BUSHE wacilya lelo?— Bushe nawishiba abacipekanya ifyo fya kulya?— Napamo banoko e bacipekanya nelyo abantu bambi, lelo mulandu nshi tulingile ukutashisha Lesa pa fya kulya?— Pantu Lesa eulenga ifya kulya ukukula. Lelo, tufwile no kutasha abacipika ifya kulya nelyo abacipekanya.

Inshita shimo tulalaba ukutasha lintu bambi batucitila ifisuma, bushe te ifyo? Lintu Kasambilisha Mukalamba ali pe sonde, kwali aba fibashi bamo abalabile ukutasha.

Bushe walishiba ifyo uwa fibashi aba?— Uwa fibashi muntu uukwete ubulwele beta ifibashi. Ubu bulwele kuti bwalenga ne minofu ya muntu ukulukuta. Lintu Yesu ali pe sonde, aba fibashi baleikala beka. Kabili uwa fibashi nga amona umuntu umbi aleisa, alekabila ukubilikisha ku kusoka ulya muntu ukumutaluka. Ici calecitwa pa kuti abantu tabalepalama no kwambula ubulwele bwa fibashi.

Yesu ali ne cikuuku ku ba fibashi. Bushiku bumo ilyo Yesu aleya ku Yerusalemu, ali no kupita mwi tauni linono. Ilyo apaleme kuli lilye tauni, aba fibashi 10 baishile kuli wene. Balyumfwile ukuti Yesu alikwete amaka yafuma kuli Lesa aya kuposha amalwele yonse.

Aba ba fibashi tabapaleme kuli Yesu. Baiminine apatali. Lelo balisumine ukuti Yesu kuti aposha ifibashi fyabo. E co ilyo aba ba  fibashi bamwene Kasambilisha Mukalamba, babilikishe ati: ‘Mwe Yesu, Kasambilisha, twafweni!’

Bushe ulomfwila uluse abantu abalwele?— Yesu alebomfwila uluse. Alishibe ifyo cabipile ukuba ne fibashi. E co alibaswike no kulanda ati: “Kabiyeni kailangeni kuli bashimapepo.”—Luka 17:11-14.

Mulandu nshi Yesu abebele ukucite ci? Ni pa mulandu we funde pa lwa fibashi ilyo Yehova apeele abantu Bakwe. Ili funde lyalelanda ati shimapepo wa kwa Lesa ali no kumona umubili wa wa fibashi. Shimapepo ali no kweba uwa fibashi nga ca kuti napola. Nga napola, kuti aya mu kwikala na bantu abatuntulu na kabili.—Ubwina Lebi 13:16, 17.

 Lelo aba ba fibashi bali bacili no bulwele bwabo. E co bushe balile kuli shimapepo filya fine Yesu abebele?— Ee, balile, ilyo line. Aba baume bafwile balisumine ukuti Yesu kuti abaposha. Cinshi cacitike?

Ilyo baleya kuli shimapepo, ubulwele bwalibashiile. Umubili wabo walipolele. Baliposhiwe! Balilambwilwe pa kusumina mu maka ya kwa Yesu. Basekelele icine cine! Lelo, nomba, cinshi bali no kucita ku kulanga ukutasha? Aciba ni we nga wacitile cinshi?—

Umo pali aba baposhiwe abwelele kuli Yesu. Atendeke ukulumbanya Yehova, ukulanda ifisuma pali Lesa. Ico cali cintu icisuma ukucita pantu amaka ya kumuposha yafumine kuli Lesa. Uyu muntu afukeme ku makasa ya kwa Kasambilisha Mukalamba no kumutasha. -Alitashishe sana pa fyo Yesu acitile.

Nga balya bambi abaume 9? Yesu aipwishe ati: ‘Bushe aba fibashi abaciposhiwa tabaciba 10? Nga aba bambi 9 bali kwi? Bushe umo fye e wabwela ku kutasha Lesa?’

Ca cine. Ni umo fye pali  aba 10 uwalumbenye Lesa no kubwela ukwisatasha Yesu. Kabili uyu muntu ali mwina Samaria, umuntu wa ku calo cimbi. Aba bambi 9 tabatashishe Lesa, kabili tabatashishe Yesu.—Luka 17:15-19.

Bushe iwe waba nga ani pali aba baume? Tulefwaya ukuba nga ulya mwaume umwina Samaria, bushe te ifyo?— E co lintu umuntu atucitila icisuma, cinshi tufwile ukwibukisha ukucita?— Tufwile ukutasha. Ilingi abantu balalaba ukutasha. Lelo cisuma ukutasha. Lintu twacite co, Yehova Lesa no Mwana wakwe, Yesu, balatemwa.

Nga watontonkanyapo, uli no kwibukisha ukuti abantu balikucitila ifintu ifingi. Ku ca kumwenako, bushe walilwalapo?— Napamo tawalwele nga balya baume ba fibashi 10, lelo nalimo walikwete icifine icibi nelyo mu mala mwalekalipa. Bushe kwali abakutenseshe?— Napamo balikupeele umuti no kukucitila ifintu fimbi. Bushe tawatemenwe ukuti balikwafwile ukupola?—

Ulya mwaume umwina Samaria atashishe Yesu pa kumuposha, kabili ici caletele insansa kuli Yesu. Bushe uletontonkanya ukuti banoko nelyo bawiso bakatemwa nga wabatasha lintu bakucitila ifintu?— Ee, bakatemwa.

Abantu bamo balakucitila ifintu cila bushiku nelyo cila mulungu.  Napamo mulimo wabo ukucite fi fintu. Limbi kuti balatemwa no kucite fi. Lelo pambi kuti walaba ukubatasha. Bakafundisha bobe balabombesha ukukwafwa ukusambilila. Uyu mulimo wabo. Lelo bakatemwa nga wabatasha pa kukwafwa ukusambilila.

Inshita shimo abantu balakucitila utuntu tunono. Bushe balakwiswilako icibi? Nelyo bushe balakutambikako imbale ya fya kulya ilyo mulelya? Cisuma ukutasha na pa tuntu utunono ngo tu.

Nga tuleibukisha ukutasha abantu pe sonde, lyene tukalaibukisha no kutasha Shifwe wa mu muulu. Kabili kwaliba ifintu ifingi ifya kutashishapo Yehova! Atupeele ubumi ne fintu fyonse ifisuma ifiwamya ubumi. E co twalikwata imilandu ya kulumbanishishapo Lesa ukupitila mu kulanda ifisuma pali wene cila bushiku.