KASI muhanya wuno wangurya cakurya?— Kasi wamumanya uyo wanguphika?— Nyengo zinyake ŵanyoko ndiwo ŵanguphika panji muntu munyake, kweni kasi ncifukwa wuli tikwenera kuwonga Ciuta cifukwa ca cakurya?— Cifukwa ni Ciuta uyo wakupangiska mbewu kumera izo zikutipa vyakurya. Ndipouli, tikweneraso kuwonga uyo watiphikira cakurya panji uyo watitolera kufuma uko ŵanguphikira.

Nyengo zinyake tikuruwa kuwonga para ŵanyithu ŵaticitira vintu viweme, asi ntena? Apo Msambizgi Waluso wakaŵa pa caru capasi, pakaŵa ŵavyoni ŵanyake awo ŵakaruwa kuwonga.

Kasi wavyoni ukumumanya?— Wavyoni ni muntu uyo wakurwara vyoni. Ntenda iyi yingapangiska munofu wa muntu kunyeka. Apo Yesu wakaŵa pa caru capasi, ŵantu ŵavyoni ŵakakhalanga kutali na ŵantu ŵanyake. Ndipo usange muntu wavyoni wawona muntu wakwiza kufupi na iye, wakacenjezganga mwakucemerezga kuti muntu uyo wakhale kutali. Ici cikacitikanga mwakuti ŵantu ŵanyake ŵareke kwiza kufupi kucitira kuti nyengo zinyake ntenda yingaŵayambukira.

Yesu wakaŵa walusungu comene ku ŵavyoni. Zuŵa limoza apo wakarutanga ku Yerusalemu, Yesu wakajumpa mu tawuni yinyake. Wakati wafika pafupi na tawuni iyi, ŵavyoni khumi ŵakiza kuti ŵakumane nayo. Iwo ŵakapulika kuti Yesu wali na nkongono zakufuma kwa Ciuta zakucizgira matenda ghalighose.

Ŵavyoni ŵara ŵakiza kufupi na Yesu yayi. Ŵakimilira kutali. Kweni ŵakaŵa na cigomezgo kuti Yesu wangacizga vyoni vyawo. Nteura ŵavyoni ŵara ŵati ŵawona Msambizgi Waluso, ŵakacemerezga wakati: ‘Yesu, Msambizgi, tovwirani!’

 Kasi iwe ukucitira lusungu ŵantu awo mbarwari?— Yesu wakaŵacitiranga lusungu. Wakamanyanga umo cikaŵira cacitima kuŵa wavyoni. Anteura wakaŵazgora wakati: “Rutaninge, mukajirongore ku ŵasofi.”—Luka 17:11-14.

Ncifukwa wuli Yesu wakaŵaphalira kuti ŵakajirongore ku ŵasofi? Cikaŵa cifukwa ca dango ilo Yehova wakapereka ku ŵantu Ŵake lakukhwaskana na ŵantu ŵavyoni. Dango ili likati musofi wa Ciuta wakeneranga kuwona munofu wa muntu wavyoni. Pamanyuma pakumuwona, musofi wakeneranga kuphalira muntu wavyoni para matenda ghake ghamara. Para wacira, wakakhalangaso na ŵantu awo ŵali makora.—Leviticus 13:16, 17.

Kweni ŵavyoni aŵa matenda ghawo ghakaŵa ghacali. Nteura, kasi  ŵakaruta kwa musofi nga ni umo Yesu wakaŵaphalira?— Enya, ŵakaruta nyengo yeneiyo. Ŵanarumi aŵa ŵakwenera kuti ŵakagomezga kuti Yesu wangacizga matenda ghawo. Kasi ncivici ico cikacitika?

Peneapo ŵakaŵa mu ntowa kuruta kwa musofi, matenda ghawo ghakamara. Munofu wawo ukacizgika. Ŵakaŵa makora! Cigomezgo cawo mu nkongono ya Yesu ŵakasanga naco candulo. Mwee, naco ncimwemwe ico ŵakaŵa naco! Kweni, sono, kasi ncivici ico ŵakeneranga kucita kuti ŵarongore kuwongera kwawo? Kasi iwe ukatenge ucitenge wuli?—

Yumoza wa ŵanarumi awo wakacizgika wakizaso kwa Yesu. Wakamba kupereka ucindami kwa Yehova, kuyowoya vintu viweme vyakukhwaskana na Ciuta. Iye wakacita makora kurumba Ciuta cifukwa nkongono yakumucizgira yikafuma kwa iye. Mwanarumi yura wakawaso pasi pa marundi gha Msambizgi Waluso na kumuwonga. Wakawongera comene ico Yesu wakacita.

