KASIN angan ka natan?— Antam no siopa so angiparaan ed satan?— Anganko et imparaan itan nen nanay mo odino walay sananey ya angiparaan ed satan, balet akin a pisalamatan tayoy Dios ed satan?— Lapud say Dios so amawala ed saray naakan. Balet, pisalamatan tayo met so angiparaan na nakan odino samay angiserbi na satan ed sikatayo.

Agta no maminsan et nalingwanan tayoy misalamat ed arum a nanggawa na maabig iran bengatla ed sikatayo? Sanen wadiad dalin so Sankamaongan a Managbangat, walaray pigaran akating ya alingwanan day akisalamat.

Antam no anto so akating?— Say akating et sakey a too a walay sakit ton tatawagen a kating. Satan a sakit et pansengegan ni ingen na kamigmig na laman na too. Sanen wadiad dalin si Jesus, saray akating so insian ed arum a totoo. Tan no anengneng na akating a walay onsasabin too, ibando to ed saman a too ya agto aasinggeran. Ginawa iya pian agmakaasingger iray arum a totoo ta ompan naalisan na akating.

Kaskasian nen Jesus iray akating. Sakey ya agew, diad pamapaarap to ed Jerusalem, kaukolan ya ondalan si Jesus ed melag a baley. Sanen asingger la ed baley, walay samploran akating a pinmaway pian nengnengen da. Abalitaan dan walaan na pakapanyari si Jesus a nanlapud Dios pian paabigen so amin a klase na sakit.

Ag-inmasingger iray akating ed si Jesus. Nansiansia ira ed arawi. Balet manisia iran sarag nen Jesus a paabigen so kating da.  Kanian sanen anengneng na saray akating so Sankamaongan a Managbangat, imbando ra ed sikato: ‘Jesus, Managbangat, tulongan mo kami!’

Kasin nakakasian mo iray totoo a mansasakit?— Akasian ira nen Jesus. Amta toy ermen na mansakit na kating. Kanian inebatan tora tan inkuan to: ‘Onla kayo tan ompatnag kayo ed saray saserdote.’—Lucas 17:11-14.

Akin ya imbaga nen Jesus a gawaen da iya? Lapud ganggan ya inter nen Jehova ed saray totoo To nipaakar ed saray akating. Ibabaga na sayan ganggan a say saserdote na Dios so mannengneng ed laman na akating. Say saserdote so mangibaga no kasin inmabig lan  maong so akating. No sikatoy inmabig la, sikatoy agla isian ed totoo.—Levitico 13:16, 17.

Balet wala ni sakit na sarayan akating. Kasin linma ira ed saserdote a singa imbaga nen Jesus?— On, linma iran tampol. Seguradon panisiaan na sarayan lalaki a nayarian nen Jesus a paabigen so sakit da. Antoy agawa?

Onia’ay, legan ya oonla ira’d saserdote, naandipat so sakit da. Inmabig lan maong so laman da! Agunggonaan so pananisia ra ed pakapanyari nen Jesus. Alay liket da! Balet, anto natan so kaukolan dan gawaen pian ipanengneng so pisasalamat da? No sika, antoy ginawam komon ey?—

Sakey ed saramay inmabig a lalaki so pinmawil ed si Jesus. Sikatoy angigloria ed si Jehova tan angigalgalang ed Dios. Satan so manepeg a gawaen lapud nanlapud Dios so pakapanyarin amaabig ed sikato. Tinmalimukor met so laki ed sali na Sankamaongan a Managbangat tan akisalamat ed sikato. Sikatoy misalsalamat lapud ginawa nen Jesus.

Balet komusta iray siamiran lalaki? Intepet nen Jesus: ‘Agta  samplora iramay akating ya inmabig? Iner so kawalaan na siamira? Kasin saksakey labat so pinmawil pian mangidayew ed Dios?’

On, tua itan. Sakey labat ed samplora so angigalang, odino angidayew, ed Dios tan pinmawil ya akisalamat ed si Jesus. Tan sayan too et sakey a Samaritano a taga’d sananey a bansa. Say arum a siamiran lalaki so ag-akisalamat ed Dios, tan ag-ira akisalamat ed si Jesus.—Lucas 17:15-19.

Dinan ed saraman a lalaki so kaparam? Labay tayon aligen so Samaritano, agta ontan?— Kanian no walay manggawa na maabig parad sikatayo, anto so nepeg tayon nonoten a gawaen?— Labay tayon ibalikas so pisasalamat tayo. Mabetbet a nalingwanan na totoo so misalamat. Balet maong so misalamat. No gawaen tayo itan, napaliket si Jehova a Dios tan say Anak to, si Jesus.

No isipen mo itan, nanonotan mon dakel so maong ya agawaan la na totoo parad sika. Alimbawa, asalim ta lay nansakit?— Nayarin agmo ni asali nansakit a singa saraman a samploran akating, balet nayarin asalim lay apanateng odino sinmakit so eges mo. Kasin walay angasikaso ed sika?— Nayarin inikdan da ka na tambal tan inasikaso da ka. Agta maliket ka lapud tinulongan da kan onabig?—

Akisalamatan na Samaritano si Jesus lapud pinaabig to, tan saya so amaliket ed si Jesus. Isipen mo kasin manliket si nanay odino tatay mo no misalamat ka ed sikara lapud saray ginawa ra ed sika?— On, manliket ira.

 Arum a totoo so manggagawa na saray bengatla parad sika kada agew odino kada simba. Nayarin trabaho da iratan. Maliket ni ingen ira a manggawa ed satan. Balet nayarin nalingwanan moy misalamat. Nayarin mamapasya so maestram pian dakel so naaralan mo. Trabaho to itan. Balet sikatoy manliket no pisalamatan mo lapud panutulong to ed sikan makaaral.

No maminsan et angkelag labat so nagagawaan na arum parad sika. Wala ta lay angilukas na kapot parad sika? Odino wala ta lay angiderew ed sika na nakan diad lamisaan? Maong so pisalamat anggan ed sarayan ankelag a bengatla.

No nanonotan tayo so misalamat ed totoo, sirin et lalon nanonotan tayo so misalamat ed Ama tayo a walad tawen. Tan dakerakel so pisalamatan tayo ed si Jehova! Inikdan to itayo na bilay tan amin a maong iran bengatla a makapaliket ed bilay. Kanian dakel so rason pian igloria tayo so Dios panamegley na pangibalikas na maong iran bengatla nipaakar ed sikato kada agew.