Cibalo 18

Sena Ulayeeya Kulumba?

SENA kuli cakulya ncowalya sunu?— Sena ulimuzyi wacijika?— Ambweni mbaanyoko bacijika naa muntu uumbi buyo, pele ino nkaambo nzi ncotweelede kumulumba Leza akaambo kacilyo eeco?— Nkaambo Leza nguupa kuti zilyo kazikomena. Pele alimwi tweelede kumulumba awooyo wacijika cakulya naa iwatupa cakulya.

Zimwi ziindi tulaluba kulumba eelyo bamwi nobatucitila zintu zibotu, tee kayi? Eelyo Mwiiyi Mupati naakali anyika, kwakali basicinsenda bamwi ibakaluba kumulumba.

Sena ulimuzyi muntu sicinsenda?— Sicinsenda mmuntu uujisi bulwazi butegwa cinsenda naa cipele. Ibulwazi oobo bulakonzya kupa kuti nyama imwi yamuntu ooyo uuciswa iyeyemuke akutalika kulokela ansi. Eelyo Jesu naakali anyika, basicinsenda bakali kukkala kule abantu bambi batakali kuciswa. Alimwi ikuti sicinsenda wabona muntu uumbi kazya kulinguwe, wakeelede koongolola kutegwa amucenjezye muntu ooyo amutantamuke. Eeci cakali kucitwa ikutegwa ibantu bambi batasiki munsi-munsi akutambukilwa bulwazi bwasicinsenda.

Jesu wakali siluse kapati kuli basicinsenda. Bumwi buzuba naakali kuya ku Jerusalemu, Jesu wakainda mumunzi umwi. Eelyo naakasika munsi aamunzi ooyo, kwakamusikila basicinsenda bali kkumi. Bakalimvwide kuti Jesu wakalijisi nguzu kuzwa kuli Leza zyakuponya misyobo yoonse yamalwazi.

Basicinsenda aabo tiibakaswena munsi lya Jesu pe. Bakaima kulamfwu anguwe. Pele bakali kusyoma kuti Jesu wakali kukonzya kuponya cinsenda cabo. Aboobo eelyo basicinsenda nobakamubona Mwiiyi Mupati, bakamwiita ategwa: ‘Jesu, Omwiiyi, tugwasye!’

 Sena ulabafwida luse bantu bacisidwe?— Jesu wakabafwida luse. Wakalizyi mbocicisa ikuba sicinsenda. Aboobo wakabaingula kuti: “Kamuya mukalitondezye kubapaizi.”—Luka 17:11-14.

Ino nkaambo nzi Jesu ncaakabaambila kuti bacite boobo? Nkaambo kamulawo Jehova ngwaakapede bantu bakwe kujatikizya basicinsenda. Imulawo ooyu wakali kwaamba kuti mupaizi wa Leza wakeelede kuulanga-langa mubili wasicinsenda. Imupaizi wakali kukonzya kwaambila sicinsenda eelyo bulwazi bwakwe boonse nobwapona. Eelyo naapona, wakali kukonzya kukkala alimwi abantu bali kabotu.—Levitiko 13:16, 17.

Pele basicinsenda aaba bakacili balwazi. Aboobo, sena bakaunka kumupaizi mbubwenya Jesu mbwaakabaambila?— Inzya, bakacita  oobo cakufwambaana ndilyonya eelyo. Aaba baalumi bakasyoma kuti Jesu wakali kunoobaponya ncobeni. Ino ncinzi cakacitika?

Nobakacili munzila kabaya kumupaizi, bakapona. Imibili yabo yakasalazyigwa. Bakaba kabotu! Ilusyomo ndobakajisi munguzu zya Jesu lwakazuzikizyigwa. Elo bakakkomana kapati kaka! Pele, ino ncinzi lino ncobakeelede kucita kutegwa batondezye kulumba kwabo? Ino ncinzi ncowakali kunga wacita yebo?—

Omwe akati kabaalumi aabo bakaponesyegwa wakapiluka kuli Jesu. Wakapa bulemu kuli Jehova Leza akumutembaula. Eeco cakali cintu ciluzi ncaakacita akaambo kakuti inguzu zyakamuponya zyakazwide kuli Leza. Imwaalumi ooyo alimwi wakafwugamina Mwiiyi Mupati akumulumba kapati. Wakamulumba kapati Jesu kuli ceeco ncaakamucitila.

