UVUAKU mudie biakudia lelu’eu anyi?​— Udiku mumanye muntu uvua mubilambe anyi?​— Pamuapa mamuebe anyi muntu mukuabu ke uvua mubilambe, kadi bua tshinyi tudi ne bua kuela Nzambi tuasakidila bua biakudia?​— Bualu Nzambi ke udi umenesha biakudia. Kadi, tudi kabidi ne bua kuela muntu udi mulambe biakudia tuasakidila peshi muntu udi mutupeshebi.

Misangu mikuabu tutu tupua muoyo bua kuela tuasakidila padi bantu bakuabu batuenzela malu mimpe, ki mmuomu anyi? Pavua Mulongeshi Munene panu pa buloba, kuvua bamue bena nsudi bakapua muoyo bua kuela tuasakidila.

Udi mumanye muena nsudi ne nganyi?​— Muena nsudi mmuntu udi usama disama dia nsudi. Disama edi ditu nansha mua kutula ne kumatshisha bimue bitupa bia misunyi ya pambidi pa muntu. Tshikondo tshivua Yezu panu pa buloba, bena nsudi bavua ne bua kusombela miaba ivua kule ne bantu bakuabu. Nenku pavua muena nsudi umona muntu mukuabu wenda ulua kudiye, uvua ne bua kuela lubila bua kumanyisha muntu au bua kuimanyina kule nende. Bavua benza nanku bua bantu bakuabu kabasemenyi pabuipi nabu bualu disama adi divua mua kubambulukila.

Yezu wakaleja bena nsudi muoyo muimpe be! Dimue dituku pavuaye uya ku Yelushalema, Yezu uvua ne bua kupitshila mu kasoko kakuabu. Pakafikaye pabuipi ne kasoko aku, bena nsudi dikumi bakapatuka bua kumonangana nende. Bavua bumvue lumu ne: Yezu uvua ne bukole buvua Nzambi mumupeshe bua kuondopa masama a mishindu yonso.

Bena nsudi abu kabakasemena pabuipi ne Yezu to. Bakimanyina pa bule. Kadi bavua bitabuja ne: Yezu uvua mua kujikija nsudi yabu.  Nanku pavua bena nsudi bamone Mulongeshi Munene, bakela lubila ne: ‘Yezu, Mulongeshi, utuambuluishe!’

Utu umvuila bantu badi basama luse anyi?​— Yezu uvua ubumvuila luse lua bungi. Uvua mumanye muvuabi bitonda muntu pavuaye ne nsudi. Nunku wakabandamuna ne: ‘Ndayi nudimueneshe kudi bakuidi ba Nzambi.’​—Luka 17:11-14.

Bua tshinyi Yezu uvua mubambile bua kuenzabu nanku? Bivua bua kunemeka mikenji ivua Yehowa mupeshe bantu Bende ivua itangila bena nsudi. Mikenji ayi ivua yamba ne: muakuidi wa Nzambi uvua ne bua kukenketa bimpe mubidi wa muena nsudi. Muakuidi uvua mua kuambila muena nsudi padiye umona ne: disama diende dionso diajiki. Pavuaye umvua bimpe, muntu uvua ne nsudi au uvua mua kusomba kabidi ne bantu bavua buobu bimpe.​—Lewitiki 13:16, 17.

 Kadi bena nsudi aba batshivua buobu ne disama pambidi. Nunku bakayaku kudi muakuidi anu muvua Yezu mubambile anyi?​— Eyowa, kabakajingakana to, bakaya. Bantu abu bavua ne tshia kuikala bitabe ne: Yezu uvua mua kujikija disama diabu. Ntshinyi tshiakenzeka?

Pavuabu benda baya batangile kuvua muakuidi, disama diabu diakajika. Mibidi yabu yakalua bimpe. Bakumvua bimpe! Ditabuja divuabu nadi kudi Yezu diakafutshibua. Ndisanka kayipu diakumvuabu! Kadi mpindieu, ntshinyi tshivuabu mua kuenza bua kuleja dianyisha? Wewe uvua mua kuenza tshinyi?​—

Umue wa ku bantu aba bavuabu buondope wakapingana kudi Yezu. Wakatuadija kutumbisha Yehowa, wamba mêyi a ditumbisha nau Nzambi. Ebu ke buvua bualu buakane bua kuenza bualu bukole bua kumuondopa nabu buvua bufumine kudi Nzambi. Muntu au wakatua binu ku makasa a Mulongeshi Munene e kumuela tuasakidila. Uvua ne dianyisha dia bungi be bua tshivua Yezu muenze atshi.

