Ibuot 18

Nte Afo Emesiti Ndidọhọ Sọsọn̄ọ?

NTE afo ama adia udia mfịn?— Nte afo ọmọfiọk owo emi eketemde enye?— Ekeme ndidi eka fo m̀mê owo efen eketem udia oro, edi ntak emi nnyịn ikpọkọmde Abasi kaban̄a enye?— Koro Abasi edi enye emi anamde udia ọkọri. Nte ededi, nnyịn n̄ko ikpenyene ndikọm owo emi etemde udia oro m̀mê owo emi ọnọde nnyịn.

Ndusụk ini nnyịn imesifre ndidọhọ sọsọn̄ọ ke ini mbon efen ẹfọnde ido ye nnyịn, nte nnyịn isifreke? Ke ini Akwa Andikpep okodude ke isọn̄, ndusụk mbon akpamfia ẹma ẹdu emi ẹkefrede ndidọhọ sọsọn̄ọ.

Nte afo ọmọfiọk se akpamfia ekemede ndinam owo emi ọdọn̄ọde enye?— Udọn̄ọ oro akam ekeme ndinam ubak idem owo owụbede. Ke ini Jesus okodude ke isọn̄, mbon akpamfia ẹkenyene ndidụn̄ nsannsan n̄kpọn̄ mbon efen. Ndien edieke owo akpamfia okokụtde owo efen edide, enye ekenyene ndifiori n̄kpo man ọtọt owo oro okûsan̄a ekpere imọ. Ẹkesinam emi man mbon efen ẹkûnen̄ede ẹsan̄a ẹkpere mmọ sia emi ekemede ndinam akpamfia ebe mmọ.

Jesus ama ọfọn ido etieti ye mbon akpamfia. Usen kiet ke ini enye akade Jerusalem, Jesus ekenyene ndisan̄a mbe ekpri obio kiet. Ke ini enye akasan̄ade ekpere obio oro, mbon akpamfia duop ẹma ẹdi ẹdisobo ye enye. Mmọ ẹma ẹkop ẹte ke Jesus ama enyene odudu otode Abasi ndikọk kpukpru orụk udọn̄ọ.

Mbon akpamfia emi ikasan̄ake ikpere Jesus. Mmọ ẹkeda  nsannsan. Edi mmọ ẹma ẹnịm ke akpanikọ ẹte ke Jesus ekeme ndikọk akpamfia mmimọ. Ntre ke ini mbon akpamfia oro ẹkekụtde Akwa Andikpep, mmọ ẹma ẹfiori ẹkot enye ẹte: ‘Jesus, Andikpep, nyan̄a nnyịn!’

Nte afo emesikop mbọm aban̄a mme owo oro ẹdọn̄ọde?— Jesus ama esikop. Enye ama ọfiọk nte ọdiọkde owo ndidọn̄ọ akpamfia. Ntre enye ama ọbọrọ mmọ ete: “Ẹka ẹkewụt mme oku idem mbufo.”—Luke 17:11-14.

Ntak emi Jesus ọkọdọhọde mmọ ẹnam emi? Ekedi ke ntak ibet emi Jehovah ọkọnọde ikọt Esie aban̄a mbon akpamfia. Ibet emi ọkọdọhọ ete ke oku Abasi ekenyene ndise idem owo akpamfia. Oku ayasian owo akpamfia ini emi udọn̄ọ esie okụrede ofụri ofụri. Ke  ini idem ọsọn̄de enye, enye ekeme ndifiak n̄kodụn̄ ye mbon oro idem ọsọn̄de.—Leviticus 13:16, 17.

Edi mbon akpamfia emi ẹkesụk ẹnyenyene udọn̄ọ mmọ. Ntre ndi mmọ ẹma ẹka ẹbịne oku kpa nte Jesus eketemede mmọ?— Ih, mmọ ẹma ẹka, usọp usọp. Anaedi mme owo emi ẹma ẹnịm ke akpanikọ ẹte ke Jesus ọyọkọk udọn̄ọ mmimọ. Nso iketịbe?

Ọfọn, ke adan̄aemi mmọ ẹkesụk ẹsan̄ade ẹbịne oku, udọn̄ọ mmọ ama okụre. Ikpọkidem mmọ ama akabade ọfọn. Ẹma ẹnam idem ọsọn̄ mmọ! Ẹma ẹnọ mmọ utịp ke ndinyene mbuọtidem ke odudu Jesus. Mmọ ẹkekop idatesịt didie ntem! Edi, idahaemi, nso ke mmọ ẹkpekenam ndiwụt esịtekọm? Nso ke afo akpakanam?—

Kiet ke otu mme owo emi ẹkenamde idem ọsọn̄ ama afiak ebịne Jesus. Enye ama ọtọn̄ọ ndinọ Jehovah ubọn̄, etịn̄de nti ikọ aban̄a Abasi. Oro ekedi nnennen n̄kpọ ndinam koro odudu oro ẹkedade ẹnam idem ọsọn̄ enye okoto Abasi. Owo emi n̄ko ama ọduọ ke ukot Akwa Andikpep onyụn̄ ọkọm enye. Enye ama enen̄ede owụt esịtekọm aban̄a se Jesus akanamde.

