KAPU 18

Keti Nge Keyibukaka na Kupesa Mersi?

KETI nge medya bubu?— Keti nge mezaba muntu yina melamba madya yango?— Ziku mama na nge to muntu yankaka, kansi sambu na nki beto fwe pesa Nzambi mersi sambu na yo?— Sambu Nzambi muntu kesalaka nde madya kuyela. Kansi, beto fwe pesa mpi mersi na muntu yina melamba madya yango to yina mepesa beto yo.

Bantangu yankaka beto kevilanaka na kupesa mersi ntangu bankaka kesadilaka beto mambu ya mbote, mpidina ve? Ntangu Longi ya Nene kuvandaka na ntoto, kuvandaka ti bantu ya lepre yina kuvilanaka na kupesa mersi.

Keti nge mezaba kana kuvanda muntu ya lepre ketendula inki?— Muntu ya lepre ke muntu yina kebelaka maladi ya bo kebingaka wazi. Maladi yai le sala nde misuni yankaka ya nitu ya muntu kubwa-bwa. Ntangu Yezu kuvandaka na ntoto, nsiku vandaka kulomba na bantu ya lepre nde bo fwe zinga ntama ti bantu yankaka. Mpi kana muntu ya lepre kumona muntu yankaka kekwisa penepene na yandi, yo vandaka kulomba nde yandi kutuba na ndinga ya ngolo sambu na kukebisa muntu yina na mpila nde yandi kupusana ve na yandi. Bo vandaka kusala mutindu yina sambu bantu yankaka kupusana ve penepene mingi ti bo kana ve bo le baka maladi ya lepre.

Yezu vandaka kuwila mpenza bantu ya lepre mawa. Kilumbu mosi ya yandi vandaka kwenda na Yeruzalemi, yo lombaka nde Yezu kuluta na kabwala mosi. Ntangu yandi kumaka penepene na bwala yina, bantu ya lepre kumi kubasikaka sambu na kukutana ti yandi. Bo waka nsangu nde Yezu vandaka ti ngolo ya Nzambi kupesaka yandi sambu na kubelula bamaladi ya mitindu yonso.

Bantu ya lepre kukwendaka ve penepene na Yezu. Bo telamaka mwa-ntama. Kansi bo vandaka kukwikila nde Yezu tabelula lepre na bo. Yo  yina ntangu bo monaka Longi ya Nene, bo tubilaka yandi na ndinga ya ngolo nde: ‘Yezu, Longi, sadisa beto!’

Keti nge kewilaka bantu ya maladi mawa?— Yezu kuwilaka bo mawa. Yandi zabaka nde kuvanda muntu ya lepre ke mpasi mpenza. Yo yina yandi vutudilaka bo nde: “Beno kwenda kudisonga na banganga-Nzambi.”—Luka 17:11-14.

Sambu na nki Yezu kutubilaka bo na kusala mutindu yina? Sambu na kuzitisa nsiku ya metala bantu ya lepre yina Yehowa kupesaka bantu na Yandi. Nsiku yina vandaka kutuba nde banganga-Nzambi fwe tala mbotembote nitu ya muntu ya lepre. Nganga-Nzambi vandaka kusonga muntu ya lepre ntangu maladi na yandi yonso tabeluka. Kana yandi mebeluka, pana yandi lendaka kuzinga dyaka ti bantu yina ke na mavimpi ya mbote.—Levi 13:16, 17.

 Kansi bantu yai ya lepre kuvandaka kaka na maladi na bo. Ebuna, keti bo kwendaka na nganga-Nzambi mutindu Yezu kutubilaka bo?— Ee, bo kwendaka, na mbala mosi. Yo fwe vanda nde bantu yai kukwikilaka mpenza nde Yezu tabelula maladi na bo. Inki kusalamaka?

Bo kumaka ntete ve na nganga-Nzambi, kansi maladi na bo kubelukaka na nzila. Banitu na bo kubelukaka. Bo kumaka mbote! Bo bakaka lusakumunu na lukwikilu ya bo vandaka na yo na ngolo ya Yezu. Bo waka kyese mingi mpenza! Kansi, ntangu yai, inki bo fwe sala sambu na kusonga ntonda na bo? Kana yo vandaka nge, inki nge zolaka kusala?—

Mosi na kati ya bantu yina kubelukaka kuvutukaka na Yezu. Yandi yantikaka kupesa lukumu na Yehowa, mpi kutuba mambu ya mbote sambu na Nzambi. Yandi salaka kima mosi ya mbote sambu ngolo ya kubelulaka yandi kukatukaka na Nzambi. Muntu yango kufukamaka mpi na makulu ya Longi ya Nene sambu na kupesa yandi mersi. Yandi pesaka mersi mingi mpenza sambu na mambu yina Yezu kusalaka.

