¿MIKHUNKIÑACHU?... ¿Yachankichu pichus chay mikhunata waykʼusqanta?... Ichapis mamayki chayri waj runa waykʼorqa. Jina kajtin, ¿imaraykutaj Diosman “gracias” nina tiyan?... Imaraykuchus mikhuna kapunawanchejpajqa, Dios chajrasta poqochin. Mikhunata waykʼojmanpis chayri qarajmanpis, “gracias” ninallataj tiyan.

Wakin kuti runas imatapis ruwapuwajtinchej, “gracias” niyta qonqanchej, ¿icharí? Jesús Jallpʼapi kashajtin, leprawan onqosqa wakin runasqa mana agradecekorqankuchu.

¿Yachankichu imachus lepra kasqanta?... Chayqa uj onqoy, runaj aychantataj qʼetayachispa tukuchin. Jesuspa tiemponpi, leprayojkunaqa llajtamanta jawapi tiyakunanku karqa. Runas paykunaman mana chimpanankupajtaj, “¡leprayoj kani!”, nispa qhaparinanku karqa. Ajinamanta onqoyninkuta mana wajkunaman chimpachejchu kanku.

Jesusqa leprayoj runasmanta khuyakoj. Ujpacha Jerusalenman rishaspa, uj ranchota pasanan karqa. Chay ranchoman qayllaykushajtin, lepra onqoyniyoj chunka runas paywan tinkukoj jamorqanku. Paykunaqa uyarisqanku, Jesús tukuy laya onqoykunata Diospa atiyninwan sanoyachiyta atisqanta.

Leprayoj runasqa mana Jesusman qayllaykorqankuchu. Jinapis creerqanku, Sumaj Yachachej Jesús paykunata sanoyachinanta.  Chayrayku payta rikuspa qhaparerqanku: “Yachachej Jesús, khuyariwayku ari”, nispa.

¿Onqosqasta rikuspa llakikunkichu?... Jesusqa onqosqasmanta llakikoj. Payqa yacharqa, lepra onqoyniyoj kayqa llakiy kasqanta. Chayrayku chay leprayoj runasman nerqa: “Riychej, sacerdotesman rikuchikamuychej”, nispa (Lucas 17:11-14).

¿Imaraykú Jesús chayta nerqa? Jehovaj leynin chayta kamachisqanrayku. Ley nisqanman jina, leprayoj runaqa Diospa sacerdotenwan qhawachikunan karqa. Paytaj onqoynin chinkapusqantachus, manachus willanan karqa. Sanoyapojtenqa watejmanta wajkunawan khuska tiyakuyta atej (Levítico 13:16, 17).

 Chay leprayoj runastaj, niraj sanochu karqanku. ¿Jesús ‘sacerdotesman riychej’ nisqanta kasunkumanchu karqa?... Arí, chay rato rerqanku. Imajtinchus creerqanku Jesús paykunata sanoyachinanta. Chantá, ¿imataj karqa?

Sacerdoteswan qhawachikoj rishajtinku, lepra onqoyninkumanta sanoyarqanku. Paykunaqa Jesús atiyniyoj kasqanpi creesqankurayku sanoyaporqanku. Chaymanta, ¡maytachá kusikorqanku! ¿Imatá ruwananku karqa agradecekunankupaj? ¿Imatá qan ruwawaj karqa?...

Paykunamanta ujnenqa, sano rikhurispa Jesusman kutirimorqa. Chantá Jehovata jatuncharqa paymanta allin imasta parlaspa. Chay ruwasqanqa allinpuni karqa. Imaraykuchus payqa Diospa atiyninnejta sanoyaporqa. Chantá Jesuspa ñaupaqenman qonqorikuspa agradecekorqa. Payqa Jesús sanoyachisqanmanta, ¡may agradecesqa kasharqa!

Chantá Jesús taporqa: ‘¿Manachu chunka karqanku sanoyachisqasqa? ¿Maypitaj chay jisqʼon kashankuri? ¿Ujllachu kutimun Diosta jatunchajqa?’, nispa.

 Arí, chay chunkamanta ujlla Diosta jatuncharqa. Chay runalla Jesusta agradecekoj kutimorqa. Payqa samaritano karqa, waj llajtayoj runa. Chay jisqʼon runastaj, ni Diosmanpis, ni Jesusmanpis “gracias” nerqankuchu (Lucas 17:15-19).

Chay runasmanta, ¿mayqenmantaj rijchʼakunki? ¿Chay samaritano jinacharí kayta munanchej?... Chayrayku pillapis yanapariwajtinchej, ¿imatá mana qonqanachu?... “Gracias” niyta. Wakin runas agradecekuyta qonqajtinkupis, noqanchejqa agradecekunanchej tiyan. Chayqa Jehová Diosta kusichin, Wawan Jesustapis.

Tʼukurispaqa wajkuna ashkha imasta ruwapususqankuta reparanki. ¿Maykʼajllapis onqoykorqankichu?... Ichá mana chay chunka runas jinachu leprawan onqoykorqanki. Jinapis ichá sinchʼi chʼojowan chayri wijsa nanaywan onqoykorqanki. Ajina kashajtiyki, ¿pipis yanapasorqachu?... Ichapis jampita jaywasorqanku, atiendesorqanku ima. Chayta ruwasqankumanta, ¿kusikorqankichu?...

Chay samaritanoqa sanoyapusqanmanta Jesusman “gracias” nerqa. Chaytaj Jesusta kusicherqa. Tatayki chayri mamayki, ¿kusikunmanchu “gracias” nejtiyki?... Arí, mayta kusikunman.

Wakenqa sapa día chayri sapa semana, imallatapis qanpaj ruwashankupuni. Ichapis chayqa llankʼayninkupuni, chayta ruwaspataj  ichá kusikunku. Chaywanpis ichá paykunaman “gracias” niyta qonqapunki. Ichapis profesorayki allinta yachachisunanpaj mayta kallpachakun. Chayta ruwananpuni kajtinpis, yachachisusqanmanta “gracias” nejtiykeqa, kusikonqa.

Wakin kutis runasqa waj jinasmanta yanapasunku. Ichapis tareaykita ruwanaykipaj yanapasunku chayri mikhunata jaywarimusunku. Chayta ruwasqankumantapis, “gracias” ninayki tiyan.

Runasman “gracias” niyta mana qonqajtinchejqa, manallataj Tatanchej Jehovaman “gracias” niytapis qonqasunchu. ¿Ashkha imasmantacharí Jehovaman agradecekunanchej tiyan? Payqa kausayta qowanchej, kusisqa kanapajtaj tukuy imata churapuwanchej. Chayrayku Jehovata sapa pʼunchay jatunchana paymanta allin imasta parlaspa.