ЗӔГЪ-МА, абон цы бахордтай? ~ Ӕмӕ уыцы хӕринаг чи скодта? ~ Ӕвӕццӕгӕн ӕй скодта дӕ мад кӕнӕ ӕндӕр исчи. Фӕлӕ уӕд хӕринаджы тыххӕй Хуыцауӕн цӕмӕн хъӕуы бузныг дзурын? ~ Уымӕн ӕмӕ Хуыцау сфӕлдыста зайӕгойтӕ ӕмӕ бӕлӕстӕ, ӕмӕ нын уый фӕрцы ис хӕринаг. Фӕлӕ бузныг дзурын хъӕуы, хӕринаг чи скодта ӕмӕ йӕ стъолыл чи ӕрӕвӕрдта, уымӕн дӕр.

Иуӕй-иу хатт нӕ ферох вӕййы, хорздзинад нын чи саразы, уыдонӕн бузныг зӕгъын, афтӕ нӕу? Иухатт цалдӕр хъотырджын лӕгӕй ферох ӕппӕты хуыздӕр Ахуыргӕнӕгӕн бузныг зӕгъын.

Зоныс, хъотырджын чи у? ~ Уый у, хъотырӕй рынчын чи у, ахӕм адӕймаг. Уыцы низӕй адӕймаджы буар сабыргай бамбийы. Йесойы рӕстӕджы, хъотырӕй рынчын чи уыд, уыдонӕн иннӕ адӕммӕ ӕввахс цӕрӕн нӕ уыди. Хъотырджын-иу искӕй ӕрбацӕйцӕугӕ куы федта, уӕд-иу хъуамӕ хъӕр кодтаид, рынчын дӕн, зӕгъгӕ. Афтӕ уымӕн кодта, цӕмӕй-иу ӕм иннӕтӕ хӕстӕг ма бацыдаиккой ӕмӕ сыл йӕ низ ма бахӕцыдаид.

Йесо хъотырджынтӕм хорз зӕрдӕ дардта. Иухатт Иерусалиммӕ куы фӕцӕйцыд, уӕд хъуамӕ иу хъӕуыл ахызтаид. Хъӕумӕ куы баввахс, уӕд йӕ размӕ рацыд дӕс хъотырджын лӕджы. Уыдон фехъуыстой, Йесойӕн Хуыцау кӕй радта ахӕм тых, ӕмӕ йӕ бон у адӕмы алы низӕй дӕр дзӕбӕх кӕнын.

Хъотырджын лӕгтӕ Йесомӕ хӕстӕг нӕ бацыдысты, дард ӕм ӕрлӕууыдысты. Фӕлӕ уыдоны уырныдта, Йесойӕн йӕ бон  кӕй у, ӕмӕ сӕ сдзӕбӕх кӕна. Ӕмӕ йӕ куы ауыдтой, уӕд ӕм ныхъхъӕр кодтой: «Йесо, Ахуыргӕнӕг, баххуыс нын кӕн!»

Рынчын адӕмӕн нӕ фӕтӕригъӕд кӕныс? ~ Йесо сын тынг тӕригъӕд кодта. Йесо зыдта, хъотырджынтӕн куыд зын у, уый. Ӕмӕ уыцы лӕгтӕн загъта: «Ацӕут ӕмӕ уӕхи сауджынтӕн фенын кӕнут» (Лукайы 17:11–14).

Йесо сын афтӕ цӕмӕн загъта? Уымӕн ӕмӕ Йегъовӕ йӕ адӕмӕн хъотырджынты тыххӕй ахӕм закъон радта. Уыцы закъонмӕ гӕсгӕ-иу сауджын хъуамӕ хъотырджыны буармӕ ӕркастаид ӕмӕ йын загътаид, йӕ низ ацыд ӕви нӕ. Куы-иу сдзӕбӕх, уӕд йӕ бон уыди фӕстӕмӕ ӕнӕниз адӕмимӕ цӕрын (Левит 13:16, 17).

 Фӕлӕ уыцы хъотырджын лӕгтӕ сӕ низӕй нӕма адзӕбӕх сты. Ӕмӕ уӕд Йесомӕ байхъуыстой? Сауджынмӕ ацыдысты? ~ О, уайтагъд дӕр. Уыдоны, ӕвӕццӕгӕн, уырныдта, Йесо сӕ кӕй сдзӕбӕх кӕндзӕн. Ӕмӕ дарддӕр цы ’рцыд?

Сауджынмӕ куыд фӕцӕйцыдысты, афтӕ сӕ низ ӕрбайсӕфт. Сӕ буар срӕсугъд. Иууылдӕр сдзӕбӕх сты! Йесойы бон сӕ кӕй у сдзӕбӕх кӕнын, ууыл кӕй ӕууӕндыдысты, уый дзӕгъӕлы нӕ фӕци. Ахъуыды-ма кӕн, куыд тынг цин кодтаиккой! Фӕлӕ бузныг кӕй уыдысты, уый куыд хъуамӕ равдыстаиккой? Ды куыд бакодтаис? ~

Уыцы лӕгтӕй иу фӕстӕмӕ Йесомӕ ӕрбаздӕхт. Уый райдыдта Йегъовӕйы кадджын кӕнын ӕмӕ Хуыцауӕй йӕ хорздзинӕдты тыххӕй ӕппӕлын. Ӕмӕ раст кодта, уымӕн ӕмӕ Хуыцауы тыхы фӕрцы сдзӕбӕх. Уый ӕппӕты хуыздӕр Ахуыргӕнӕджы раз йӕ зонгуытыл ӕрхауд ӕмӕ уымӕн дӕр бузныг загъта. Кӕй йӕ сдзӕбӕх кодта, уый тыххӕй дзы тынг бузныг уыди.

