HIHI ũmũthĩ nĩ ũrĩte irio?— Nũũ ũkũrugĩte irio icio?— No gũkorũo nĩ mami wanyu kana mũndũ ũngĩ ũrugire, no nĩ twagĩrĩirũo gũcokeria Ngai ngatho nĩ ũndũ wa irio icio. Nĩ ũĩ nĩkĩ?— Tondũ Ngai nĩwe ũtũmaga irio ikũre. O na kũrĩ ũguo, nĩ twagĩrĩirũo gũcokia ngatho kũrĩ mũndũ ũrĩa ũrugire irio icio, kana ũrĩa ũtwĩkĩrĩire.

Rĩmwe nĩ tũriganagĩrũo nĩ gũcokia ngatho rĩrĩa andũ angĩ matwĩkĩra maũndũ mega, kana tiguo? Rĩrĩa Mũrutani Ũrĩa Mũnene aarĩ gũkũ thĩ, harĩ andũ maarĩ na mangũ maariganĩirũo nĩ gũcokia ngatho.

Wee nĩ ũĩ mangũ nĩ kĩĩ?— Mangũ nĩ mũrimũ ũtũmaga nyama cia mwĩrĩ wa mũndũ citĩke thĩ. Rĩrĩa Jesu aarĩ gũkũ thĩ, andũ arĩa maarĩ na mangũ maikaraga kũraihu na andũ arĩa angĩ. Ningĩ mũndũ wĩ na mangũ angĩonire mũndũ ũngĩ agĩũka na kũrĩa arĩ, aamwĩraga anĩrĩire ndakamũkuhĩrĩrie. Mũndũ ũcio eekaga ũguo tondũ andũ arĩa angĩ mangĩamũkuhĩrĩirie mũno nĩ mangĩagwatirio mũrimũ ũcio.

Jesu nĩ aaiguagĩra andũ arĩa maarĩ na mangũ tha. Mũthenya ũmwe rĩrĩa Jesu aathiaga Jerusalemu, nĩ aahĩtũkĩire gĩcagi-inĩ kĩmwe. Na rĩrĩa aakinyire hakuhĩ na gĩcagi kĩu, hagĩũka andũ ikũmi maarĩ na mangũ meendaga kũmuona. Andũ acio nĩ maaiguĩte atĩ Jesu nĩ aahetwo hinya nĩ Ngai wa kũhonia mĩrimũ ya mĩthemba yothe.

Andũ acio matiakuhĩrĩirie Jesu. Maarũgamire haraihu nake. No nĩ meetĩkĩtie atĩ Jesu nĩ angĩahotire kũmahonia. Kwoguo rĩrĩa  moonire Mũrutani Ũrĩa Mũnene, maanĩrĩire makĩmwĩra ũũ: “Jesu, Mũrutani, tũiguĩre tha!”

Hihi wee nĩ ũiguagĩra andũ arĩa arwaru tha?— Jesu nĩ aamaiguagĩra tha. Nĩ oĩ ruo rũrĩa mũndũ mũrwaru mangũ akoragwo naruo. Kwoguo akĩmeera atĩrĩ: “Thiĩi mũkeyonanie kũrĩ athĩnjĩri-Ngai.”—Luka 17:11-14.

Jesu aameerire meke ũguo nĩkĩ? Nĩ ũndũ wa watho ũrĩa Jehova aaheete andũ ake wĩgiĩ andũ arĩa maarĩ na mangũ. Watho ũcio woigĩte atĩ mũthĩnjĩri-Ngai nĩwe waagĩrĩirũo kũrora nyama cia mwĩrĩ wa mũndũ ũcio. Kwoguo nĩ mũthĩnjĩri-Ngai ũngĩamwĩrire kana nĩ mũhonu. Angĩakorirũo arĩ mũhonu, nĩ eetĩkagĩrio gũikarania na andũ arĩa mataarĩ arwaru.—Maũndũ ma Alawii 13:16, 17.

 No andũ acio maarĩ na mangũ matiahonete. Hihi nĩ maathiire kũrĩ mũthĩnjĩri-Ngai o ta ũrĩa meerĩtwo nĩ Jesu meke?— Ĩĩ, maathiire o hĩndĩ ĩyo. Athuri acio no mũhaka makorũo nĩ meetĩkĩtie biũ atĩ Jesu nĩ ekũmahonia. Hihi gwathiire atĩa?

