ERI izooba waarya eby’okurya?— Noomanya owaabiteeka?— Obundi nyoko niwe yaabiteeka nari ondiijo muntu, kwonka shi ahabw’enki twine kwebaza Ruhanga ahabw’eby’okurya ebyo?— Ahabw’okuba Ruhanga niwe arikubaasisa ebimera ebirikutuha eby’okurya kukura. Kwonka, twine n’okwebaza owaabiteeka nari owaabigabura.

Obumwe nitwebwa kwebaza abandi ku barikutukorera ebirungi. Obu Omwegyesa Mukuru yaabaire ari omu nsi, haine ababembe abamwe abataramwebarize.

Noomanya eki ekigambo omubembe kirikumanyisa?— Omubembe n’omuntu orwaire ebibembe. Endwara egyo neebaasa n’okureetera omuntu kucweka enyama aha mubiri. Obu Yesu yaabaire ari omu nsi, ababembe bakaba baba baine kushoroorwa kuruga omu bantu abandi abatarwaire. Kandi omubembe ku yaabaire areeba omuntu ondiijo arikwija, akaba agamba n’eiraka rihango kurabura omuntu ogwo ngu atamuhikaho. Ekyo kikaba kikorwa kugira ngu obundi abantu abandi batakaakwatwa ebibembe kuruga aha muntu ogwo orwaire.

Yesu akaba ainiire ababembe embabazi nyingi. Eizooba rimwe Yesu arikuza Yerusaalemu, akaraba omu tauni nkye. Ku yaahikire haihi n’etauni egyo, ababembe ikumi baija kumubugana. Bakaba baahuriire ngu Yesu aine amaani kuruga ahari Ruhanga ag’okukiza buri ndwara.

Ababembe tibarahikire haihi na Yesu. Bakemerera hare nawe. Kwonka bakaba nibaikiriza ngu Yesu naija kubatambira ebibembe byabo. N’ahabw’ekyo ku baareebire Omwegyesa Mukuru, baamweta n’eiraka rihango bati: ‘Yesu Mwegyesa, tuhwere!’

 Iwe noogirira abarwaire embabazi?— Yesu akaba azibagirira. Akaba naamanya oku okubemba kurikureeta obusaasi. Akabagira ati: “Mwirooko mweyorekye aha banyamurwa.”​—Luka 17:11-14.

Ahabw’enki Yesu yaabagambiire kukora ekyo? N’ahabw’ekiragiro eki Yehova yaabaire ahaire abantu Be aha bikwatiraine n’ababembe. Ekiragiro ekyo kikaba nikigira ngu omunyamurwa wa Ruhanga aine kushwijuma omubiri gw’omubembe kuhamya yaaba akizire. Omubembe ku yaabaire aba akiriire kimwe, omunyamurwa akaba amugambira reero agaruka kutuura n’abantu abandi abatarwaire.​—Abaleevi 13:16, 17.

Kwonka ababembe abo, bakaba bakiine endwara yaabo. Mbwenu shi bakaza kweyoreka omunyamurwa nk’oku Yesu yaabagambiire?— Eego,  eshaaha egyo bakazayo. Abashaija abo baine kuba baabaire nibaikiriza ngu Yesu naija kubatambira endwara egyo. Niki ekyabaireho?

Ku baabaire bakiri omu muhanda barikuza kweyoreka aha munyamurwa, baakira ebibembe. Bakatambirwa, omubiri gwabo gwaba gye! Okwikiriza ngu Yesu aine amaani g’okubatambira kukabahwera. Ka baashemereirwe! Kwonka shi niki eki baabaire baine kukora okworeka okusiima kwabo? Ku waabaire oriiwe okaakozire ki?—

Omwe aha bashaija abaatambiirwe akagarukayo ahari Yesu. Yaatandika kuhimbisa Yehova, arikumugambaho ebintu birungi. Eki yaakozire kikaba kihikire ahabw’okuba amaani agaamutambiire gakaba gaarugire ahari Ruhanga. Kandi omushaija ogwo akatsimba amaju aha bigyere by’Omwegyesa Mukuru yaamwebaza. Akasiima munonga ahabw’eki Yesu yaamukoreire.

Kandi shi abashaija mwenda abandi? Yesu akabuuza ati: ‘Abaashemezibwa t’ikumi? Mwenda barahi? Omwe wenka niwe yaagaruka kuhimbisa Ruhanga?’

N’amazima, omwe wenka ahari ikumi niwe yaahimbisize  Ruhanga, kandi akagaruka kwebaza Yesu. Kandi omushaija ogwo akaba ari Omusamaria, owaabaire naaruga omu ihanga erindi. Abashaija abandi mwenda tibarayebarize Ruhanga na Yesu.​—Luka 17:15-19.

Omu bashaija abo nootwaza nk’oha? Nitwenda kuba nk’omushaija Omusamaria, tikwo?— Mbwenu omuntu yaatukorera ekintu kirungi, twine kukora ki?— Twine kwijuka kumwebaza. Obwire obwingi abantu tibarikwijuka kugira ngu yebare. Kwonka ni kirungi kwebaza. Twakora tutyo, Yehova Ruhanga n’Omwana we Yesu, nibashemererwa.

Waateekateeka aha bi abantu bakukoreire, noija kwijuka ngu bakukoreire ebirungi bingi. Nk’eky’okureeberaho, oraarwaireho?— Noobaasa kuba otakarwarahoga munonga nk’ababembe abo ikumi, kwonka noobaasa kuba orarwaireho senyiga nari omunda. Haine owaakureebereire?— Naabaasa kuba yaakuhaire omubazi kandi akakuhwera n’omu miringo endiijo. Okaashemererwa ahabw’okukuhwera okakira?—

Omushaija Omusamaria akeebaza Yesu ahabw’okumutambira, kandi ekyo kikashemeza Yesu. Nooteekateeka ngu nyoko nari sho nibaija kushemererwa waagira ngu yebare bwanyima y’okukukorera ebirungi?— Buzima, nibaija kushemererwa.

Abantu abamwe haine ebi barikukukorera buri izooba nari buri saabiiti. Nigubaasa kuba guri omurimo gwabo okukora ebintu nk’ebyo. Nibabaasa kuba nibakunda kukora omurimo gwabo ogwo. Kwonka  noobaasa kwebwa kubebaza. Omwegyesa waawe ah’eishomero naabaasa kuba naateeraho kukuhwera omu kwega kwawe. Ogwo niguba guri omurimo gwe. Kwonka naashemererwa waamwebaza ahabw’okukuhwera omu kwega kwawe.

Obumwe abantu haine ebi barikukukorera kwonka bitari bikuru munonga. Haine obu omuntu araakuhwereire kwekorera ekintu ekiremeire? Nari omuntu akakubegyera eby’okurya mwaba nimurya? Nikiba kiri kirungi kugira ngu yebare nangwa n’aha bintu nk’ebyo ebikye.

Twaijuka kwebaza abantu omu nsi, nikiija n’okutworobera kwijuka kwebaza Tataitwe ori omu iguru. Ka hariho ebintu bingi ebishemereire kutureetera kwebaza Yehova! Akatuha amagara n’ebintu ebindi bingi ebirikutureetera kushemererwa. N’ahabw’ekyo tuhikire kuhimbisa Ruhanga turikumugambaho ebirungi buri izooba.