Pele ino mbuti kujatikizya baalumi bambi aabo bali fwuka? Jesu wakabuzya kuti: ‘Kwaponesegwa bantu bali kkumi, tee kayi? Ino bali fwuka bali kuli? Sena kwaboola buyo omwe kuzoolumba Leza?’

Inzya, aayo mmasimpe. Alikke omwe akati kabaabo bali kkumi nguwakamulumba akumutembaula Leza, alimwi akupiluka kuzyoolumba  Jesu. Alimwi muntu ooyu iwakacita boobo wakali muna Samariya, imuntu wakali kuzwa kucisi cimbi. Ibaalumi bambi aabo bali fwuka kunyina nobakamulumba Leza alimwi a Jesu.—Luka 17:15-19.

Ino nguni akati kabaalumi aabo ngokozyenye limwi? Tuyanda kuba mbuli mwaalumi muna Samariya, tee kayi?— Aboobo eelyo muntu umwi natucitila cintu cimwi cibotu, ncinzi ncotweelede kuyeeya kucita?— Tweelede kumulumba. Ikanjikanji bantu balaluba kulumba. Pele ikulumba ncintu ciyandika kapati. Eelyo notucita boobo, Jehova Leza alimwi a Mwanaakwe Jesu, balakkomana.

Ikuti waayeeyela makani aaya, ulakonzya kwiibaluka kuti nzinji kapati zintu zibotu bantu nzibakucitila. Mucikozyanyo, sena kuli buzuba nookacisidwe?— Ulakonzya kotanacisidwe bulwazi bupati kapati mbuli bwacinsenda mbubakali kuciswa aabo bali kkumi, pele ulakonzya kuti wakaciswa syini akkolokolo naa mwida. Sena kuli muntu wakali kukulanganya?— Balakonzya kuti bakakupa musamu akukucitila zintu zimbi zinji. Sena wakakkomana kuti bakakugwasya kuti upone?—

Imwaalumi muna Samariya wakamulumba Jesu kuti wakamuponya, alimwi eeci cakamupa kukkomana Jesu. Sena uyeeya kuti banyoko naa bauso bayookkomana waakubalumba eelyo nobakucitila zintu zimwi?— Inzya, bayookkomana.

Ibantu bamwi balakucitila zintu abuzuba naa ansondo. Ulakonzya kauli ngomulimo wabo kucita zintu eezyi. Alimwi balakonzya kabakkomene  nobacita mulimo ooyo. Pele ulakonzya kuluba kubalumba. Ibayi bako kucikolo balakonzya kubeleka canguzu kukugwasya kuti wiiye. Ooyu mmulimo wabo. Pele bayookkomana ikuti wabalumba akaambo kakukuyiisya.

Zimwi ziindi bantu balakonzya kukucitila tuntu tusyoonto buyo. Sena kuli muntu umwi wakakugwasya kuyumuna cintu cimwi cilemu? Naa sena kuli uukubikkila cakulya nomulya? Ncibotu kulumba nomuba mutuntu ootu tusyoonto.

Ikuti katuyeeya kubalumba bantu bali anyika, nkokuti tatukalubi pe kumulumba Taateesu uuli kujulu. Alimwi elo tazilivwulili kaka zintu nzyotukonzya kumulumbila mpawo Jehova! Wakatupa buumi alimwi azintu zyoonse zibotu izipa kuti buumi kabukkomanisya. Aboobo tulijisi twaambo tunji ncotweelede kumulemekela Leza kwiinda mukwaamba majwi aakumutembaula buzuba abuzuba.

Ikujatikizya kulumba, inga wabala Intembauzyo 92:1; Ba-Efeso 5:20; Ba-Kolose 3:17; alimwi a 1 Ba-Tesalonika 5:18.

[Cifwanikiso icili apeeji 98]

Ino Jesu ubaambila kuti bacite nzi basicinsenda aaba?

[Cifwanikiso icili apeeji 99]

Ino ncinzi sicinsenda ooyu uuli mucifwanikiso ncaakayeeya kucita?

[Cifwanikiso icili apeeji 100]

Ino mbuti mbonga wamwiiya sicinsenda wakapiluka kuli Jesu?

[Zifwanikiso izili apeeji 101]

Ino nkaambo nzi ncociyandika lyoonse kulumba?