Cibalo 16

Ino Ncinzi Ciyandika Kapati?

IBUZUBA bumwi imwaalumi umwi wakaunka kuli Jesu. Wakalizyi kuti Jesu wakali musongo kapati, aboobo wakamwaambila kuti: ‘O Mwiiyi, kondaambilila mwanookwesu kuti andaabile zintu zimwi nzyajisi.’ Imwaalumi ooyo wakali kuyeeya kuti wakeelede kupegwa zintu zimwi zyakajisi mwanookwabo.

Ikuti nowakali Jesu, ino ncinzi ncowakali kunoocita?— Jesu wakabona kuti mwaalumi ooyo wakajisi penzi limwi. Pele ipenzi lini tiilyakali lyakuti nkaambo wakali kuyanda zintu nzyaakajisi mwanookwabo. Ipenzi lyamwaalumi ooyo lyakali lyakuti tanaakazizyi zintu zyakali kuyandika kapati mubuumi.

Atwaayeeyesye makani aaya. Ino ncinzi ceelede kuba cintu ciyandika kapati kulindiswe? Sena nkubaa zyakusobanya zibotu, zisani zipya naa zintu zimbi zili boobo?— Peepe, kuli cimwi ciyandika kwiinda zyoonse eezyi. Eeci nceciiyo ncaakali kuyanda kuyiisya Jesu. Aboobo wakaana kaano kajatikizya muntu wakamuluba Leza. Sena ulayanda kukamvwa kaano aako?—

Imwaalumi ooyu wakalivwubide kapati. Wakalijisi myuunda amatala manji. Izisyango nzyaakasyangide zyakazyala kabotu. Tanaakacijisi busena mumatala aakwe aakuyobweda zyoonse nzyaakatebula. Ino ncinzi ncaakali kunga wacita? Wakalyaambauzya ategwa: ‘Ndaamwaya oonse matala aangu kuti ndiyake aambi mapati kwiinda yaaya. Eelyo ndilayobola zyoonse nzyindatebula alimwi alubono lwangu loonse mumatala aaya mapya.’

 Ooyo muvwubi wakayeeya kuti eeco ncicakali cintu cabusongo ncaakeelede kucita. Wakayeeya kuti wakalicenjede kapati ikuliyobweda zintu zinji. Wakalyaambauzya ulaamba: ‘Ndilijisi zintu zinji alubono lunji-lunji ndundayobola. Ziyoondigwasya kwamyaka minji. Aboobo lino inga ndaliiba. Ndinakwiide kulya, kunywa alimwi akusobana.’ Pele kuli cintu cakalubide mukuyeeya kwamuvwubi ooyo. Sena ulicizyi?— Wakali kuliyeeya buyo lwakwe mwini alimwi akulikkomanisya. Wakamuluba Leza.

Aboobo, Leza wakabandika amwaalumi ooyo muvwubi. Wakati: “Webo omuntu mufuba-fuba! Sunu masiku ngoonya aaya ulafwa. Lino zintu zyoonse eezi nzyooyobola zilaba zyani?” Sena mwaalumi ooyo muvwubi wakali kukonzya kuzibelesya zintu eezyo musyule lyakufwa?— Peepe, muntu uumbi wakali kuyoozibelesya. Jesu wakati: “Oobu mbokubede kulibaabo balilundikila lubono. Tabali bavubi beni-beni kuli Leza.”—Luka 12:13-21, Ci.

Toyandi kuba mbuli mwaalumi ooyo muvwubi, tee kayi?— Imakanze aakwe mapati mubuumi akali aakulijanina lubono. Ooko kwakali kulubizya.  Lyoonse buyo wakali kuyanda zintu zimbi. Pele tanaakali ‘muvwubi mwini-mwini kuli Leza.’

Ibantu banji bali mbuli mwaalumi ooyo muvwubi. Lyoonse bayanda zintu zimbi. Pele eeci cilakonzya kubaletela mapenzi. Mucikozyanyo, tee ulijisi zyakusobanya?— Ino nzyakusobanya nzi zimwi nzyojisi? Kondaambila.— Ino mbuti kuti umwi akati kabeenzinyoko kajisi bbola azidooli zimbi nzyotajisi yebo? Sena inga kacili kabotu ikusinikizya bazyali bako kukuulila cakusobanya mbuli ceeco ncobona kumweenzinyoko?—

Kuli ziindi zimwi eelyo cakusobanya nocikonzya kulibonya kuti cilayandika kapati. Pele, ino ncinzi cicitika kwainda ciindi cili mbocibede?— Cilaleka kuboneka kabotu. Cilakonzya kusomauka akunyonyooka, eelyo tokaciyandi kabili pe. Mubwini, kuli cintu cimwi ncojisi ciyandika kapati kwiinda zyakusobanya. Sena ulicizyi?—

Mbuumi bwako. Ibuumi bwako bulayandika kapati akaambo kakuti, ikuti kotaponi, tokonzyi kucita cintu cili coonse pe. Pele ikutegwa uzumanane kubaa buumi, weelede kucita zintu zimukkomanisya Leza, tee kayi?— Aboobo tutabi mbuli mwaalumi uulya muvwubi mufwubafwuba iwakamuluba Leza.

