¿REKARÚMAPA koestedía?... ¿Mávapa okosina raʼe?... Ikatu oime nde sy térã ótro. Upéicharõ, ¿mbaʼére piko jaagradese vaʼerã Ñandejárape pe tembiʼúre?... Haʼe omongakuaa rupi umi verdúra ha frúta jaʼúva. Péro jaagradese vaʼerã avei umi opreparávape ñane rembiʼurã.

Sapyʼánte ñanderesarái jaagradese vaʼerãha umi ojapóvape ñanderehehápe peteĩ mbaʼe porã. Pe Mboʼehára Guasu oĩrõ guare ko yvy ápe ári, ohecha vaʼekue mbaʼéichapa únos kuánto iléprava hesarái oagradese vaʼerãha chupe.

¿Ndépa reikuaa mbaʼépa pe lépra?... Umi iléprava ipire ñembyaipa ha hoʼo haʼete ku itujupáva. Jesús tiémpope, umi iléprava ndoikói vaʼerã umi hénte hesãiva apytépe, ha oĩramo peteĩ persóna ohóva haʼekuéra oĩha gotyo, oavisa vaʼerã chupe ani hag̃ua oñemboja hendapekuéra. Péicha ojapo vaʼekue hikuái pono oguerova imbaʼasy ótrore.

Jesús otrata porã vaʼekue umi ilépravape. Peteĩ díape, ohokuévo Jerusalénpe ohasa peteĩ puévlorupi, ha oikévo upépe ohug̃uaitĩ chupe diez iléprava. Haʼekuéra oikuaa Ñandejára omeʼẽ hague Jesúspe podér omonguera hag̃ua opaichagua mbaʼasy.

Umi iléprava mombyrymínte opyta Jesúsgui. Péro ojerovia haʼe ikatuha omonguera chupekuéra. Upévare, ohechávo chupe osapukái hikuái: ‘¡Jesús, Mboʼehára, orepytyvõmína!’.

 ¿Ndépa rembyasy umi hasývape?... Jesús oporombyasy vaʼekue avei. Ha oikuaágui umi iléprava oiko asyetereiha, heʼi chupekuéra: “Tapeho pejechauka umi saserdótepe” (Lucas 17:11-14).

¿Mbaʼérepa Jesús heʼi chupekuéra ojapo hag̃ua upéva? Jehová ningo omeʼẽ vaʼekue peteĩ léi heʼíva umi iléprava oho vaʼerãha pe saserdóte rendápe, ohecha hag̃ua oimépa okueráma térãpa nahániri. Ha oimérõ okuera, ikatúma oiko umi hénte hesãiva apytépe (Levítico 13:16, 17).

Péro koʼã iléprava oikuaa ndokueraiha gueteri. ¿Ohónepa lomímonte pe saserdóte rendápe, Jesús heʼi haguéicha chupekuéra?...  Oho, ha pyaʼe voi. Haʼekuéra oguerovia Jesús omonguerataha chupekuéra. ¿Mbaʼépa oiko upe rire?

Tapére okueráma hikuái. Ojerovia rupi Jesús rehe hesãi jey hikuái. ¡Oiménengo ni ndogueroviaséi la oikóva! Péro, ¿mbaʼépa ojapo vaʼerã ohechauka hag̃ua oagradeseha Jesúspe? ¿Mbaʼépa nde rejapo vaʼerãmoʼã?...

Umi okuera vaʼekue apytégui peteĩva oho jey Jesús rendápe ha oñepyrũ omombaʼeguasu Jehovápe. ¿Mbaʼérepa ojapo upéva? Pórke ohechakuaa Ñandejára rupive Jesús omonguera hague chupekuéra. Upéi ko kuimbaʼe oñesũ pe Mboʼehára Guasu renondépe ha oagradese chupe. ¡Ovyʼaiterei ningo okuera haguére!

Péro, ¿mbaʼéiko oikopa umi ótrogui? Jesús oikuaase upéva ha oporandu: ‘¿Noñemonguerái piko raʼe diez kuimbaʼépe? ¿Moõ piko upéicharõ oime umi nueve? ¿Ko kuimbaʼe añoite piko ou jey omombaʼeguasu hag̃ua Ñandejárape?’.

Peteĩva añoite umi diez apytégui ojevy oagradese hag̃ua Jesúspe ha omombaʼeguasu Ñandejárape. Ko kuimbaʼe ningo samaritáno, ndahaʼéi Jesús  retãygua. Umi ótro nueve katu ndoagradeséi Jehová ha Jesúspe (Lucas 17:15-19).

Umi diez apytégui, ¿mávapepa nde rejoguave? Entéronte jajoguase pe samaritánope ¿ajépa?... Upéicharõ, ¿mbaʼépa jajapo vaʼerã oĩramo ojapóva peteĩ mbaʼe porã ñanderehehápe?... Jaagradese vaʼerã chupe. Oĩramo jepe hesaráiva upévagui, ñande lomímonte jaagradese vaʼerã ñambovyʼa hag̃ua Jehová ha Jesúspe.

Oiméne rehechakuaa heta mbaʼe porãma ojejapoha nderehehápe. Eremína chéve, ¿ndépa nderasýmava?... Ikatu nanderasyvaíri umi diez iléprava hasy haguéicha. Péro ikatu oime reñengripa vaíma térã ndepyʼahasy. ¿Oĩpa oñatendéva raʼe nderehe?... Oĩne katuete hoʼukáva ndéve pohã ha oñangarekóva nderehe. ¿Revyʼápa raʼe upévare?...

Pe samaritáno oagradese Jesúspe omonguera haguére chupe, ha upéva ombovyʼa Mboʼehára Guasúpe. Epensamína, ¿ovyʼánepa nde túva ha nde sy reagradeséramo chupekuéra ojapo jave umi mbaʼe porã nderehehápe?... Katuete ovyʼáta.

Oĩ heta hénte nepytyvõva káda día térã káda semána. Ikatu oime upéva itraváho voínte ha ovyʼa ojapo haguére. Upévare ikatu nderesarái reagradese hag̃ua chupekuéra. Por ehémplo,  nde profesóra nemboʼe heta mbaʼe, upéva itraváho ha ojapónte vaʼerã voi. Péro katuete ovyʼáta reagradeséramo chupe nemboʼe haguére.

Sapyʼánte ningo ndahaʼéi tuicha mbaʼe pe ojejapóva ñanderehehápe. Por ehémplo, ¿oĩmapa nepytyvõva regueraha hag̃ua peteĩ mbaʼe ipohýiva? ¿Térã oñembohasámapa ndéve tembiʼu mesápe rekaru hag̃ua? Iporãitéta ningo reagradeséramo avei koʼã mbaʼére ha ani repensa vyroreiha.

Ñanemanduʼáramo jaagradese vaʼerãha ñande rapichakuérape, ifasilvéta ñanemanduʼa hag̃ua jaagradese vaʼerãha Jehovápe. ¡Hetaiterei mbaʼére ikatu jaagradese chupe! Haʼe ningo ñandeapo ha omeʼẽ ñandéve opa mbaʼe ñaikotevẽva jaiko hag̃ua vyʼápe. Upévare, káda día ñañeʼẽ porã vaʼerã Ñandejárare ha péicha ñamombaʼeguasu chupe.