KO OTI koe ne kai i te aso nei?— E iloa ne koe me ko oi ne fakatoka ne ia a meakai?— Kāti ko tou mātua io me se tino fakaatea, kae kaia e ‵tau ei o fakafetai atu tatou ki te Atua mō meakai?— Ona ko te mea ne fai ne te Atua ke mafai o maua a meakai i te lalolagi. Kae e ‵tau foki o fakafetai tatou ki te tino telā ne kuka ne ia io me ko te tino telā e laulau ne ia a meakai mō tatou.

I nisi taimi e puli i a tatou ke fakafetai atu māfai ko fai mai ne nisi tino a mea ki a tatou, ne? I te taimi ne nofo ei a te Faiakoga Sili i te lalolagi, e isi ne nai tino lepela kolā ne puli i a latou ke fakafetai atu.

E iloa ne koe me se a te tino lepela?— A te tino lepela se tino telā e maua ne te masaki e igoa ki te lepela. E mafai ne te masaki tenā o fai a pa‵kili o te tino ke ‵to keatea. I te taimi ne nofo ei a Iesu i te lalolagi, ne ‵tau o ‵nofo fakaatea a tino lepela mai nisi tino. Kae kafai e lavea ne se tino lepela a te suā tino e fakapilipili atu, ne ‵tau o kalaga a ia o fakailoa atu ke faka‵mao keatea. E fai te mea tenei ko te mea ke se tō fakapili‵pili atu a nisi tino kae ‵pisi i te masaki ko te lepela.

Ne atafai malosi a Iesu ki tino lepela. I te aso e tasi i tena auala ki Ielusalema, ne ‵tau o fanatu a Iesu e auala i se tamā fa‵kai. I te taimi ko pili atu ei a ia ki te fa‵kai tenei, ne olo atu a tino lepela e toko sefulu o fakafetaui atu ki a ia. Ne lagona ne latou me e isi se ‵mana o Iesu mai te Atua ke faka‵lei a vaegā masaki valevale.

Ne seki fakapili‵pili atu a tino lepela ki a Iesu. Ne ‵tu ‵mao latou. Kae ne tali‵tonu latou me e mafai o faka‵lei ne Iesu olotou lepela. Tela la, i te taimi ne lavea ei ne tino lepela a te Faiakoga Sili, ne ka‵laga atu latou ki a ia: ‘Iesu, te Faiakoga, fesoasoani mai ki a matou!’

 E mata, e alofa koe ki tino kolā e ma‵saki?— Ne penā eiloa a lagonaga o Iesu. Ne iloa ne ia a te fakafanoanoa o te tulaga tenā ki se tino lepela. Tela la, ne tali atu a ia ki a latou kae fai atu: “Olo o fakaasi atu koutou ki faitaulaga.”—Luka 17:11-14.

Kaia ne fai atu ei a Iesu ki a latou ke fai te mea tenei? Ona ko te tulafono telā ne tuku atu ne Ieova ki Ana tino e uiga ki tino lepela. Ne fai mai i te tulafono tenei me e ‵tau o iloilo aka ne te faitaulaga a te Atua a te pakili o se tino lepela. E ‵tau o iloa ne te faitaulaga me ko ‵lei katoatoa loa tena masaki. Kafai ko ‵lei a ia, ko mafai ei o toe ‵nofo fakatasi a ia mo tino.—Levitiko 13:16, 17.

Kae koi seki ‵lei katoa a ma‵saki o tino lepela konei. Tela la, e mata,  ne olo atu latou ki te faitaulaga e pelā mo mea ne fai atu ne Iesu ki a latou?— Ao, ne olo ‵tonu atu eiloa latou. Ne ‵tau o tali‵tonu a tāgata konei me ka ave keatea ne Iesu olotou ma‵saki. Ne a mea ne ‵tupu?

