UKUDLILE yini kudla lamuhla?— Uyati yini kutsi kuphekwe ngubani?— Kungenteka kutsi ngumake wakho nobe ngulomunye umuntfu, kodvwa kungani kufanele ubonge Nkulunkulu ngako?— Kungobe nguNkulunkulu lobangela kutsi kube nekudla. Nanobe kunjalo, kufanele simbonge naloyo lokuphekile noma losiphakele kona.

Ngalesinye sikhatsi siyakhohlwa kubonga nangabe labanye bantfu basentele tintfo letinhle. Ngesikhatsi Umfundzisi Lomuhle Kakhulu asemhlabeni, bekunebantfu labanebulephelo labelapha kodvwa bakhohlwa kubonga.

Buyini bulephelo?— Bulephelo sifo lesibi lesiphatsa bantfu. Lesifo singase sidle sikhumba sabo. Ngesikhatsi Jesu alapha emhlabeni, bantfu labanebulephelo bekufanele bahlukaniswe, bahlale bodvwana. Nakwenteka umuntfu lonebulephelo abona lomunye umuntfu achamuka, bekumelwe amemete amecwayise kutsi angasondzeli kuye. Loku bekwentiwa ngesizatfu sekutsi kusondzela kumuntfu lonebulephelo bekungenta bantfu batfole lesifo.

Jesu bekanemusa nakubantfu labanebulephelo. Ngalelinye lilanga nakaya eJerusalema, kwadzingeka kutsi endlule edolobheni lelincane. Ngalesikhatsi asedvute nalelidolobha, bantfu labalishumi labanebulephelo baphuma kute bambone. Bebevile kutsi Jesu unemandla lavela Nkulunkulu ekwelapha tonkhe tinhlobo tekugula.

Labantfu labanebulephelo abazange basondzele kakhulu kuJesu. Bamela khashane naye. Bebakholwa kutsi Jesu angabelapha kulesifo  sabo sebulephelo. Ngalesikhatsi labobantfu babona Umfundzisi Lomuhle Kakhulu, bammemeta batsi: ‘Jesu, Mfundzisi, sisite!’

Uyabavela yini buhlungu bantfu labagulako?— Jesu bekabavela. Bekati kutsi kubuhlungu kanganani kuba nebulephelo. Ngako wabaphendvula watsi: “Hambani kubaphristi nitivete kubo.”​—Lukha 17:11-14.

Kungani Jesu atsi abente loku? Kwakungenca yemtsetfo Jehova labewunike bantfu bakhe lomayelana nebantfu labanebulephelo. Lomtsetfo bewutsi baphristi baNkulunkulu bekumelwe bahlolisise sikhumba semuntfu lonebulephelo. Umphristi bekamtjela umuntfu lonebulephelo nangabe lesifo sesiphelile. Nangabe sesiphelile, bekangaphindze  aphile nalabanye bantfu labete lesifo.​—Levithikhusi 13:16, 17.

Kepha labantfu labanebulephelo bebasolo bangakabi ncono. Baya yini kumphristi njengobe Jesu bekabatjelile?— Baya, ngaso leso sikhatsi. Lamadvodza kungenteka bewakholwa kutsi Jesu utakucedza kugula kwawo. Kwentekani ngemuva kwaloko?

Ngesikhatsi lamadvodza asendleleni leya kumphristi, lesifo sawo saphela. Sikhumba sawo salapheka. Bese aphilile! Kukholwa kwawo kutsi Jesu unemandla kwaba nemiphumela lemihle. Kungenteka ajabula kakhulu. Kodvwa ngaleso sikhatsi yini lebekufanele ayente kuze akhombise kutsi ayabonga? Kube bekunguwe botakwenta njani?—

Yinye yalamadvodza lalashiwe yabuyela kuJesu. Yacala kukhatimulisa Jehova yasho tintfo letinhle ngaNkulunkulu. Leyo bekuyintfo lekahle kutsi iyente ngobe emandla ekuyelapha bekavele kuNkulunkulu. Lendvodza yaphindze yaguca kuMfundzisi Lomuhle Kakhulu yambonga. Beyijabula kakhulu ngaloko Jesu layentele kona.

Yini leyentiwa ngulalamanye emadvodza layimfica? Jesu wabuta: ‘Angitsi kwelashwe emadvodza lalishumi? Pho aphi lalamanye  layimfica? Ikhona yini lenye lebuyile kute idvumise Nkulunkulu, ngaphandle kwalendvodza?’

Loko bekuliciniso. Yinye kuphela kulamadvodza lalishumi leyakhatimulisa Nkulunkulu nobe leyamdvumisa, yaphindze yabuya kute ibonge Jesu. Lendvodza beyingumSamariya ichamuka kulelinye live. Lalamanye layimfica akazange ambonge Nkulunkulu naJesu.​—Lukha 17:15-19.

Ufanana nayiphi kulamadvodza? Siyafisa yini kuba njengalendvodza lengumSamariya?— Nangabe lotsite asentela lokuhle, yini lokufanele sikhumbule kuyenta?— Sonkhe kufanele sikhumbule kubonga. Bantfu bavamile kukhohlwa kubonga. Kodvwa yintfo lenhle kubonga. Jehova Nkulunkulu kanye neNdvodzana yakhe Jesu bayajabula nasibonga.

Nawungatinika sikhatsi ucabange kahle, utawukhumbula kutsi tinyenti tintfo letinhle bantfu labakwentele tona. Sibonelo saloku ngunaku, wake yini wagula?— Kungenteka awukaze ugule njengalamadvodza lalishumi labenebulephelo, kodvwa kungenteka uke waphatfwa ngumkhuhlane nobe sisu sakho saba buhlungu. Wanakekelwa ngubani?— Kungenteka bakunika umutsi bakwentela naletinye tintfo. Wajabula yini ngekutsi bakusitile waze waba ncono?—

Lendvodza lengumSamariya yambonga Jesu ngekuyelapha futsi loko kwamjabulisa Jesu. Ucabanga kutsi make wakho nobe babe wakho utawujabula yini nawumbonga ngemuva kwekutsi akwentele tintfo letinhle?— Utawujabula.

 Labanye bantfu bakwentela tintfo letinhle malanga onkhe nobe maviki onkhe. Kungenteka ngumsebenti wabo kwenta leto tintfo. Mhlawumbe bayakujabulela kutenta. Ungase ukhohlwe kubabonga. Thishela wakho kungenteka usebenta kamatima kuze akusite ufundze. Lona ngumsebenti wakhe. Kodvwa utawujabula kakhulu thishela wakho nangabe umbonga ngekutsi ukusitile wafundza.

Ngalesinye sikhatsi bantfu bakwentela tintfo letincane. Kuyenteka yini kutsi lotsite akubambele umnyango lovuliwe? Ukhona yini futsi lokundlulisela kudla nanihleti etafuleni lekudla? Kuhle kubonga ngisho noma wentelwe leto tintfo letincane.

Nangabe sikhumbula kusho kutsi siyabonga kubantfu emhlabeni, maningi ematfuba ekutsi sikhumbule kubonga naBabe wetfu losezulwini. Tinyenti kakhulu tintfo lesingambongela tona Jehova! Wasiniketa kuphila kanye nato tonkhe tintfo letenta kuphila kube mnandzi. Ngako kuyintfo lefanele kutsi sikhatimulise Nkulunkulu nekutsi sisho tintfo letinhle ngaye malanga onkhe.