Kauhanyo 18

Kana Wa Hupulanga Ku Itumela?

KANA u cile sico kacenu?— Kana wa ba ziba ba ba si lukisize?— Mwendi ki bom’aho kamba yo muñwi cwalo, kono ki kabakalañi ha lu lukela ku itumela ku Mulimu bakeñisa sona?— Kakuli Mulimu ki yena ya konisa lico ku mela. Kono hape lu lukela ku itumela ku yena ya lukisize sico kamba yena ya lu tomezi sona fa tafule.

Fokuñwi lwa libalanga ku itumela ku ba bañwi ha ba lu ezeza lika ze nde, nji cwañi? Muluti yo Mutuna ha n’a li fa lifasi, ne ku na ni be ne ba kula mbingwa be ne ba libezi ku itumela.

Kana butuku bwa mbingwa wa bu ziba?— Butuku bwa mbingwa ki butuku bo bu kona ku tahisa kuli nama ya mutu i we fa mubili wa hae. Jesu ha n’a pila fa lifasi, ba mbingwa ne ba na ni ku pila kwahule-hule ni batu ba ba iketile. Mi wa mbingwa ha n’a ka bona mutu ya iketile a taha, n’a na ni ku huwa ni ku zibisa mutu y’o kuli a mu kekuluhe. Ne ku eziwa cwalo ilikuli batu ba bañwi ba si ke ba ba bukaufi hahulu ni wa mbingwa ni ku yambula butuku b’o.

Jesu n’a li ya musa hahulu ku ba mbingwa. Zazi le liñwi ha n’a ya kwa Jerusalema, Jesu n’a na ni ku fita mwa munzinyana o muñwi. Ha n’a li bukaufi ni munzinyana w’o, ba mbingwa ba 10 ba taha ku t’o mu bona. Ne ba utwile kuli Jesu n’a na ni m’ata a’ zwa ku Mulimu a ku folisa matuku a mifuta kaufela.

Ba mbingwa bao ne ba si ka sutelela ku Jesu. Ne ba yemi kwahule. Kono ne ba lumela kuli Jesu n’a kona ku folisa mbingwa ya bona.  Kacwalo, ba mbingwa bao ha se ba boni Muluti yo Mutuna, ba huweleza ku yena, ba li: ‘Jesu, Muluti, ha ku lu tuse!’

Kana wa utwelanga butuku batu ba ba kula?— Jesu n’a ba utwelanga butuku. N’a ziba kuli ku kula mbingwa ku butuku hahulu. Kacwalo, a ba alaba a li: “Mu y’o iponisa kwa baprisita.”—Luka 17:11-14.

Ki kabakalañi Jesu ha n’a ba bulelezi ku eza cwalo? N’e li ka libaka la mulao w’o Jehova n’a file batu ba Hae ka za ba mbingwa. Mulao w’o n’o bulela kuli muprisita wa Mulimu n’a na ni ku tatuba nama ya wa mbingwa. Muprisita y’o n’a ka bulelela wa mbingwa y’o fo ne bu ka folelela butuku bwa hae kaufela. Ha n’a ka fola, n’a kona ku pila hape ni batu ba ba iketile.—Livitike 13:16, 17.

Kono ba mbingwa bao ne ba sa na ni butuku bwa bona. Kacwalo,  kana ne ba ile ku muprisita ka mwa n’a ba bulelezi Jesu?— Ee ne ba ile, mi ne ba ile honaf’o. Banna bao ba lukela ku ba be ne ba lumezi kuli Jesu n’a kona ku folisa butuku bwa bona. Ne ku ezaheziñi?

Ha ne ba sa li mwa nzila ku liba ku muprisita, butuku bwa bona bwa fela. Nama ya bona ya fola. Ba iketa! Ku lumela kwa bona kuli Jesu n’a kona ku ba folisa ne ku tahisize kuli ba fole. Ki tabo kwa butuna ye ne ba bile ni yona! Kono cwale, ne ba lukela ku ezañi kuli ba bonise buitebuho bwa bona? N’o ka ezañi wena?—

Yo muñwi kwa banna be ne ba folisizwe bao a kutela ku Jesu. A kalisa ku lumbeka Jehova, ili ku bulela lika ze nde ka za Mulimu. Yeo n’e li nto ye nde ya ku eza kakuli m’ata a ku mu folisa n’a zwa ku Mulimu. Munna y’o hape a t’o kubama kwa mahutu a Muluti yo Mutuna ni ku itumela ku yena. N’a itumezi hahulu bakeñisa za n’a mu ezelize Jesu.