Ia, i te lotou auala ki te faitaulaga, ne ‵lei eiloa olotou ma‵saki. Ne ‵mafu olotou pa‵kili. Ne ‵lei eiloa latou! Ne maua ne latou te lotou taui ona ko te lotou tali‵tonu ki te ‵mana o Iesu. Ko se faka‵tau eiloa i te lotou fia‵fia! Kae nei la, ne a mea ne ‵tau o fai ne latou ke fakaasi atu te lotou loto fakafetai? Ne a au mea ka fai moi ko koe tenā?—

Ne toe foki atu ki a Iesu se tagata e tokotasi telā ko ‵lei tena masaki. Ne kamata o tavae atu a ia ki a Ieova, mai i te fai atu o pati ‵lei e uiga ki te Atua. Tenā eiloa te mea ‵lei e ‵tau o fai ona ko te mea ne aumai mai te Atua a te ‵mana telā ne faka‵lei ei a ia. Ne fakasiga ifo a te tagata ki vae o te Faiakoga Sili kae fakafetai atu ki a ia. Ne fiafia malosi a ia ki te mea ne fai ne Iesu.

Kae e a te suā toko iva? Ne fesili atu a Iesu: ‘E toko sefulu a tino lepela ne faka‵lei olotou ma‵saki, ne? Kofea te suā toko iva? E a, e tokotasi fua ne toe foki mai o avatu a tavaega ki te Atua?’

Ao, e tonu. E tokotasi fua mai i  te toko sefulu ne tavae atu ki te Atua kae ne toe foki o fakafetai atu ki a Iesu. Kae ko te tino tenei se Samalia, se tagata mai i te suā fenua. Ne seki fakafetai atu a te suā toko iva ki te Atua, kae ne seki fakafetai atu foki latou ki a Iesu.—Luka 17:15-19.

Ko oi i tāgata konei e manako koe ke fai pelā mo ia? E ma‵nako tatou ke fai pelā mo te tagata Samalia, ne?— Tela la, kafai e fai ne se tino se mea ‵lei ki a tatou, se a te mea e ‵tau o masaua ne tatou ke fai?— E ‵tau o fakafetai atu tatou ki a ia. E masani o puli i tino o fakafetai atu. Kae se mea ‵lei ke fakafetai atu. Kafai e fai tatou penā, ka fia‵fia eiloa a Ieova te Atua mo tena Tama, ko Iesu.

Kafai e mafaufau koe e uiga ki ei, ka masaua ne koe me ne fai ne tino a mea e uke mō koe. E pelā mo te mea tenei, kai masaki aka eiloa koe?— Kāti e seki masaki malosi koe e pelā mo tino lepela e toko sefulu konā, kae kāti ne poko koe ne te famai io me ne ‵mae tou tinae. E mata, e isi se tino ne tausi atu ki a koe?— Kāti ne tuku atu ne latou ne vailakau kae fai a nisi mea mō koe. E mata, ne fiafia koe me ne fesoasoani atu latou ke ‵lei koe?—

Ne fakafetai atu a te tagata Samalia mō te faka‵leiga o tena masaki, kae ne fai ne te mea tenei ke fiafia a Iesu. E mata, e mafaufau koe me ka fia‵fia tou mātua mo tou tamana māfai e fakafetai atu koe ki a lāua mō mea kolā ne fai ne lāua mō koe?— Ao, ka fia‵fia eiloa lāua.

E fai ne nisi tino a mea mō koe i aso katoa io me ko vaiaso katoa. Kāti e fai ei ne latou a mea konei ona ko olotou galuega ‵togi. E mafai  o fia‵fia foki eiloa latou o fai a mea konei. Kae kāti e mafai o puli i a koe o fakafetai atu. E mafai o galue malosi tou faiakoga ke fesoasoani atu ki a koe i au mea a‵koga. Tenei eiloa tena galuega. Kae ka fiafia malosi tou fafine māfai e fakafetai atu koe mō tena fesoasoani.

I nisi taimi e fai ne tino a tamā mea fo‵liki mō koe. Kai taofi aka eiloa ne se tino a te mataloa mō koe? Io me ne pāsi atu ne se tino a mea‵kai ki a koe i te taipola ‵kai? Se mea ‵lei ke fakafetai atu foki mō tamā mea penei.

Kafai e masaua ne tatou ke fakafetai atu ki tino i te lalolagi, ko mafai ei o masaua foki ne tatou ke fakafetai atu ki te ‵tou Tamana i te lagi. Kae e uke ‵ki eiloa a mea e ‵tau o fakafetai atu ei tatou ki a Ieova! Ne tuku mai ne ia te ola ki a tatou mo mea katoa kolā e fai ei te olaga ke fiafia. Tela la, e maua ne tatou a pogai e uke ke tavae atu ki te Atua mai i te fai atu o mea ‵gali e uiga ki a ia i aso takitasi.