NA‘Á KE kai ha me‘akai he ‘ahó ni?— ‘Okú ke ‘ilo pe ko hai na‘á ne teuteu iá?— Mahalo nai ko ho‘o fa‘eé pe ko ha taha kehe, ka ko e hā ke ta fakamālō ai ki he ‘Otuá koe‘uhi ko e me‘a ko iá?— Koe‘uhi ko e ‘Otuá ‘a e tokotaha ‘okú ne ‘ai ke malava ‘o tupu ‘a e me‘akaí. Kae kehe, ‘oku totonu ke ta toe fakamālō ki he tokotaha na‘á ne teuteu ‘a e me‘akaí pe ko e tokotaha na‘á ne ‘omai ia kia kitauá.

‘I he taimi ‘e ni‘ihi, ‘oku ngalo ‘ia kitaua ke lea fakamālō ‘i he taimi ‘oku fai mai ai ‘e he ni‘ihi kehé ha ngaahi me‘a lelei ma‘a kitaua, ‘ikai ko ia? ‘I he taimi na‘e ‘i māmani ai ‘a e Faiako Lahí, na‘e ‘i ai ‘a e kau kilia na‘e ngalo ‘ia kinautolu ke lea fakamālō.

‘Okú ke ‘ilo ‘a e me‘a ‘oku hoko ki he tokotaha ‘oku kiliá?— Ko e mahaki ko iá ‘oku a‘u ‘o malava ke ne ‘ai ‘a e kili ‘o e tokotahá ke ngangana. ‘I he taimi na‘e mo‘ui ai ‘a Sīsū ‘i he māmaní, ko e kau kiliá na‘e pau ke nau nofo mavahe mei he kakai kehé. Pea kapau na‘e sio ha tokotaha kilia ki ha taha kehe ‘oku ha‘u, na‘e pau ke ne kaila le‘o-lahi ke fakatokanga ki he tokotaha ko iá ke fakamama‘o meiate ia. Na‘e fai ‘a e me‘á ni koe‘uhi ke ‘oua na‘a fu‘u ofi atu ‘a e kakai kehé pea ma‘u nai ai ‘a e mahaki ‘o e tokotaha kiliá.

Na‘e anga-lelei ‘aupito ‘a Sīsū ki he kau kiliá. ‘I he ‘aho ‘e taha ‘i he‘ene fononga ki Selusalemá, na‘e pau ke fou ‘a Sīsū ‘i ha ki‘i kolo si‘isi‘i. ‘I he‘ene fakaofiofi ki he koló, na‘e ‘alu atu ha kau kilia ‘e toko hongofulu ke fakafetaulaki kiate ia. Na‘a nau fanongo na‘e ma‘u ‘e Sīsū ‘a e mālohi mei he ‘Otuá ke fakamo‘ui ‘a e fa‘ahinga mahaki kotoa pē.

Na‘e ‘ikai ke ofi ‘a e kau kiliá kia Sīsū. Na‘a nau tu‘u pē mei he mama‘ó. Ka na‘a nau tui ‘e malava ‘e Sīsū ke ne to‘o honau kiliá. Ko ia, ‘i he  sio ‘a e kau kiliá ki he Faiako Lahí, na‘a nau kaila atu kiate ia: ‘Sīsū, Faiako, tokoni mai!’

‘Okú ke faka‘ofa‘ia ‘i he kakai ‘oku puké?— Na‘e pehē ‘a Sīsū. Na‘á ne ‘ilo ‘a e fakamamahi mo‘oni ‘o e hoko ko ha kiliá. Ko ia, na‘á ne tali kia kinautolu ‘o ne pehē: “Mou ō pe, ‘o fakaha kimoutolu ki he kau taula‘eiki.”—Luke 17:11-14.

Ko e hā na‘e tala ange ai ‘e Sīsū ke nau fai ‘a e me‘a ko ení? Koe‘uhí ko e lao na‘e foaki ‘e Sihova ki Hono kakaí ‘o fekau‘aki mo e kau kiliá. Na‘e pehē ‘i he lao ko ení ko e taula‘eiki ‘a e ‘Otuá na‘e pau ke ne vakai‘i ‘a e kakano ‘o ha tokotaha kilia. ‘E toki tala ‘e he taula‘eikí ki he tokotaha kiliá ‘a e taimi kuo mole kotoa ai meiate ia ‘a hono mahakí. ‘I he taimi na‘á ne sai aí, ‘e toe lava leva ke ne nofo mo e kakai mo‘ui leleí.—Livitiko 13:16, 17.

 Ka ko e kau kilia ia ko ení na‘a nau kei puke pē. Ko ia, na‘a nau ‘alu nai ki he taula‘eikí ‘o hangē ko hono tala ‘e Sīsū kia kinautolú?— ‘Io, na‘a nau fai pehē, ‘o ‘ikai toe tatali. Kuo pau pē na‘e tui ‘a e kau tangatá ni ‘e fakamo‘ui ‘e Sīsū honau mahakí. Ko e hā na‘e hokó?

Sai, lolotonga ‘enau kei fononga atu ki he taula‘eikí, na‘e mavahe meiate kinautolu honau mahakí. Na‘e mo‘ui honau kakanó. Na‘a nau sai! Ko ‘enau tui ki he mālohi ‘o Sīsuú na‘e fakapale‘i. Ko ha fiefia ē na‘a nau ongo‘í! Ka, ko e hā leva ‘a e me‘a na‘e totonu ke nau fai ke fakahaa‘i ai ‘enau fakamāloó? Ko e hā na‘á ke mei faí?—

Ko e taha ‘i he kau tangata na‘e fakamo‘uí na‘e foki mai kia Sīsū. Na‘e kamata ke ne fakalāngilangi‘i ‘a Sihova, ‘o lea‘aki ‘a e ngaahi me‘a lelei fekau‘aki mo e ‘Otuá. Ko e me‘a totonu ia ke faí koe‘uhi ko e mālohi ke fakamo‘ui iá na‘e ha‘u mei he ‘Otuá. Na‘e toe tō foki ‘a e tangatá ki lalo ‘i he va‘e ‘o e Faiako Lahí ‘o ne fakamālō kiate ia. Na‘á ne hounga‘ia ‘aupito ‘i he me‘a na‘e fai ‘e Sīsuú.

