MO TE kobe laso?— Mo hinga zo so atö kobe ni?— Peut-être a yeke mama ti mo wala mbeni zo nde, me ngbanga ti nyen a yeke nzoni e mû merci na Nzapa ndali ni?— Ngbanga ti so Nzapa la asala si kobe asigigi. Me, a yeke nga nzoni ti mû merci na zo so atö kobe ni wala zo so amû kobe ni na e.

Ngoi na ngoi tongana azo asala aye ti nzoni na e, e yeke girisa ti tene merci, ni la ape? Tongana Kota Wafango ye ayeke lani na ndo ti sese, ambeni zo ti buruma agirisa ti tene merci na lo.

Mo hinga zo ti buruma?— A yeke zo so ayeke na kobela so asala si anyama ti tele ti lo ayeke tï na sese. Lani so Jésus ayeke na ndo ti sese ge, a hunda na azo ti buruma ti ngbâ yongoro na azo. Tongana mbeni zo ti buruma abâ mbeni zo na gango ni, a lingbi lo dekongo si zo ni angbâ yongoro na lo. A yeke ti tene ambeni zo aga ndulu mingi na ala pëpe si ala wara kobela ti buruma ni pëpe.

Jésus asala lani aye ti nzoni mingi na azo ti buruma. Mbeni lâ, na guengo ti lo na Jérusalem, a lingbi Jésus ahon na yâ ti mbeni kete kodoro. Tongana lo ga ndulu na kodoro ni so, azo ti buruma bale-oko aga na lo. Ala mä kozoni so Jésus ayeke na ngangu ti Nzapa ti zi akobela nde nde kue.

Azo ti buruma ni aga ndulu na tele ti Jésus pëpe. Ala ngbâ yongoro. Me ala mä na bê so Jésus alingbi ti zi kobela ti ala ni. Tongaso, tongana ala bâ Kota Wafango ye, ala dekongo, ala tene na lo: ‘Jésus, Wafango ye, mû maboko na e!’

 Mawa ti azo ti kobela ayeke gbu ka mo?— Ti Jésus, mawa ti ala agbu lo. Lo hinga so dutingo zo ti buruma ayeke pasi mingi. Tongaso, lo tene na ala: ‘I gue i fa tele ti i na aprêtre.’​—Luc 17:11-14.

Jésus ahunda na ala ti sala ye so ngbanga ti nyen? A yeke ndali ti ndia so Jéhovah amû ândö na azo ti Lo na ndo azo ti buruma. Ndia ni atene so a lingbi aprêtre ni abâ lê ti kä ti zo ti buruma ni. Tongana kobela ni kue ahon na tele ti zo ti buruma ni, prêtre ni ayeke tene na lo. Na pekoni, lo lingbi ti gue ti duti na popo ti azo so ayeke na buruma ni pëpe.​—Lévitique 13:16, 17.

Me akoli so ayeke lakue na kobela ti buruma na tele ti ala. Ala gue abâ prêtre ni tongana ti so Jésus atene na ala so?— Ala gue, na  tâ gi na peko ti tënë ti Jésus ni mveni. Akoli so amä lani na bê so Jésus ayeke zi ande kobela ti ala. Ye nyen asi?

Na ngoi so ala yeke na lege ti gue ti bâ prêtre ni, kobela ti ala ahon. Tele ti ala kue aga nzoni! Mabe ti ala na ngangu ti Jésus aga na ye ti nzoni na ala. So tâ nzerengo tele! Me fadeso, a lingbi ala sala nyen ti fa so ala mû merci? Mo yeke sala ti mo nyen?—

Mbeni oko ti akoli so akiri na tele ti Jésus. Lo komanse ti gonda Jéhovah, lo tene anzoni tënë na ndo Nzapa. Ye so lo sala ayeke tâ na lege ni, teti so ngangu ti savango lo alondo na Nzapa. Koli ni atï nga na gere ti Kota Wafango ye na lo mû merci mingi na lo ndali ti ye so lo sala.

Ka ti agumbaya ni? Jésus ahunda: ‘Azo ti buruma bale-oko la si awara nzoni. Agumbaya ni ayeke na ndo wa? Gi zo oko si akiri ti mû gloire na Nzapa?’

Tâ tënë, gi zo oko na popo ti azo bale-oko so si amû gloire, wala agonda Nzapa na akiri ti mû merci na Jésus. Koli ni so ayeke mbeni zo ti kodoro ti Samarie, mbeni wande.  Tanga ti azo gumbaya ni amû merci na Nzapa nga na Jésus pëpe.​—Luc 17:15-19.

Na yâ ti akoli so, mo kpa ti mo lo so wa? E ye ti kpa zo ti Samarie ni, ni la ape?— Tongaso, tongana mbeni zo asala mbeni ye ti nzoni na e, a lingbi e girisa pëpe ti sala nyen?— A lingbi e tene merci. Mingi ni, azo ayeke tene ka merci pëpe. Me a yeke nzoni ti tene merci. Tongana e tene ni, a yeke nzere ande na bê ti Jéhovah Nzapa nga na Molenge ti lo, Jésus.

Tongana mo gbu li ti mo na ndo ni, mo yeke bâ so ambeni zo asala aye mingi na mo awe. Na tapande, tele ti mo aso awe?— Peut-être tele ti mo aso lâ oko pëpe tongana azo ti buruma bale-oko so, me peut-être koro asala mo, wala yâ ti mo aso. Mbeni zo abâ lege ti mo?— Lo mû peut-être yorö na mo wala lo sala mbeni ye nde na mo. So lo mû maboko na mo ti kaï kobela ti mo, a nzere na mo ape?—

Zo ti Samarie ni amû merci na Jésus ngbanga ti so Jésus asala si lo ga nzoni. Ye so anzere na bê ti Jésus. Tongana mo tene merci na babâ wala na mama ti mo tongana ala sala ambeni ye na mo, tele ti ala ayeke nzere ande ape?— A yeke nzere.

Lâ oko oko wala dimanche oko oko, ambeni zo ayeke sala aye na mo. Kua ti ala ahunda peut-être na ala ti sala tongaso. Ala yeke peut-être même na ngia ti sala ni. Me mo tene peut-être  merci ape. Wafango mbeti na mo alingbi ti sala ngangu ti mû maboko na mo ti manda ye. So kua ti lo la. Me tongana mo tene merci na lo ndali ti maboko so lo yeke mû na mo ti manda ye, tele ti lo ayeke nzere.

Na ambeni ngoi, azo ayeke sala gi mbeni kete ye na mo. Mbeni zo amû maboko na mo awe ti yô mbeni nene ye na li ti mo? Wala mbeni zo amû ngu ti nyon na mo awe na ngoi ti tengo kobe? A yeke nzoni ti tene merci, même tongana aye ni so ayeke akete ye.

Tongana e girisa pëpe ti tene merci na azo na ndo ti sese ge, a yeke duti ande ngangu na e pëpe ti tene merci na Babâ ti e ti yayu. Aye ayeke mingi ti mû merci na Jéhovah ndali ni! Lo mû na e fini nga na aye ti nzoni kue so asala si gigi anzere. Tongaso, e yeke na anda ti tënë mingi ti gonda Nzapa na tenengo anzoni tënë na ndo lo lâ na lâ.