongana lo ninga kete, lo yeke ga tongana nyen?— Lo komanse ti buba. Lo lingbi ti fâ, na mo ye ni mbeni pëpe. Me, mo yeke na mbeni ye so ayeke kota mingi mingi ahon aye ti ngia. A yeke nyen? Mo hinga ni?—

A yeke fini ti mo. Fini ti mo ayeke kota ye mingi ngbanga ti so tongana mo yeke na fini pëpe, mo lingbi ti sala ye oko pëpe. Me mo yeke ngbâ na fini gi tongana mo sala ye so anzere na lê ti Nzapa, ni la ape?— Tongaso, zia e duti tongana zo ti nginza so pëpe, lo sala ye ti buba na lo girisa Nzapa.

 A yeke gi amolenge pëpe si alingbi ti sala ye ti buba tongana zo ti nginza so. Akota zo mingi ayeke sala nga ni. Ambeni aye lakue ti wara ye mingi. Ala yeke peut-être na kobe ti tengo ni lâ oko oko, ala yeke na bongo nga na da. Me ala ye ti wara mingi ahon so. Ala ye ti wara gbâ ti abongo. Ala ye nga ti wara akota da. Aye so kue ahunda nginza. Ni la, ala yeke sala kua ngangu ti wara gbâ ti nginza. Na tongana ala wara gbâ ti nginza, ala ye nga ti wara ye mingi ahon ti so ala yeke na ni awe.

Ambeni kota zo ayeke sala kua mingi ti wara nginza. Tongaso, ala yeke na ngoi oko pëpe ndali ti fami ti ala. Ala yeke nga na ngoi oko pëpe ti mû na Nzapa. Nginza ti ala alingbi ti bata ala na fini?— Oko pëpe. Tongana ala kui, ala lingbi ti vo ye na nginza ti ala ni?— Oko pëpe, ngbanga ti so akuâ alingbi ti sala ye oko pëpe.​—Zo-ti-fa-tene 9:5, 10.

A ye ti tene so dutingo na nginza ayeke sioni?— Oko pëpe. Nginza ayeke mû lege na e ti vo kobe nga na bongo. Bible atene so nginza ayeke bata zo (Zo-ti-fa-tene 7:12). Me tongana e ye nginza mingi, ge la e yeke wara akota kpale. E yeke ga ande tongana zo ti nginza so asala ye ti buba so, lo bungbi aye ndali ti lo mveni, me lo yeke na mosoro pëpe na gbele Nzapa.

Ti duti na mosoro na gbele Nzapa aye ti tene nyen?— A ye ti tene ti zia Nzapa na kozo ndo na yâ fini ti e. Ambeni zo atene so ala mä na bê na Nzapa. Ti ala, gi mango na bê na Nzapa alingbi awe. Me ala yeke biani na mosoro na gbele Nzapa la?— Oko pëpe, ala yeke tongana zo ti nginza so agirisa Nzapa.

Jésus agirisa Babâ ti lo ti yayu lâ oko pëpe. Lo gi ti wara gbâ ti nginza pëpe. Lo duti nga na gbâ ti akungba pëpe. Jésus ahinga lani ye so ayeke biani kota na yâ fini. A yeke nyen?— A yeke dutingo na mosoro na gbele Nzapa.

Tene na mbi, e lingbi ti duti na mosoro na gbele Nzapa tongana  nyen?— A yeke na salango ye so anzere na bê ti lo. Jésus atene: “Mbi sala ye so amû ngia na Lo lakue.” (Jean 8:29). Tongana e sala ye so Nzapa aye, a yeke nzere na bê ti lo mingi. Tene na mbi fadeso, aye wa mo lingbi ti sala ti nzere na bê ti Nzapa?— Mo lingbi ti diko Bible, ti gue na abungbi, ti sambela Nzapa, na ti mû maboko na azo ti hinga ye na ndo ti lo. So ayeke atâ ye so ayeke kota na yâ fini ti zo.

Ndali ti so Jésus ayeke lani na mosoro na gbele Nzapa, Jéhovah abata lo. Lo mû fini ti lakue lakue na Jésus. Tongana e sala ye tongana Jésus, Jéhovah ayeke ye e na lo yeke bata e nga. Tongaso, zia e duti tongana Jésus me lâ oko pëpe tongana zo ti nginza so agirisa Nzapa so.