MBELA owa lya nena? —  Mbela ou shi shii kutya olyelye a teleka? —  Otashi dulika omeme woye ile umwe e lili, ndele mbela omolwashike tu na okupandula Kalunga omolwoikulya oyo? — Omolwaashi Kalunga oye he shi ningi tashi shiiva opo tu dule okumona oikulya. Ndele nande ongaho, otu na yo okupandula oo a teleka oikulya ile oo e i tu pa.

Omafimbo amwe ohatu dimbwa okuyandja olupandu ngeenge vamwe ve tu ningila ouwa. Eshi Omuhongi Munene a li kombada yedu, opa li ovanashilundu vamwe ovo va li va dimbwa oku mu pandula.

Mbela ou shi shii kutya omunashilundu oshike? —  Omunashilundu omunhu oo e na oudu oo hau ifanwa oshilundu. Oudu oo ohau ningifa eenhumba dimwe domunhu di we ko kolutu. Eshi Jesus a li kombada yedu, ovanashilundu ova li have likalekelwa kokule novanhu vakwao. Ngeenge omunashilundu a mono omunhu ta ehene popepi naye, okwa li he mu ingida noku mu londwela opo aha ehene popepi naye. Omunashilundu okwa li ha londwele ovanhu vakwao opo vaha kwatwe koudu oo.

Jesus okwa li ha file onghenda ovanashilundu. Efiku limwe, fimbo Jesus a li ta i kuJerusalem, okwa li a enda mokalando kamwe. Eshi a li a ehena popepi nokalando oko, okwa li a shakenekwa kovanashilundu omulongo. Ova li va uda kutya Jesus okwa pewa eenghono kuKalunga opo a dule okuvelula omikifi doludi keshe.

Ovanashilundu ovo kava li va ehena popepi naJesus. Ndele ova li va itavela kutya Jesus ota dulu oku va velula. Onghee hano, eshi va li va mona Omuhongi oo Munene, ova li ve mu ingida tava ti: ‘Jesus, omuhongi, tu kwafela!’

 Mbela oho kala wa etela onghenda ovanhu ovo tava vele? —  Jesus okwa li he va etele onghenda. Okwa li e shi shii kutya oshinyikifa oluhodi okukala noudu woshilundu. Onghee hano, okwa li e va nyamukula a ti: ‘Indeni mu ke liulike kovapristeri.’ — Lukas 17:11-14.

Mbela omolwashike Jesus a li e va lombwela va ninge ngaho? Okwa li e va lombwela ngaho, omolwomhango i na sha novanashilundu oyo Jehova a li a yandja koshiwana shaYe. Omhango oyo oya li ya tya kutya omupristeri waKalunga okwa li e na okutala nawa olutu lomunashilundu. Omupristeri oye kwa li ha lombwele omunashilundu kutya okwa veluka filufilu. Omunashilundu okwa li vali ta ka dula okukala novanhu ovo itava vele ngeenge a veluka. — Leviticus 13:16, 17.

Ndele ovanashilundu ovo kava li va veluka natango. Mbela okwa li  va ya komupristeri ngaashi Jesus a li e va lombwela? —  Heeno, osho va li va ninga pefimbo opo tuu opo. Ovalumenhu ovo ova li va itavela kutya Jesus ota dulu oku va velula. Mbela oshike sha li sha ningwa po?

Ofimbo va li mondjila va yuka komupristeri, ohaluka ova li va veluka. Ova li va veluka, molwaashi ova li ve na eitavelo meenghono daJesus dokuvelula. Kava li tuu va hafa! Ndele mbela oshike osho va li ve na okuninga opo va ulike olupandu lavo? Mbela ngeno okwa li oove, ngeno owa ninga po shike? — 

Omulumenhu umwe womwaavo va li va velulwa okwa li a alukila kuJesus. Okwa li a hovela okuhambelela Jehova, nokupopya oinima iwa kombinga yaye. Osho osha li oshinima sha yuka kuye okuninga, molwaashi eenghono odo da li de mu velula oda li da dja kuKalunga. Omulumenhu oo okwa li yo a twa eengolo peemhadi dOmuhongi Munene ndele te mu pandula. Okwa li a pandula neenghono osho Jesus a li e mu ningila.