Maahonire marĩ njĩra-inĩ magĩthiĩ kũrĩ mũthĩnjĩri-Ngai. Nyama cia mĩĩrĩ yao ikĩhona, magĩthirũo nĩ mangũ! Maahonirio nĩ ũndũ wa gwĩtĩkia atĩ Jesu aarĩ na hinya. Nĩ maakenire mũno! No hihi mangĩekire atĩa nĩguo monanie ngatho ciao? Korũo nĩ wee ũngĩekire atĩa?—

Rĩrĩa maahonirio, ũmwe wao nĩ aacokire kũrĩ Jesu. Akĩambĩrĩria kũgooca Jehova akĩaragia maũndũ mega megiĩ Ngai. Eekire ũrĩa kwagĩrĩire tondũ hinya wa kũmũhonia woimĩte kũrĩ Ngai. O na nĩ aaturirie maru mbere ya Mũrutani Ũrĩa Mũnene na akĩmũcokeria ngatho. Nĩ aakenire mũno nĩ ũndũ wa ũrĩa Jesu aamwĩkĩire.

Ĩ nao andũ acio angĩ kenda? Jesu oririe ũũ: ‘Andũ arĩa mahonirio moima ikũmi, githĩ tiguo? Acio angĩ kenda marĩ kũ? Hatirĩ ũngĩ wacoka kũgooca Ngai, tiga o ũyũ ũmwe?’

 Ĩĩ nĩ ma. Harĩ acio ikũmi, no ũmwe tu wagoocire Ngai, na agĩthiĩ gũcokeria Jesu ngatho. Na mũndũ ũcio aarĩ Mũsamaria, mũndũ wa bũrũri ũngĩ. Andũ acio angĩ kenda matiacokeirie Ngai ngatho o na kana Jesu.—Luka 17:15-19.

Harĩ andũ acio-rĩ, wee ũhanaine na ũrĩkũ? Tũngĩenda gũtuĩka ta Mũsamaria ũcio, kana tiguo?— Kwoguo mũndũ angĩtwĩkĩra ũndũ mwega-rĩ, twagĩrĩirũo nĩ gwĩka atĩa?— Nĩ twagĩrĩirũo gũcokia ngatho. Kaingĩ andũ nĩ mariganagĩrũo gũcokia ngatho. No nĩ wega gũcokagia ngatho. Rĩrĩa tweka ũguo, Jehova Ngai na Mũrũwe, Jesu, nĩ makenaga.

Ũngĩrora, no wone atĩ nĩ harĩ maũndũ maingĩ andũ magwĩkĩire. Kwa ngerekano-rĩ, hihi nĩ ũrĩ warwara?— No gũkorũo ndwarwarĩte mũno ta andũ acio ikũmi maarĩ na mangũ, no hihi warĩ na homa kana ũgatuurũo nĩ nda. Hihi nĩ harĩ mũndũ wagũteithirie?— No gũkorũo mũndũ ũcio aakũheire ndawa na agĩgwĩkĩra maũndũ mangĩ. Hihi nĩ wakenire nĩ ũndũ wa gũteithio nginya ũkĩhona?—

Mũsamaria ũcio nĩ aacokeirie Jesu ngatho tondũ wa kũhonio, na ũndũ ũcio ũgĩkenia Jesu. Nĩ ũkuona ta mami wanyu kana baba wanyu mangĩkena ũngĩmacokeria ngatho rĩrĩa magwĩkĩra kaũndũ kega?— Ĩĩ, no makene mũno.

Andũ amwe magwĩkagĩra maũndũ mega o mũthenya kana o kiumia. No gũkorũo nĩo magĩrĩirũo gwĩka maũndũ macio. O na no  makorũo magĩkenera kũmeka. No wahota kũriganĩrũo kũmacokeria ngatho. Mwarimũ wanyu no erutanĩrie mũno gũgũthomithia. Ũcio nĩ wĩra wake. O na kũrĩ ũguo, mwarimũ wanyu no akene mũno ũngĩmũcokeria ngatho nĩ ũndũ wa gũgũthomithia.

Rĩmwe andũ nĩ magwĩkagĩra tũũndũ tũnini. Hihi nĩ ũrĩ wateithio nĩ mũndũ gũkua kĩndũ kĩritũ? Kana ũkĩnengererio irio nĩ mũndũ mũrĩ metha-inĩ? Nĩ wega gũcokia ngatho nĩ ũndũ wa nginya tũũndũ ta tũu tũnini.

Tũngĩririkana gũcokeria andũ ngatho, no ũkorũo ũrĩ ũndũ mũhũthũ kũririkana gũcokeria Ithe witũ ũrĩa ũrĩ igũrũ ngatho. Na twĩna maũndũ maingĩ mũno mangĩtũma tũcokerie Jehova ngatho! Nĩwe ũtũheete muoyo o na indo iria ciothe itũmaga tũkenere gũkorũo tũrĩ muoyo. Kwoguo tũrĩ na itũmi nyingĩ cia kũgooca Ngai na njĩra ya kwaragia maũndũ mega mamwĩgiĩ o mũthenya.