ICAMO mono dek tin?— Ingeyo nga ma otedo dek meno?— Oromo bedo ni mamani nyo ngat mukene aye otedo, ento pingo omyero wapwo Lubanga pire?— Pien Lubanga aye miyo cam cek. Ento, omyero wapwo bene ngat ma otedo dek meno nyo ngat ma otoko okelo botwa.

I kare mukene wiwa wil woko me waco ni apwoyo ka jo mukene gutimo jami mabeco piwa, pe kumeno? I kare ma Lapwony Madit-ti onongo tye i lobo, ludobo mogo wigi owil woko me miyo pwoc.

In tika ingeyo dobo?— Man obedo two mo ma camo del kom dano doko bur. I kare ma Yecu kwo i lobo, ludobo onongo gibedo kengi ka mabor ki jo mukene. Dok bene ka onongo ladobo oneno ngat mukene tye ka bino, en myero odange ki dwan malongo me ciko dano-nu pe me bino cok kwede. Onongo kitimo kit man me gengo jo mukene pe me bino cok ki ladobo pien miyo dobo kobo i komgi.

Yecu onongo kica mako adada i kom ludobo. Nino mo acel ma onongo Yecu tye ka cito i Jerucalem, kun wok ki i taun mo matidi. I kare ma en dong cok o i taun meno, ludobo apar gurwatte kwede. Gin onongo guwinyo ni Yecu tye ki teko ma oa ki bot Lubanga me cango kit two ducu.

Ludobo-nu pe gubino cok ki Yecu. Gucung cen ka mabor. Ento gin onongo gitye ki niye ni Yecu romo cangogi. Dong i kare ma ludobo-ni guneno Lapwony Madit-ti, gudange ni: ‘Yecu, Lapwony, konywa ba!’

 In mono kica maki i kom jo ma komgi lit?— Yecu kica omake. En oniang kit ma bedo ladobo lit kwede. Ci en ogamo doggi kun waco ni: “Wucit wunyutte kenwu bot ajwagi [lulamdog] pa Lubanga.”—Luka 17:11-14.

Pingo Yecu owaco ni gutim man? Owaco meno pi cik ma Jehovah omiyo bot Jone ma kwako ludobo. Cik man onongo tito ni lalamdog pa Lubanga myero kong ongi kom ladobo maber. Lalamdog aye onongo waco bot ladobo moni-ni ka ce twone dong ocang woko ducu. Ka kome ocang,  ci en dong romo cako kwo kacel ki jo ma komgi yot kit macon.—Lulevi 13:16, 17.

Ento ludobo magi onongo pud komgi lit. Tika guwoto bot lulamdog  kit ma Yecu owaco botgi-ni?— Ee, guwoto cutcut. Co magi nen calo onongo gitye ki niye ni Yecu romo cango twogi. Ngo ma otimme?

I kare ma pud gitye i yo me wot bot lalamdog-gi, dobogi ocang woko. Ringo komgi odok kakare. Kicangogi woko! Gin gunongo mot pi niyegi i kom teko ma Yecu tye kwede. Cwinygi pud dong obedo yom ya! Ento, ngo ma onongo myero gin dong gutim me miyo pwocgi? Ka nene obed in onongo ibitimo ngo?—

Laco acel i kin jo ma kicangogi-ni odwogo cen bot Yecu. En ocako miyo deyo bot Jehovah, kun pako Lubanga. Meno onongo gin matir me atima pien teko me cango en oa ki bot Lubanga. Laco-ni bene oryebbe piny ka tyen Lapwony Madit ci opwoye. En onongo tye ki pwoc madit atika pi gin ma Yecu otimo.

Ento co abongwen mukene-ni kono? Yecu openyo ni: ‘Kicango ludobo apar, pe kumeno? Jo abongwen mukene-ni kono gitye kwene? Mono laco acel keken aye odwogo cen me miyo deyo bot Lubanga?’

Meno lok ada. Laco acel keken i kin jo apar-ri aye  omiyo deyo, nyo pak bot Lubanga dok bene odwogo cen me pwoyo Yecu. Dok laco-ni onongo obedo Lacamaria, dano mua ki i lobo mukene. Co abongwen mukene ca pe gupwoyo Lubanga, dok bene pe gupwoyo Yecu.—Luka 17:15-19.

In kono ibedo calo laco mene i kin co apar-ri? Wamito ni wabed calo laco Lacamaria ca, pe kumeno?— Dong ka ngat mo otimo gin maber piwa, wiwa myero opo me timo ngo?— Omyero wawacce ni apwoyo. Pol kare dano wigi wil me waco ni apwoyo. Ento obedo gin maber me wacci apwoyo. Ka watimo kit man, ci Lubanga Jehovah gin ki Wode, Yecu cwinygi bedo yom.

Ka itamo pire, wi bipo ni dano dong gutimo jami mapol piri. Me laporre, in tika ma naka yam komi obedo lit?— Oromo bedo ni komi pe obedo lit tutwal calo kom ludobo apar ca, ento oromo bedo ni onongo itye ki aburu marac nyo ii obedo ka mwodde. Ngat mo tika obedo ka gwoko in?— Oromo bedo ni dano-nu omini yat nyo otimo jami mukene piri. Cwinyi mono obedo yom ni dano-nu okonyi me winyo alokaloka?—

Laco ma Lacamaria ca opwoyo Yecu pi cange, dok man omiyo cwiny Yecu obedo yom atika. In mono itamo ni cwiny mamani nyo babani bibedo yom ka iwacci apwoyo pi jami ma gutimo piri?— Cwinygi bibedo yom.

Jo mukene timo jami piri nino ducu nyo cabit ki cabit. Oromo  bedo ni timo jami magi obedo ticgi. Giromo timo jami magi ki yomcwiny. Ento wi romo wil me wacci apwoyo. Lapwonnyi me cukul romo tic matek me pwonyo in. Man obedo ticce. Ento cwinye bedo yom ka ipwoye pi pwonyi.

I kare mukene, dano gitimo jami matinotino piri. Tika ngat mo dong ma naka yam okonyi me tingo ter mo mapek? Nyo ngat mo omiyo boti gin acama i wi meja i kare me cam? Bedo ber me wacci apwoyo kadi pi jami matinotino kit man.

Ka wiwa po me wacci apwoyo bot dano ma i lobo, ci wiwa bipo bene me wacci apwoyo bot Wonwa me polo. Dok watye ki jami mapol ata ma waromo pwoyo Jehovah pigi! En ominiwa kwo ki jami ducu mabeco ma weko kwo bedo yot. Pi meno, watye ki tyen lok mapol me miyo deyo bot Lubanga kun waloko maber i kome nino ducu.