Kono ku cwañi ka za banna ba bañwi ba 9? Jesu a buza kuli: ‘Ki ba 10 be ne ba kula mbingwa ba ba folisizwe, nji cwañi? Ba 9 ba bañwi ba kai? Kana ki a li muñwi fela ya kutile ku t’o fa tumbo ku Mulimu?’

Ee, ki niti. Ki a li muñwi fela ku ba 10 ya n’a file tumbo ku  Mulimu, mi n’a kutile ku t’o itumela ku Jesu. Mi mutu y’o n’a li Musamaria, mutu wa mwa naha i sili. Ba 9 ba bañwi ne ba si ka itumela ku Mulimu, mi ne ba si ka itumela ni ku Jesu.—Luka 17:15-19.

Ki ufi kwa banna bao y’o swana ni yena? Lu bata ku ba sina munna wa Musamaria, nji cwañi?— Kacwalo, mutu yo muñwi h’a lu ezeza nto ye ñwi ye sishemo, ki nto mañi ye lu lukela ku hupula ku eza?— Lu lukela ku itumela. Batu hañata ba libalanga ku itumela. Kono ku itumela ki ko kunde. Ha lu eza cwalo, Jehova Mulimu ni Mwan’a hae, yena Jesu, ba taba.

Ha u nahana ka za teñi, u ka hupula kuli batu ba ku ezelize lika ze ñata. Ka mutala, kana u kile wa kula nako ye ñwi?— Mwendi butuku bwa hao n’e si bo butuna hahulu inge bwa banna ba 10 bao ba mbingwa, kono mwendi n’o kula libelenge kamba ku nyapa mwa mba. Kana ku na ni ya n’a ku babalezi?— Mwendi ne ba ku file mulyani ni ku ku ezeza lika ze ñwi. Kana n’o tabezi kuli ne ba ku tusize kuli u fole?—

Munna wa Musamaria y’o n’a itumezi ku Jesu kakuli n’a mu folisize, mi Jesu n’a ikutwile hande. Kana u ikutwa kuli bondat’aho kamba bom’aho ba ka taba ha u itumela ku bona ha ba ku ezeza lika ze ñwi?— Ee, ba ka taba.

Batu ba bañwi ba ku ezezanga lika ka zazi kamba ka viki. Mwendi  ku eza lika zeo ki musebezi wa bona. Mwendi mane ba kona ku li eza ka tabo. Kono mwendi wa libalanga ku itumela ku bona. Mwendi bo muluti ba hao ba sebeza ka t’ata kuli ba ku tuse ku ituta. W’o ki musebezi wa bona. Kono ba ka taba ha u itumela ku bona kabakala kuli ba ku tusa ku ituta.

Fokuñwi, batu ba ku ezezanga lika ze nyinyani fela. Kana yo muñwi wa ku kwalulelanga sikwalo? Kamba ha mu ca, kana ku na ni ya ku tambekanga lico? Ki ko kunde ku itumela niheba kwa likezo ze nyinyani zeo.

Haiba lu hupula ku itumela kwa batu ba fa lifasi, u zibe he lu lukela ku hupula hahulu-hulu ku itumela ku Ndat’a luna wa kwa lihalimu. Mi ku na ni lika ze ñata ze lu lukela ku itumela ku Jehova! U lu file bupilo ni lika ze nde ze tahisa kuli bupilo bu be bo bu tabisa. Kacwalo, lwa swanela luli ku fa tumbo ku Mulimu ka ku bulela lika ze nde ka za hae ka zazi ni zazi.

Ka za lipulelo za buitumelo, u bale Samu 92:1; Maefese 5:20; Makolose 3:17; ni 1 Matesalonika 5:18.

[Siswaniso se si fa likepe 98]

Jesu u bulelela ba mbingwa ba ku ezañi?

[Siswaniso se si fa likepe 99]

Wa mbingwa y’o n’a hupuzi ku ezañi?

[Siswaniso se si fa likepe 100]

U kona ku likanyisa cwañi wa mbingwa ya n’a kutile ku Jesu?

[Maswaniso a fa likepe 101]

Ki kabakalañi ha ku li kwa butokwa ku itumela?