LE WADI ubadi bidibwa dyalelo?—Lelo uyukile watekanga’byo?—Padi i inobe nansha muntu mukwabo, ino le i kika kine kyotufwijija Leza pa mwanda wa bidibwa?—Mwanda Leza ye utamijanga bidibwa. Inoko, tufwaninwe kadi kufwija’ko yewa watekanga bidibwa nansha yewa wetupanga’byo.

Byaba bikwabo twilwanga kufwija’ko boba betulongela biyampe, mwene i amo? Pādi Mufundiji Mukatampe pano pa ntanda, kwādi bamakopo bamo bāidilwe’ko kumufwija’ko.

Lelo uyukile mwikadilanga wamakopo?—Wamakopo i muntu ubela luba lwitwa bu makopo. Luno luba lubwanya’nka ne kuketa mwita wa ku ngitu ya muntu wataluka’ko. Pādi Yesu pano pa ntanda, bamakopo bādi betolwela kulampe na bantu bakwabo. Kadi shi wamakopo wamone muntu wiya, wādi udyumuna muntu’wa ekale kulampe nandi. Kino kyādi kikwasha bantu bakwabo kutyina amba bakafwena pabwīpi mpata ne kusambukilwa na luba lwa makopo.

Yesu aye wādi biyampe na bamakopo. Difuku dimo paādi wenda ku Yelusalema, Yesu wāpityile ku kakibundi kamo katyetye. Paāfwenene ku kakibundi’ka, bamakopo dikumi bāiya kumusambakana. Bāivwene amba Yesu udi na bukomo bwa Leza bwa kundapa nabo mbá ya miswelo yonso.

Bamakopo kebāfwenenepo Yesu pabwīpi. Bāimanine kulampe mpata. Inoko bādi bakulupile amba Yesu ubwanya kwibapwa makopo abo. O mwanda pobāmwene Mufundiji Mukatampe, bāmwelele lubila’mba: ‘Abe Yesu, Mufundiji, witukwashe’ko!’

 Lelo ukwatyilwanga bantu babela bulanda?—Yesu wādi wibakwatyilwa’bo. Wādi uyukile amba i kya bulanda kwikala wamakopo. O mwanda wēbalondolwele amba: ‘Endai mukēlombole kudi babitobo.’—Luka 17:11-14.

Mwanda waka Yesu wēbalombwele balonge namino? I pa mwanda wa kijila Yehova kyaāpele bantu bandi kitala bamakopo. Kino kijila kyādi kinena amba kitobo wa Leza wādi ujingulula misunya ya wamakopo. Kitobo ye wādi ukokeja kusapwila wamakopo shi luba lwandi lonso lubapu. Shi wakoma biyampe, wādi wiya kushikata monka pamo na bantu bakomo.—Levi 13:16, 17.

Inoko bano bamakopo bādi bakidi na luba lwabo. Le penepa bāendele kudi kitobo monka mwēbasapwidile Yesu’mwa?—I amo,  bāendele’nka ponka’pa. Bano bana-balume bādi bakulupile amba Yesu ubwanya kundapa luba lwabo. Le byāpityile namani?

I namino, pobādi bakyenda kudi kitobo, luba lwabo lwēbapwila mu dishinda. Misunya yabo yāikala biyampe. Bine, bākomene kebadi biyampe! Lwitabijo lwabo mu bukomo bwa Yesu lwēbapadilwe mpalo. Bine, bāivwene nsangaji mpata! Ino pano, le bādi ba kulonga bika mwanda wa kulombola kufwija’ko kwabo? Shi wādi abe, wāswele kulonga’po namani?—

Umo wa mu boba bāundapilwe’ba wājokēle kudi Yesu. Wāshilula kutumbija Yehova ntumbo, kanenena Leza maya. Kino kyaālongele kyādi kiyampe mwanda bukomo bwa kundapa bwāile kudi Leza. Kadi uno muntu wāponena ku maulu a Mufundiji Mukatampe kamufwija’ko. Wādi muyulwe mutyima wa kufwija’ko mpata pa byonso byālongele Yesu.

Lelo bana-balume bakwabo kitema’ba nabo? Yesu wāipangwile amba: ‘Mwene bamakopo bapwibwa badi dikumi? Le bakwabo kitema badi kwepi le? Lelo i enka umo wajoka kutumbija Leza ntumbo?’

Eyo, i amo. I enka umo kete wa mu boba bantu dikumi  wātumbije Leza ntumbo, ne kwiya kufwija’ko Yesu. Kadi uno muntu wādi mwine Samadia, muntu wa ntanda ingi. Boba bakwabo kitema kebāfwijije’kopo Leza, kadi kebāfwijije’kopo ne Yesu mwine.—Luka 17:15-19.

Le abe wifwene’po wepi pa bano bantu? Tusakanga kwifwana mwine Samadia’wa, mwene i amo?—Penepo shi muntu wetulongela kintu kiyampe, lelo tufwaninwe kuvuluka kulonga kika?—Tufwaninwe kumufwija’ko. Pavule pene bantu belwanga kufwija’ko. Inoko i biyampe kufwija’ko. Shi tufwija’ko, Yehova Leza ne wandi mwana Yesu basepelelanga.

Shi ulange’tu biyampe, usa kuvuluka amba bantu ke bakulongele bintu biyampe bivule. Kimfwa, lelo ubelanga kyaba kimokimo?—Padi kwabelele kashā pamo bwa bano bamakopo dikumi, inoko padi kodi mukwatwe na kipwiji nansha kusumwa munda. Lelo kekwadipo muntu wadi ukukwatakanyanga?—Padi badi bakupa lawa nansha bwanga kampanda ne kukulongela bintu bikwabo. Mwene wadi usangala pobadi bakukwasha amba wivwane biyampe?—

Mwine Samadia wāfwijije’ko Yesu mwanda wāmubelwile, ne kino kyāsangeje Yesu. Lelo ulanga amba inobe ne shobe nabo bakasangala shi wibafwija’ko kitatyi kyobakulongela bya kukulongela?—Bine, bakasangala.

 Bantu bamo bakulongelanga bintu difuku ne difuku nansha yenga ne yenga. Padi yo mingilo yabo yobengila. Bakokeja kwingila’yo na nsangaji. Inoko ukokeja kwilwa kwibafwija’ko. Mwadimu wenu wingilanga bininge mwanda wa kwimufundija. Ao shao o wandi mwingilo. Inoko ukasangala shi umufwija’ko pa mwanda wa byaemufundija.

Byaba bikwabo bantu bakulongelanga tubintu tutyetutye. Le kudi muntu kemukushitwile mulango ne kukukwatyila’o amba utwele? Lelo kebakutambikile byakudya ku meza pa kudya? I kiyampe kunena amba wafwa’ko nansha ke ku tubintu tutyetutye namino.

Shi tuvuluka kufwija’ko bantu ba pano panshi, nankyo tukavuluka nyeke kufwija’ko Tata wetu wa mūlu. Bine, bintu bya kufwijija’ko Yehova i bingi kashā! Witupele būmi ne bintu byonso biyampe bisangaja umbūmi. Nanshi tudi na bubinga bonso bwa kutumbijija Leza ntumbo na kumunenena maya difuku ne difuku.