Edi nso kaban̄a owo usụkkiet eken? Jesus ama obụp  ete: ‘Nte idịghe mbon akpamfia duop ke ẹkenam idem ọsọn̄? Usụkkiet eken ẹdu m̀mọ̀n̄? Nte owo kiet emi kpọt afiak edi nditoro Abasi?’

Ih, edi akpanikọ. Owo kiet kpọt ke otu owo duop oro ọkọnọ Abasi ubọn̄, m̀mê itoro, onyụn̄ afiak edi ndikọm Jesus. Ndien owo emi ekedi owo Samaria, owo emi okotode idụt efen. Owo usụkkiet eken ikọkọmke Abasi, inyụn̄ ikọmke Jesus.—Luke 17:15-19.

Afo etie nte anie ke otu mme owo oro? Nnyịn iyom nditie nte owo Samaria, nte nnyịn iyomke?— Ntre ke ini owo ọfọnde ido ye nnyịn, nso ke nnyịn ikpeti ndinam?— Nnyịn ikpenyene ndiwụt esịtekọm. Mme owo ẹsiwak ndifre ndidọhọ sọsọn̄ọ. Edi esifọn ndidọhọ sọsọn̄ọ. Ke ini nnyịn inamde emi, Jehovah Abasi ye Eyen esie, Jesus, ẹsinem esịt.

Edieke afo ekerede aban̄a emi, afo eyeti ete ke mme owo ẹnam ediwak n̄kpọ ẹnọ fi. Ke uwụtn̄kpọ, nte akanam afo ọmọdọn̄ọ udọn̄ọ?— Ekeme ndidi akanam afo udọn̄ọke nte mbon akpamfia duop oro, edi ekeme ndidi ama enyene idiọk obufịp m̀mê ubiak idịbi. Nte owo ama ese aban̄a fi?— Ekeme ndidi mmọ ẹma ẹnọ fi ibọk ẹnyụn̄ ẹnam mme n̄kpọ efen ẹnọ fi. Nte afo ama okop inemesịt nte ke mmọ ẹma ẹn̄wam ndinam idem ọsọn̄ fi?—

Owo Samaria oro ama ọkọm Jesus ke ndikanam enye okop nsọn̄idem, ndien emi ama anam Jesus enem esịt. Nte afo emekere ke ete m̀mê eka fo oyokop inemesịt edieke afo ọdọhọde mmọ sọsọn̄ọ ke ini mmọ ẹnamde n̄kpọ ẹnọ fi?— Ih, mmọ ẹyekop inemesịt.

 Ndusụk owo ẹsinam n̄kpọ ẹnọ fi kpukpru usen m̀mê kpukpru urua. Ekeme ndidi utom mmọ edi ndinam mme n̄kpọ emi. Mmọ ẹkeme ndikam n̄kop inemesịt ke ndinam emi. Edi afo emekeme ndifre ndidọhọ sọsọn̄ọ. Andikpep fo ekeme ndinam utom ọkpọsọn̄ man an̄wam fi ekpep n̄kpọ. Utom esie edi oro. Edi enye eyenem esịt edieke afo ọkọmde enye ke ndin̄wam fi ọfiọk n̄kpọ.

Ndusụk ini mme owo ẹsinam ata n̄kpri n̄kpọ ẹnọ fi. Nte akanam owo eberede usụn̄ ọnọ fi? Mîdịghe nte akanam owo ekededi emen udia ke okpokoro udia anyan ọnọ fi? Ọfọn ndikọm owo idem ke n̄kpri n̄kpọ emi.

Edieke nnyịn itide ndikọm mme owo ke isọn̄, do eyedi nnyịn iyeti ndikọm Ete nnyịn emi odude ke heaven. Ndien mme n̄kpọ emi ẹdude ndikọm Jehovah mban̄a ẹwak didie ntem! Enye ọkọnọ nnyịn uwem ye kpukpru nti n̄kpọ oro ẹnamde uwem enem. Ntre nnyịn imenyene kpukpru ntak ndinọ Abasi ubọn̄ ebe ke nditịn̄ nti ikọ mban̄a enye kpukpru usen.

Kaban̄a ediwụt esịtekọm, kot Psalm 92:1; Ephesus 5:20; Colossae 3:17; ye 1 Thessalonica 5:18.

[Ndise ke page 98, 99]

Nso ke Jesus ọdọhọ mbon akpamfia emi ẹnam?

[Ndise ke page 99]

Nso ke owo akpamfia emi eketi ndinam?

[Ndise ke page 100]

Didie ke afo ekeme ndikpebe owo akpamfia emi akafiakde ebịne Jesus?

[Mme ndise ke page 101]

Ntak edide akpan n̄kpọ nditi ndidọhọ sọsọn̄ọ?