O SA kana nikua?— O kila se o cei e vakabutara na kakana?​— De a vakabutara beka o tinamu se dua tani tale, ia na cava eda vakavinavinakataka kina na Kalou?— Baleta ni a vakatubura na kakana oqori na Kalou. Ia, e dodonu meda vakavinavinakataki koya tale ga e vakabutara kei koya e vakarautaka.

So na gauna eda guilecava meda vakavinavinakataki ira na caka vinaka vei keda, se vakaevei? Era sega ni vakavinavinaka e so na vukavuka ena gauna e bula voli kina e vuravura na Qasenivuli Levu.

O kila se cava na vukavuka?— O koya e vukavuka e tauvi koya e dua na mate e rawa ni kania sara ga na viciko ni yago. Ena gauna e bula voli kina e vuravura o Jisu, era dau tu tani na vukavuka. Ke sotava e dua na tamata, ena kacivaka na vukavuka vua me kua ni torovi koya mai. E caka oqo me kua kina ni dua e toro volekati ira de tauvi ira na kedra mate na vukavuka.

E dau lomani ira na vukavuka o Jisu. Ni gole i Jerusalemi o koya ena dua na siga, e curuma e dua na koro lailai. Ni volekata yani na koro, eratou mai tavaki koya e tini na vukavuka. Ratou sa rogoca ni tiko vei Jisu na kaukaua ni Kalou me vakaotia na mate kece ga.

Eratou sega ni torovi Jisu voleka na vukavuka. Eratou tu ga mai vakayawa. Ia eratou vakabauta ni rawa me vakaotia o Jisu na nodratou vukavuka. Ni ratou raica na Qasenivuli Levu, eratou kacivaka mai: ‘I Jisu, Qasenivuli, ni vukei keitou!’

 O dau lomani ira na tauvimate?— O Jisu e dau lomani ira. E kila na nodra rarawa na tauvi vukavuka. Mani tukuna vei iratou na le tini: “Dou lako ka vakaraitaki kemudou vei ira na bete.”​—Luke 17:11-14.

Na cava e vakaroti iratou kina vaka oya o Jisu? Baleta ni vinakati ena lawa e solia o Jiova vei ira na nona tamata me baleti ira na vukavuka. E tukuna na lawa ni dodonu me raica na bete ni Kalou na viciko ni yago i koya e vukavuka. Ena qai tukuna vua na bete ni sa sega ni tauvi vukavuka. Ni sa bula vinaka tale, sa na qai rawa me tiko kei ira na bulabula.​—Vunau ni Soro 13:16, 17.

Ia eratou se tauvi vukavuka tiko ga na le tini. Eratou lako beka  vua na bete me vaka e tukuna vei iratou o Jisu?— Io eratou vakadodonu sara ga vua. Eratou vakabauta ni na vakaotia o Jisu na kedratou mate. Ia na cava e yaco?

Ni ratou se bera ni yaco vua na bete, sa yali na kedratou mate. Sa vinaka tale na viciko ni yagodratou. Eratou sa vakabulai! E vakalougatataki na nodratou vakabauta na kaukaua i Jisu. Sa duatani na nodratou marau! Ia, na cava e dodonu me ratou cakava me ratou vakaraitaka kina na nodratou vakavinavinaka? Na cava o na cakava?​—

E lesu vei Jisu e dua vei iratou. E mai vakacaucautaki Jiova qai vakalagilagi koya tale ga. E dodonu na ka e cakava oya baleta ni vu mai vua na Kalou na kaukaua e vakabulai koya. E tekiduru tale ga vua na Qasenivuli Levu me vakavinavinakataki koya. E vakavinavinakataki Jisu ena ka e cakava.

Ia vakacava o iratou na lewe ciwa? E taroga o Jisu: ‘Dou sega beka ni lewe tini na vakabulai? E vei o iratou na lewe ciwa? E lesu beka ga mai e dua me mai vakalagilagia na Kalou?’

 Io, e vaka kina. E dua ga vei iratou na lewe tini e vakalagilagia se vakacaucautaka na Kalou ni lesu mai me vakavinavinaka vei Jisu. Na turaga oya e kai Samaria, e kai vanua tani. Eratou sega ni vakavinavinakataka na Kalou na kena vo, eratou sega tale ga ni vakavinavinakataki Jisu.​—Luke 17:15-19.

O vakataki cei o iko? Eda vinakata meda vakataki koya na kai Samaria, se vakaevei?— O koya gona, ke dua e cakava vei keda na ka vinaka, na cava meda nanuma meda cakava?— Meda vakavinavinaka. E levu era dau guilecava mera vakavinavinaka. Ia e vinaka meda dau vakavinavinaka, ni rau na marau kina na Kalou o Jiova kei na Luvena, o Jisu.

Ni o vakasamataka, e levu sara na ka vinaka era sa cakava vei iko e so. Me kena ivakaraitaki, o sa bau tauvimate?— De sega ni tauvi iko sara na kedratou mate na tini na vukavuka oya, de tauvi iko beka ga na matetaka se vutu na ketemu. A qaravi iko beka e dua?— De solia na memu wainimate se vukei iko ena so tale na ka. O marautaka beka na nodra vukei iko mo bula vinaka tale?—

E marautaka o Jisu na nona vakavinavinakataki koya na kai Samaria ena gauna sa bula kina. O nanuma ni na marau o tinamu se o tamamu ni o vakavinavinakataka na veika erau cakava ena vukumu?— Io, rau na marau dina.

 So era qaravi iko e veisiga se veimacawa. De nodra itavi ga oya, ra cakava tale ga ena marau. Ia ena rawa mo guilecava ni vakavinavinakataki ira. Kaya mada ni dau cakacaka vakaukaua nomu qasenivuli me vakavulici iko. E nona cakacaka oya. Ia ena marau o koya ke o vakavinavinakataka na nona vakavulici iko.

De caka beka ga vei iko e so na veika lalai. E dolava beka vei iko na katuba e dua? Se dua e tosoya beka vei iko na kakana ena teveli ni kana? E vinaka meda vakavinavinakataka tale ga na veika lalai vaka oya.

Ke da vakavinavinaka vei ira na tamata e vuravura, eda na sega kina ni guilecava meda vakavinavinakataka na Tamada mai lomalagi. E levu sara na ka e rawa nida vakavinavinakataka vei Jiova, ni solia noda bula kei na veika meda marautaka kina na noda bula. Meda vakalagilagia gona na Kalou ena noda tukuna na veika vinaka e baleti koya e veisiga.