Фӕлӕ иннӕ фараст лӕджы та цы фесты? Йесо загъта: «Дӕс адӕймаджы не сдзӕбӕх сты? Уӕд иннӕ фараст кӕм сты? Ацы лӕджы йеддӕмӕ ӕндӕр куыд ничи раздӕхт ӕмӕ Хуыцауы куыд ничи скадджын кодта?»

 О, уый афтӕ уыд. Дӕсӕй ӕрмӕстдӕр иу скадджын кодта Хуыцауы. Ӕрмӕстдӕр иу ӕрбаздӕхт Йесойӕн бузныг зӕгъынмӕ. Ӕмӕ уыцы лӕг уыди ӕндӕр бӕстӕйӕ – Самарийӕ. Иннӕ фараст лӕджы та нӕдӕр Хуыцауӕн загътой бузныг, нӕдӕр Йесойӕн (Лукайы 17:15–19).

Уыцы дӕс адӕймагӕй ды кӕцыйы хуызӕн дӕ? Махӕй алкӕй дӕр фӕнды, цӕмӕй уӕм самариаг лӕджы хуызӕн, афтӕ нӕу? ~ Уӕдӕ нын исчи хорздзинад куы саразы, уӕд нӕ цы фӕхъӕуы бакӕнын? ~ Хъӕуы йын бузныг зӕгъын. Бирӕтӕй арӕх ферох вӕййы бузныг зӕгъын. Фӕлӕ бузныг дзурын ӕнӕмӕнг хъӕуы. Афтӕ куы кӕнӕм, уӕд Йегъовӕ ӕмӕ йӕ Фырт Йесо цин кӕндзысты.

Дӕуӕн дӕр иннӕтӕ, ӕвӕццӕгӕн, бирӕ хорздзинӕдтӕ скодтой. Зӕгъ-ма, искуы рынчын уыдтӕ? ~ Ӕвӕццӕгӕн, уыцы дӕс хъотырджын лӕджы хуызӕн рынчын никуы уыдтӕ. Фӕлӕ-иу, ӕвӕццӕгӕн, суазал дӕ кӕнӕ дӕ гуыбын рыст. Уӕд-иу дӕм исчи касти? ~ Ӕвӕццӕгӕн дын лӕвӕрдтой хостӕ ӕмӕ дӕм зылдысты. Сӕ фӕрцы кӕй адзӕбӕх дӕ, ууыл нӕ цин кодтай? ~

Самариаг лӕг Йесойӕн бузныг загъта, кӕй йӕ сдзӕбӕх кодта, уый тыххӕй. Ӕмӕ уый Йесойӕн уыди тынг ӕхсызгон. Куыд хъуыды кӕныс, дӕ фыд ӕмӕ дын дӕ мад хорзӕй цы аразынц, уый тыххӕй сын бузныг куы дзурай, уӕд нӕ цин кӕндзысты? ~

Алы бон дӕр кӕнӕ алы къуыри дӕр дӕуӕн хорздзинӕдтӕ фӕаразынц ноджыдӕр ӕндӕр чидӕртӕ. Чи зоны, уый сӕ куыстмӕ  дӕр хауы. Ӕмӕ, ӕвӕццӕгӕн, ууыл цин дӕр фӕкӕнынц. Фӕлӕ дӕ, мыййаг, нӕ айрох вӕййы уыдонӕн бузныг зӕгъын? Зӕгъӕм, дӕ ахуыргӕнӕг зӕрдиагӕй архайы, цӕмӕй дын исты бацамона. О, уый йӕ куыст у. Фӕлӕ-иу ын бузныг куы зӕгъай, уӕд ын уыдзӕн тынг ӕхсызгон.

Иуӕй-иу хатт нын саразынц гыццыл хорздзинад дӕр. Зӕгъӕм, дуар нын байгом кӕнынц кӕнӕ нӕм фынгыл хӕринаг радӕттынц. Ӕмӕ хорз уаид, ахӕм гыццыл хъуыддӕгты тыххӕй дӕр иннӕтӕн бузныг куы дзуриккам.

Адӕмӕн бузныг дзурын куы нӕ рох кӕнӕм, уӕд нӕ рох кӕндзыстӕм бузныг дзурын нӕ уӕларвон Фыдӕн дӕр. Ӕмӕ нын Йегъовӕ цас хорздзинӕдтӕ сарӕзта, уый та! Уый нын радта цард ӕмӕ нын циндзинад цы хӕссы, уыдӕттӕ иууылдӕр. Уӕдӕ алы бон дӕр Йегъовӕйы кадджын кӕнӕм ӕмӕ дзы йӕ хорздзинӕдты тыххӕй ӕппӕлӕм.