NAKAKAON ka na bala?— Nahibaluan mo bala kon sin-o ang nagluto?— Ayhan si Nanay mo ukon ang iban nga tawo, apang ngaa dapat kita magpasalamat sa Dios?— Bangod ang Dios amo ang nagapatubo sa mga kalan-on. Apang, dapat man naton pasalamatan ang nagluto sang pagkaon ukon ang nagserbe sini sa aton.

Kon kaisa nagakalipat kita nga pasalamatan ang iban nga nagapakita sa aton sing kaayo, indi bala? Sang ang Daku nga Manunudlo yari sa duta, may pila ka aruon nga nalipat sa pagpasalamat sa iya.

Nahibaluan mo bala kon ano ang aruon?— Ang aro isa ka balatian. Mahimo nga maupod ang unod sang tawo nga nagabalatian sini. Sang si Jesus nagakabuhi sa duta, ang mga aruon dapat magpalayo sa iban nga mga tawo. Kag kon makita sang isa ka aruon nga may tawo nga nagapadulong sa iya, dapat sia magsinggit agod paandaman ina nga tawo nga indi magpalapit sa iya. Ginahimo ini agod indi makapalapit ang iban nga mga tawo kay basi malatnan sila.

Mainayuhon gid si Jesus sa mga aruon. Isa ka adlaw sang nagapakadto sia sa Jerusalem, nag-agi si Jesus sa isa ka diutay nga banwa. Sang nagahinampot sia sa banwa, may napulo ka aruon nga nagsugata sa iya. Nabatian nila nga si Jesus may gahom halin sa Dios sa pagpaayo sa tanan nga sahi sang balatian.

Wala magpalapit ang mga aruon kay Jesus. Nagtindog lamang sila sa malayo. Apang nagpati sila nga sarang mapaayo ni Jesus ang ila aro. Gani sang makita sang mga aruon ang Daku nga Manunudlo, nagsinggit sila sa iya: ‘Jesus, Manunudlo, buligi kami!’

 Naluoy ka bala sa mga tawo nga nagamasakit?— Naluoy si Jesus. Nahibaluan niya kon daw ano ka makapasubo nga mangin isa ka aruon. Gani nagsabat sia sa ila kag nagsiling: “Lakat kamo kag magpakita kamo sa mga saserdote.”—Lucas 17:11-14.

Ngaa amo sini ang ginpahimo sa ila ni Jesus? Bangod ini sang sugo nga ginhatag ni Jehova sa Iya katawhan tuhoy sa mga aruon. Ini nga sugo nagasiling nga dapat usisaon sang saserdote sang Dios ang unod sang isa ka aruon. Ang saserdote ang magasiling kon nag-ayo na ang aruon. Kon mag-ayo na sia, mahimo na sia makasimpon liwat sa mga tawo.—Levitico 13:16, 17.

Apang wala pa mag-ayo ining mga aruon. Gani nagkadto bala sila sa saserdote subong sang ginsugo sa ila ni Jesus?— Huo, nagkadto sila gilayon.  Pat-od nga nagpati ini nga mga tawo nga mapaayo ni Jesus ang ila balatian. Ano ang natabo?

Bueno, samtang nagapakadto sila sa saserdote, nag-ayo ang ila balatian. Nag-ayo ang ila unod. Mapagros na sila! Ang ila pagpati sa gahom ni Jesus ginpadyaan. Nalipay gid sila! Apang, ano kuntani ang ila ginhimo agod ipakita ang ila pagpasalamat? Ano ang himuon mo?—

Ang isa sa gin-ayo nga mga tawo nagbalik kay Jesus. Ginhimaya niya kag gindayaw si Jehova. Amo sini ang husto nga himuon bangod ang gahom nga nagpaayo sa iya naghalin sa Dios. Naghapa man ang tawo sa tiilan sang Daku nga Manunudlo kag nagpasalamat sa iya. Nagpasalamat gid sia sa ginhimo ni Jesus.

Apang kamusta ang siam pa ka tawo? Si Jesus namangkot: ‘Napulo ka aruon ang ginpaayo, indi bala? Diin ang siam pa? Isa lamang bala ang nagbalik agod maghimaya sa Dios?’

Huo, matuod ini. Isa lamang sa napulo ang naghimaya, ukon nagdayaw, sa Dios kag nagbalik agod magpasalamat kay Jesus. Kag ini nga tawo isa ka Samaritano, nga taga-iban nga pungsod.  Ang siam pa ka tawo wala magpasalamat sa Dios, kag wala sila magpasalamat kay Jesus.—Lucas 17:15-19.

Sin-o sa sini nga mga tawo ang kaangay mo? Luyag naton mangin kaangay sang Samaritano nga tawo, indi bala?— Gani kon may tawo nga magpakita sa aton sing kaayo, ano ang indi naton dapat kalimtan?— Dapat kita magpasalamat. Ang mga tawo masami nagakalipat sa pagpasalamat. Apang ang pagpasalamat amo ang husto nga himuon. Kon himuon naton ini, mahamuot si Jehova nga Dios kag ang iya Anak nga si Jesus.

Kon hunahunaon mo, madumduman mo nga madamo ang nahimo sang mga tawo para sa imo. Halimbawa, nagmasakit ka na bala?— Mahimo nga indi subong sa napulo ka aruon, apang mahimo nga ginkataro ka ukon nagsakit ang imo tiyan. May nag-atipan bala sa imo?— Ayhan ginhatagan nila ikaw sing bulong kag naghimo sila sing iban pa nga mga butang para sa imo. Nalipay ka bala nga ginbuligan ka nila agod mag-ayo ang imo pamatyag?—

Nagpasalamat ang Samaritano nga tawo kay Jesus bangod ginpaayo sia, kag nalipay si Jesus. Sa banta mo ayhan malipay ang imo iloy ukon amay kon pasalamatan mo sila kon maghimo sila sing mga butang para sa imo?— Huo, malipay sila.

Ang iban nga mga tawo nagahimo sing mga butang para sa imo sa kada adlaw ukon kada semana. Ayhan trabaho nila nga himuon ini. Mahimo nga nalipay pa gani sila sa paghimo sini. Apang mahimo nga  malipat ka sa pagpasalamat sa ila. Mahimo nga nagapangabudlay sing lakas ang imo manunudlo sa eskwelahan agod buligan ka sa pagtuon. Trabaho niya ini. Apang malipay sia kon pasalamatan mo sia sa iya pagbulig sa imo nga makatuon.

Kon kaisa diutay lamang nga mga butang ang ginahimo sang mga tawo para sa imo. May nagbukas bala sang ganhaan para sa imo? Ukon may nagpasa bala sa imo sing pagkaon sa lamesa? Maayo gid nga pasalamatan bisan ining diutay nga mga butang.

Kon wala kita nagakalipat sa pagpasalamat sa mga tawo sa duta, nian mahimo gid nga indi kita malipat sa pagpasalamat sa aton Amay sa langit. Kag madamo gid ang aton mapasalamatan kay Jehova! Ginhatagan niya kita sing kabuhi kag sing tanan nga maayong butang nga nagahimo sang kabuhi nga makalilipay. Gani may rason gid kita nga himayaon ang Dios paagi sa pagdayaw sa iya sa adlaw-adlaw.