YU NYAN kaba tide?— Yu sabi suma ben bori a nyanyan dati?— Kande yu mama, noso wan tra sma, ma fu san ede wi musu taki Gado tangi gi a nyanyan dati?— Fu di Gado na a sma di e meki taki sani e gro so taki wi kan nyan den. Ma wan tra sma di wi musu taki tangi tu, na a sma di bori a nyanyan noso a sma di poti a nyanyan gi wi na tafra.

Son leisi wi e frigiti fu taki tangi te trawan du wan bun sani gi wi, a no so? Di a Bigi Leriman ben de na grontapu, dan wan tu gwasiman frigiti fu taki tangi.

Yu sabi san na wan gwasiman?— Wan gwasiman na wan sma di abi wan siki di nen gwasi. A siki dati kan meki srefi taki a meti fu wan sma e fadon komoto fu en skin. Na a ten di Yesus ben e libi na grontapu, dan gwasiman ben musu tan farawe fu tra sma. Èn efu wan gwasiman ben si wan tra sma e kon, dan a ben musu bari fu warskow a sma taki a ben musu tan fara fu en. A ben musu du disi, bika efu tra sma ben o kon tumusi krosibei, dan den ben kan kisi a siki fu en.

Yesus ben sori switifasi gi gwasiman trutru. Wan dei di Yesus ben de na pasi fu go na Yerusalem, dan a ben musu pasa na ini wan pikin foto. Di a kon krosibei fu a foto, dan tin gwasiman kon fu miti en. Den ben yere taki Yesus ben kisi makti fu Gado fu dresi ala sortu siki.

Den gwasiman no kon krosibei fu Yesus. Den ben tanapu fara fu en. Ma den ben bribi taki Yesus ben kan dresi a gwasi fu den.  Sobun, di den gwasiman si a Bigi Leriman, dan den bari: ’Yesus, Leriman, yepi wi!’

Yu e firi sari gi sma di siki?— Yesus ben firi sari gi den sortu sma dati. A ben sabi taki a ben de wan tumusi sari sani fu de wan gwasiman. Fu dati ede, a piki den èn a taki: „Go meki den priester luku unu.”​—Lukas 17:11-14.

Fu san ede Yesus ben taigi den fu du disi? Fu di Yehovah ben gi En pipel wan wet di ben e sori fa fu handri nanga gwasiman. A wet disi ben taki dati a priester fu Gado ben musu luku a skin fu wan gwasiman. A priester ben o taigi a gwasiman efu a siki fu en ben dresi dorodoro. Te a ben kon betre, dan a ben kan libi  baka nanga gosontu sma.​—Lefitikus 13:16, 17.

Ma den gwasiman disi ben abi a siki fu den ete. Den go na a priester soleki fa Yesus ben taigi den?— Iya, den du dati wantewante. A ben musu de so taki den man disi ben e bribi taki Yesus ben o dresi a siki fu den. San ben pasa?

We, di den ben de na pasi fu go na a priester, dan a siki fu den kon dresi. A skin fu den kon betre. Den ben de gosontu baka! Disi ben pasa fu di den ben bribi na ini a krakti fu Yesus. Den ben prisiri fu tru! Ma san den ben musu du now fu sori taki den ben de nanga tangi? San yu ben o du?—

Wan fu den man di ben kon betre, drai kon baka na Yesus. A bigin taki bun sani fu Yehovah fu gi en glori. Dati ben de a yoisti sani fu du, fu di a makti di Yesus ben abi fu meki a man disi kon betre, ben komoto fu Gado. Boiti dati, a man fadon na den futu fu a Bigi Leriman, èn a taki en tangi. A ben de nanga tangi trutru gi san Yesus ben du.

Ma fa a ben de nanga den tra neigi man? Yesus ben  aksi: ’A no tin gwasiman ben kon betre baka? Pe den tra neigi de? Na wán fu den nomo drai kon baka fu gi Gado glori?’

Iya, na so a de. Wán nomo fu den tin man ben gi Gado glori, noso grani. Iya, wán nomo ben drai kon baka fu taki Yesus tangi. Èn a sma disi ben de wan Samariasma, wan man fu wan tra kondre. Den tra neigi man no taki Gado tangi, èn den no taki Yesus tangi tu.​—Lukas 17:15-19.

Leki sortuwan fu den man yu de? Wi wani fu de leki a Samariaman, a no so?— Sobun, te wan sma e du wan bun sani gi wi, dan san wi no musu frigiti fu du?— Wi no musu frigiti fu taki en tangi. Furu tron, sma e frigiti fu taki tangi. Ma a bun fu taki tangi. Te wi e du dati, dan Yehovah Gado nanga en Manpikin, Yesus, e prisiri.

Te yu e prakseri a sani disi, dan yu sa memre taki sma du furu sani gi yu. Fu gi wan eksempre, oiti yu ben siki?— Kande noiti yu no siki leki den tin gwasiman dati, ma a kan taki yu ben abi hebi korsu, noso bere-ati. Sma ben sorgu yu?— Kande den gi yu dresi, noso den du tra sani gi yu. Yu ben breiti taki den ben yepi yu fu kon betre baka?—

A Samariaman ben taki Yesus tangi fu di a ben meki a kon betre baka, èn a sani disi ben gi Yesus prisiri. Yu denki taki yu mama, noso yu papa sa prisiri te yu e taigi den tangi te den du sani gi yu?— Iya, den sa prisiri trutru.

 Son sma e du sani gi yu ibri dei noso ibri wiki. Kande den abi a wroko fu du den sani disi gi yu. Kande den e prisiri srefi fu du den sani dati. Ma yu ben kan frigiti fu taigi den tangi. Yu skoromisi ben kan wroko tranga fu yepi yu kon leri sabi sani. Disi na en wroko. Ma a sa prisiri te yu e taki en tangi fu di a yepi yu fu leri sani.

Son leisi, sma e du pikin sani gi yu nomo. Oiti wan sma e hori a doro opo gi yu? Noso wan sma e langa nyanyan gi yu te yu e sidon na a nyanyan tafra? A bun fu taki tangi gi den pikin sani disi srefi.

Te wi abi a gwenti kaba fu taigi sma na grontapu tangi, dan wi no sa frigiti fu taigi wi Tata na hemel tangi. Èn wi kan taki Yehovah tangi gi bun furu sani! A gi wi libi èn sosrefi ala den bun sani di e gi prisiri na ini a libi. Fu dati ede wi musu taki bun sani fu Gado ibri dei, so taki wi kan gi En glori.