Ndele mbela ongahelipi kombinga yovalumenhu vakwao omuwoi? Jesus okwa li a pula a ti: ‘Opa li ovanashilundu omulongo ovo va velulwa, venya omuwoi ove li peni? Umwe aeke mbela oye a aluka a hambelele Kalunga?’

Heeno, umwe aeke womwaavo omulongo a li a aluka a  hambelele Kalunga, noku pandule Jesus. Omulumenhu oo okwa li Omusamaria, oo a li a dja koshilongo shimwe. Ovalumenhu vakwao venya omuwoi kava li va pandula Kalunga, nokava li va pandula Jesus. — Lukas 17:15-19.

Mbela owa hala okukala wa fa ovalumenhu venya omuwoi ile omulumenhu Omusamaria? —  Ngeenge twa ningilwa sha shiwa kuumwe, otu na okudimbuluka okuninga shike mbela? —  Otu na oku mu pandula. Ovanhu ohava dimbwa luhapu okuyandja olupandu. Ndele oshiwa okukala hatu pandula vamwe. Ngeenge hatu shi ningi, Jehova Kalunga nosho yo Omona waye, Jesus, otava ka kala va hafa.

Ngeenge owa diladila kombinga yaasho, oto ka dimbuluka kutya ovanhu ove ku ningila oinima iwa ihapu. Pashihopaenenwa, mbela owa yahamene efiku limwe? —  Otashi dulika ku yahamene ngaashi ovanashilundu venya omulongo, ndele otashi dulika kwa li wa kwatwa keshikisha ile wa li to vele medimo. Mbela owa li wa filwa oshisho kuumwe? —  Otashi dulika a li e ku pa omiti donhumba ile a li e ku ningila oinima imwe i lili. Mbela owa li wa hafa eshi a li e ku kwafela opo u veluke? — 

Omulumenhu Omusamaria okwa li a pandula Jesus eshi a li e mu velula, naasho osha li sha hafifa Jesus. Mbela oto diladila kutya meme woye natate woye otava ka kala va hafa ngeenge owe va pandula omolwoinima oyo have ku ningile? —  Heeno, otava ka kala va hafa.

Ovanhu vamwe ohave ku ningile oinima yonhumba efiku keshe ile oshivike keshe. Otashi dulika oyo oilonga yavo, notashi dulika hava kala  va hafa oku i longa. Ndele otashi dulika u dimbwe oku va pandula. Omuhongi woye kofikola otashi dulika a longe noudiinini opo e ku kwafele mokulihonga kwoye. Oyo oyo oilonga yaye, ndelenee ota ka kala a hafa ngeenge owe mu pandula eshi te ku kwafele u lihonge.

Omafimbo amwe otashi dulika ovanhu ve ku ningile oinima inini. Mbela owa yeululilwa ngoo nale omuvelo kuumwe opo u pite po? Ile ope na umwe oo he ku tukulile oikulya? Osha yuka okukala hatu pandula vamwe nonande ove tu ningila ashike oinima inini.

Ngeenge ohatu dimbuluka okuyandja olupandu kovanhu ovo ve li kombada yedu, ohatu ka dula okudimbuluka okuyandja olupandu kuTate yetu womeulu. Ope na oinima ihapu neenghono oyo hatu dulu okuyandjela Jehova olupandu. Jehova okwe tu pa omwenyo noinima aishe iwa oyo hai ningifa onghalamwenyo i kale ihafifa. Onghee hano, otu na omatomheno mahapu okuhambelela Kalunga mokupopya oinima iwa kombinga yaye efiku keshe.