 Tabali bana balikke ibakonzya kucita zintu zyabufwubafwuba mbuli mwaalumi uulya muvwubi. Nkobali abapati banji ibazicita. Bamwi akati kabo lyoonse buyo bayanda zintu zimbi kwiinda zeezyo nzyobajisi kale. Balakonzya kabajisi zyakulya azyakusama zibazulide aciindi eeco, alimwi balakonzya kabajisi abusena bwakukkala. Pele balayanda azimbi. Bayanda zyakusama zinji. Alimwi bayanda maanda mapati. Zintu eezyi zyuulwa mali manji. Aboobo balabeleka canguzu kutegwa bajane mali manji. Alimwi eelyo nobajana mali manji, azyalo zintu nzyobayanda zilavwula.

Ibapati bamwi bajata bubi kapati mumilimo kutegwa bajane mali manji cakuti banyina ciindi cakuba aamukwasyi wabo. Alimwi banyina ciindi cakubelekela Leza. Sena mali aabo alakonzya kubapa buumi?— Peepe, taakonzyi. Sena balakonzya kwaabelesya mali aabo bafwa?— Peepe. Tabakonzyi pe nkaambo bafwide tabakonzyi kucita cintu cili coonse.—Mukambausi 9:5, 10.

Sena eeci caamba kuti ncibi kubaa mali?— Peepe. Tulakonzya kubelesya mali kuula cakulya azyakusama. Ibbaibbele lyaamba kuti, imali alakwabilila. (Mukambausi 7:12) Pele ikuti katwaayandisya mali, tuyoobaa mapenzi mapati. Tuyooba mbuli mwaalumi uulya muvwubi imufwubafwuba iwakaliyobweda lubono, pele watakali muvwubi mwini-mwini kuli Leza.

Ino caamba nzi kuba muvwubi kuli Leza?— Caamba kubikka Leza mubusena butaanzi mubuumi bwesu. Ibantu bamwi baamba kuti balamusyoma Leza. Bayeeya kuti kwiile kusyoma muli Leza ncecintu ciyandika. Pele, sena balivwubide ncobeni kuli Leza?— Peepe, bali buyo mbuli mwaalumi muvwubi iwakamuluba Leza.

Kunyina Jesu naakabaluba Bausyi bakujulu. Kunyina naakasola kulijanina mali manji. Alimwi kunyina naakajisi lubono pe. Jesu wakalicizyi cakali kuyandika ncobeni mubuumi. Sena ulicizyi eeco cintu?— Nkuba muvwubi kuli Leza.

Kondaambila, mbuti mbotukonzya kuba bavwubi kuli Leza?— Tulakonzya kuba bavwubi kuli Leza kwiinda mukucita zintu zimukkomanisya.  Jesu wakati: ‘Lyoonse ndicita zintu zimubotezya walo.’ (Joni 8:29, Ci) Leza ulakkomana eelyo notucita zintu nzyayanda kuti tucite. Lino kondaambila, ino nzintu nzi nzyonga wacita kutegwa umukkomanisye Leza?— Inzya, ulakonzya kubala Bbaibbele, kuunka kumiswaangano ya Bunakristo, kupaila kuli Leza alimwi akugwasya bamwi kwiiya zintu zijatikizya nguwe. Eezyi ncobeni nzyezintu ziyandika kapati mubuumi.

Akaambo kakuti Jesu wakali muvwubi kuli Leza, Jehova wakamulanganya. Wakapa Jesu bulumbu bwakupona kukabe kutamani. Ikuti katuli mbuli Jesu, Jehova uyootuyanda alimwi akutulanganya. Aboobo atube mbuli Jesu, tutabi mbuli mwaalumi uulya muvwubi iwakamuluba Leza.

Ngaaya aambi magwalo aamu Bbaibbele aatondezya mbotweelede kuzilanga kabotu zintu zyakumubili: Tusimpi 23:4; 28:20; 1 Timoteo 6:6-10; alimwi a Ba-Hebrayo 13:5.

[Cifwanikiso icili apeeji 87]

Ino ndipenzi nzi ndyaakajisi mwaalumi ooyu?

[Cifwanikiso icili apeeji 88]

Ino ncinzi mwaalumi ooyu muvwubi ncaakali kuyeeya?

[Cifwanikiso icili apeeji 89]

Ino ncinzi ncojisi icibotu kapati kwiinda zyakusobanya?

[Zifwanikiso izili apeeji 91]

Ino ncinzi iciyandika kapati ncacita imwana ooyu uuli mucifwanikiso?