Ebuna nki beto le tuba sambu na bantu uvwa yina yankaka? Yezu kuyulaka nde: ‘Si bantu ya lepre yina yonso kumi mebeluka? Kansi wapi bantu yina yankaka uvwa? Sambu na nki mosi mpamba mevutuka sambu na kupesa lukumu na Nzambi?’

 Ee, yo ke ya kyeleka. Na bantu yina yonso kumi, mosi mpamba kupesaka lukumu, to nkembo, na Nzambi mpi kuvutukaka sambu na kupesa Yezu mersi. Muntu yango kuvandaka Musamaria, muntu ya insi yankaka. Bantu uvwa yina yankaka kupesaka ve mersi na Nzambi ti na Yezu.—Luka 17:15-19.

Nge ke bonso nani na kati ya bantu yai? Beto kezola kuvanda bonso Musamaria, mpidina ve?— Yo yina, kana muntu mesala beto mambu ya mbote, inki beto fwe yibukaka na kusala?— Beto fwe pesaka mersi. Mbala mingi bantu kevilanaka na kupesa mersi. Kansi yo kevandaka mbote na kupesa mersi. Ntangu beto kepesaka mersi, Yehowa Nzambi ti Mwana na yandi Yezu kesepelaka.

Kana nge yindula, nge tamona nde bantu mesalaka mambu mingi sambu na nge. Mu mbandu, keti nge mebelaka dezia?— Ziku nge mebelaka ntete ve maladi ya ngolo bonso bantu ya lepre yina kumi, kansi mbala yankaka nge mebelaka dezia kosu-kosu to nge mewaka mpasi na divumu. Keti ke ti muntu kusansaka nge?— Ziku bo pesaka nge mwa bankisi mpi bo sadilaka nge mambu yankaka. Keti nge vandaka na kyese na mutindu bo sadisaka nge na kubeluka?—

Musamaria kupesaka Yezu mersi sambu Yezu kubelulaka yandi, mpi Yezu kuwaka kyese. Keti nge keyindula nde mama to tata na nge tavanda na kyese kana nge kepesa bo mersi ntangu bo kesala mambu sambu na nge?— Ee, bo tavanda na kyese.

Bantu mingi kesadilaka nge mambu mingi konso kilumbu to konso mposo. Ziku bo kesalaka mambu yango sambu yo ke kisalu na bo. Ziku  bo kevandaka nkutu na kyese na kusala yo. Kansi nge le vilana na kupesa bo mersi. Mbala mingi longi na nge ya nzo-nkanda kesalaka yonso sambu na kusadisa nge na kulonguka. Yo ke kisalu na yandi. Kansi yandi tasepela mingi kana nge pesa yandi mersi na mutindu yandi kesadisa nge na kulonguka.

Bantangu yankaka, bantu kesadilaka nge kaka mambu ya fyoti-fyoti. Keti kele ti muntu mekangudilaka nge dezia kyelo ti kusimbila nge yo sambu nge luta? To keti muntu mepesaka nge dezia madya na ntangu beno vandaka kudya na mesa? Yo ke mbote na kupesa mersi ata sambu na bima ya fyoti-fyoti ya mutindu yai.

Kana beto keyibuka na kupesa mersi na bantu yina kele awa na ntoto, pana yo tavanda ve mpasi na kuyibuka kupesa mersi na Tata na beto ya zulu. Nkutu bima ya kupesila Yehowa mersi ke mingi kibeni! Yandi pesaka beto luzingu ti bima yonso ya kitoko yina kekumisaka luzingu kitoko. Ya kyeleka, beto ke na bikuma mingi ya kupesila Nzambi lukumu na ntangu beto ketubila konso kilumbu mambu ya mbote ya metala yandi.

Sambu na yina metala kupesa mersi, tanga Nkunga 92:2; Efezo 5:20; Kolosai 3:17; mpi 1 Tesalonika 5:18.

[Kifwanisu ya kele na lutiti 98, 99]

Yezu kesonga bantu yai ya lepre na kusala inki?

[Kifwanisu ya kele na lutiti 99]

Muntu ya lepre yai kuyibukaka na kusala inki?

[Kifwanisu ya kele na lutiti 100]

Inki mutindu nge le landa mbandu ya muntu ya lepr yai kuvutukaka na Yezu?

[Bifwanisu ya kele na lutiti 101]

Sambu na nki yo ke mfunu na kuyibuka kupesa mersi?