Kweni wuli pakuyowoya za ŵanarumi ŵanyake ŵankonde na ŵanayi ŵara? Yesu wakafumba kuti: ‘Asi awo ŵakatozgeka ŵakaŵa khumi, ŵanyake ŵankonde na ŵanayi ŵali nkuni? Kasi njumoza pera uyo wiza kuzakapereka ucindami kwa Ciuta?’

 Enya, mbunenesko nadi. Pa ŵanarumi khumi ŵara, yumoza pera ndiyo wakapereka ucindami, panji marumbo, kwa Ciuta na kwizaso kuzakamuwonga Yesu. Ndipo mwanarumi uyu wakaŵa Musamariya, muntu wa ku caru cinyake. Ŵanarumi ŵanyake ŵankonde na ŵanayi ŵara ŵakamuwonga yayi Ciuta, ndiposo ŵakamuwonga yayi Yesu.—Luka 17:15-19.

Kasi iwe uli nga ni njani pa ŵanarumi aŵa? Tikukhumba kuŵa nga ni mwanarumi Musamariya, asi ntena?— Nteura, kasi tikwenera kukumbukira kucitaci para muntu munyake waticitira vintu viweme?— Tikwenera kumuwonga. Nyengo zinandi ŵantu ŵakuruwa kuwonga. Kweni mbuweme kuwonga. Para tikucita nteura, Yehova Ciuta na Mwana wake, Yesu, ŵakukondwa.

Usange ungakumbuka, uwonenge kuti ŵantu ŵakucitira vintu viweme vinandi. Mwaciyerezgero, kasi uli kurwarapo?— Utepanji undarwarepo nga ni umo ŵakarwalira ŵavyoni khumi ŵara, kweni nyengo zinyake ungaŵa kuti ukarwarapo cikhoso panji mu nthumbo. Kasi muntu munyake wakakupwererera?— Nyengo zinyake ŵakakupa munkhwara na kukucitira vintu vinyake. Kasi iwe ukakondwa kuwovwirika kuti uŵe makora?—

Mwanarumi Musamariya wakamuwonga Yesu cifukwa ca kumucizga, ndipo ici cikamukondweska Yesu. Kasi ukughanaghana kuti ŵanyoko na ŵawuso ŵakukondwa usange iwe waŵawonga para ŵakucitira vintu viweme?— Enya, ŵakukondwa.

Ŵantu ŵanyake ŵakukucitira vintu viweme zuŵa lirilose panji sabata  yiliyose. Nyengo zinyake yingaŵa ncito yawo kucita vintu ivi. Iwo ŵangaŵa kuti ŵakukondwa kucita vintu ivi. Kweni iwe ungaruwa kuŵawonga. Ŵasambizgi ŵako ŵangalimbikira comene kukovwira kuti usambire. Iyi ni ncito yawo. Kweni ŵangakondwa comene usange ungaŵawonga cifukwa ca kukovwira kuti usambire.

Nyengo zinyake ŵantu ŵakukucitira tuntu tucoko-tucoko. Kasi muntu wali kukujulirapo cijaro kuti unjire? Panji kukutolera cakurya para cili kutali? Mbuweme kuwonga nanga muntu wangakucitira tuntu tucoko-tucoko.

Usange tikukumbuka kuŵawonga ŵantu ŵa pa caru capasi, mbwenu tiruwenge yayi kuwonga Ŵadada ŵithu ŵakucanya. Ndipo pali vintu vinandi comene ivyo tikwenera kuwonga Yehova! Wali kutipa umoyo na vintu viweme vyose ivyo vikupangiska umoyo kuŵa wakukondweska. Nteura tiri na vifukwa vyakukwanira vyakuperekera ucindami kwa Ciuta, ndipo tingacita nteura mwakuyowoya vintu viweme vyakukhwaskana na iye zuŵa lirilose.