Kae fēfē ‘a e kau tangata ‘e toko hiva kehé? Na‘e ‘eke ‘e Sīsū: ‘ ‘Ikai na‘e toko hongofulu ‘a e kau kilia na‘e fakamo‘uí? Ko fē ‘a e toko hiva ko eé? Ko e toko taha pē na‘e foki mai ke fai ha fakalāngilangi ki he ‘Otuá?’

 ‘Io, ko e mo‘oni. Ko e tokotaha pē ‘o e toko hongofulú na‘á ne fai ha fakalāngilangi, pe fakamālō ki he ‘Otuá peá ne foki mai ke fakamālō kia Sīsuú. Pea ko e tokotahá ni ko ha Samēlia, ko ha tangata mei ha fonua kehe. Ko e kau tangata kehe ‘e toko hivá na‘e ‘ikai te nau fakamālō ki he ‘Otuá, pea na‘e ‘ikai te nau fakamālō kia Sīsū.—Luke 17:15-19.

Ko fē ‘i he kau tangata ko iá ‘okú ke tatau mo iá? ‘Okú ta loto ke hangē ko e tangata Samēliá, ‘ikai ko ia?— Ko ia, ‘i he taimi ‘oku fai mai ai ‘e ha taha ha me‘a lelei kia kitaua, ko e hā ‘oku totonu ke ta manatu‘i ke faí?— ‘Oku fiema‘u ke ta fakahaa‘i ‘eta fakamāloó. ‘Oku fa‘a ngalo ‘i he kakaí ke lea fakamālō. Ka ‘oku lelei ke lea fakamālō. ‘I he‘eta fai iá, ko Sihova ko e ‘Otuá mo hono ‘Aló, ‘a Sīsū, ‘okú na fiefia ai.

Kapau te ke fakakaukau ki ai, te ke manatu‘i ai na‘e fai atu ‘e he kakaí ‘a e ngaahi me‘a lahi ma‘au. Ko e fakatātaá, kuó ke puke nai ‘i ha taimi?— Kuo ‘ikai ‘aupito nai ke hangē ho‘o puké ko e kau kilia ‘e toko hongofulú, ka kuó ke a‘usia nai ha fofonu lahi pe ko ha langa ho keté. Na‘e tokanga‘i koe ‘e ha taha?— Na‘a nau ‘oatu nai kia koe ha faito‘o mo fai ha ngaahi me‘a kehe ma‘au. Na‘á ke fiefia ‘i he‘enau tokoni‘i koe ke ke sai angé?—

Na‘e fakamālō ‘a e tangata Samēliá kia Sīsū ‘i hono ‘ai ia ke ne saí, pea na‘e ‘ai ‘e he me‘á ni ke fiefia ‘a Sīsū. ‘Okú ke fakakaukau ‘e fiefia ‘a ho‘o fa‘eé pe tamaí kapau te ke fai ha lea fakamālō ‘i he‘ena fai ha ngaahi me‘a ma‘au?— ‘Io, te na fiefia.

‘Oku fai ‘e he kakai ‘e ni‘ihi ha ngaahi me‘a ma‘au ‘i he ‘aho kotoa pē pe uike kotoa pē. Ko ‘enau ngāué nai ia ke fai ‘a e ngaahi me‘a ko ení.  ‘Oku a‘u nai ‘o nau fiefia ke fai ia. Ka ‘e ngalo nai ‘ia koe ke ke lea fakamālō. ‘Oku ngāue mālohi nai ‘a ho‘o faiakó ke tokoni‘i koe ke ke ako. Ko ‘ene ngāué ia. Ka te ne fiefia kapau te ke fakamālō kiate ia ‘i hono tokoni‘i koe ke ke akó.

‘I he taimi ‘e ni‘ihi, ‘oku fai pē ‘e he kakaí ha fanga ki‘i me‘a iiki ma‘au. Kuo fakaava nai ‘e ha taha ‘a e matapaá kia koe ‘i ha taimi? Pe kuo ‘oatu nai ‘e ha taha ‘a e me‘akaí kia koe ‘i he tēpile kaí? ‘Oku lelei ke lea fakamālō ‘o a‘u ki he fanga ki‘i me‘a iiki ko ení.

Kapau ‘okú ta manatu‘i ke fai ha lea fakamālō ki he kakai ‘i he māmaní, pea ‘oku ngalingali te ta manatu‘i ke fai ha lea fakamālō ki he‘eta Tamai ‘oku ‘i hēvaní. Pea he lahi mo‘oni ko e ngaahi me‘a ke ta fakamālō ai kia Sihová! Na‘á ne foaki mai kia kitaua ‘a e mo‘uí pea mo e ngaahi me‘a lelei kotoa pē ‘okú ne ‘ai ke fakamānako ‘a e mo‘uí. Ko ia, ‘okú ta ma‘u ai ‘a e ‘uhinga kotoa pē ke fai ha fakalāngilangi ki he ‘Otuá ‘aki ‘a e lea‘aki ha ngaahi me‘a lelei ‘o fekau‘aki mo ia ‘i he ‘aho taki taha.