Kadi bantu bakuabu tshitema abu bavua kuepi? Yezu wakebeja ne: ‘Kuvua bena nsudi dikumi bavua bumvue bimpe, ki mmuomu anyi? Bakuabu tshitema badi penyi? Anu umue patupu ke udi mupingane bua kutumbisha Nzambi anyi?’

 Eyowa, mbualu bulelela. Anu umue wa ku bantu dikumi abu ke wakatumbisha Nzambi ne kupinganaye bua kuela Yezu tuasakidila. Kabidi muntu au uvua muena Samalea, muntu wa mu ditunga dikuabu. Bantu bakuabu tshitema abu kabakela Nzambi tuasakidila to, ne kabakela Yezu tuasakidila.​—Luka 17:15-19.

Wewe udi mufuane nganyi ku bantu dikumi abu? Tudi basue kufuana muena Samalea, ki mmuomu anyi?​— Nanku padi muntu utuenzela bualu buimpe, ntshinyi tshitudi ne bua kuvuluka bua kuenza?​— Tudi ne bua kumuela tuasakidila. Misangu ya bungi bantu batu bapua muoyo bua kuela tuasakidila. Kadi mbimpe kuela tuasakidila. Patudi tuenza nanku, Yehowa Nzambi ne Muanende Yezu badi basanka.

Wewe muele meji bimpe, neuvuluke ne: bantu mbakuenzele malu mimpe a bungi. Tshilejilu, ukadiku musame anyi?​— Kutu muanji kusama bu bena nsudi dikumi aba to, kadi pamuapa uvuaku musame lukosu ne tshimpumpu tshikole anyi musame munda. Kuvuaku muntu mulue kukusamba anyi?​— Uvua mua kuikala mukupeshe buanga ne mukuenzele malu makuabu. Uvuaku mumvue disanka bua muvuaye mukuambuluishe bua wewe kumvua bimpe anyi?​—

Muena Samalea wakela Yezu tuasakidila bua muvuaye mumuondope, ne bualu ebu buakasankisha Yezu. Udi mumone ne: mamuebe peshi tatuebe nebasanke wewe mubele tuasakidila padibu bakuenzela malu mimpe anyi?​— Eyowa, nebasanke.

Kudi bantu bakuabu batu bakuenzela malu mimpe dituku dionso ta lumingu luonso. Pamuapa bidi mua kuikala ne: atshi mmudimu wabu  utubu benza. Badi mene mua kuikala ne disanka dia kuenza mudimu au. Kadi udi mua kupua muoyo bua kuela tuasakidila. Mulongeshi wenu wa mu kalasa udi mua kuikala wenza mudimu mukole wa kukulongesha. Mmudimu wende. Kadi neikale ne disanka wewe mumuele tuasakidila bua mudiye ukuambuluisha nanku.

Imue misangu muntu udi mua kukuenzela anu bualu bukese patupu. Kudiku muntu udi mukukuatshile tshibi tshiunzulula bua wewe kupita anyi? Peshi muntu mukuabu udi ukupitshishila dilonga dia biakudia ku mesa panudi nudia anyi? Mbimpe kuela tuasakidila nansha bua tumalu tukese tua nunku.

Tuetu tuvuluka bua kuela bantu ba pa buloba tuasakidila, nenku tudi mua kuvuluka kabidi bua kuela Tatu wetu wa mu diulu tuasakidila. Kudi malu a bungi be adi atusaka bua kuela Yehowa tuasakidila! Mmutupeshe muoyo ne malu onso mimpe adi asankisha nsombelu wa muntu. Nenku kudi malu a bungi atudi mua kutumbishila Nzambi mu diamba mêyi mimpe bua bualu buende dituku dionso.