OU KONN okenn manrmay ki sey fer konmsi zot gran e pli for ki tou lezot manrmay?— Ou kontan zwe avek zot? Oubyen ou pli kontan pas letan avek en dimoun ki zantiy e pa kontan lager?— Sa Gran Ansennyan ti dir: “Byennere bann ki fer lape, akoz zot pou ganny apele bann garson Bondye.”—Matye 5:9.

Me parfwa i annan dimoun ki fer bann keksoz ki fer nou ankoler. Pa i vre?— Sa i fer nou anvi fer zot en keksoz. En fwa sa ti arive avek bann disip Zezi ler zot ti pe al Zerizalenm avek Zezi. Mon a rakont ou ki ti arive.

Apre ki zot ti’n mars en bon zistans, Zezi ti anvoy ennde son bann disip dan en vilaz Samariten pour rod en landrwa pour zot repoze. Me bann Samariten pa ti oule zot reste laba akoz zot larelizyon ti diferan.  Zot pa ti kontan bann dimoun ki al Zerizalenm pour ador Bondye.

Ki ou ti pou fer si sa ti’n ariv avek ou? Ou ti pou ankoler? Ou ti pou anvi fer zot en keksoz?— Sanmenm ki disip Zak ek Zan ti oule fer. Zot ti dir Zezi: “Ou dakor ki nou fer dife sorti dan lesyel e detri sa bann dimoun?” Sanmenm Zezi ti apel zot Garson Loraz! Zezi ti dir zot i mal pour tret dimoun dan sa fason.—Lik 9:51-56; Mark 3:17.

I vre parfwa dimoun i kapab brit avek nou. Lezot zanfan i kapab pa anvi nou zwe avek zot. Zot menm kapab dir: “Nou pa byen avek ou nou.” Pa gou letan en keksoz koumsa i arive, pa i vre? Petet nou osi nou anvi fer zot en keksoz. Me eski i byen pour fer sa?—

Pran en kou ou Labib. Annou get dan Proverb sapit 24, verse 29. I dir: “Pa dir: ‘Zis parey i’n fer avek mwan, mon pou fer parey avek li. Mon pou rann sakenn dapre son aksyon.’”

Eksplik mwan ki ou konpran par sa verse.— I pe dir sa ki en dimoun i fer avek nou, nou pa devret fer parey. Savedir si sa dimoun i brit avek nou, nou pa devret fer brit avek li nou osi. Be si en dimoun i rod lager avek ou? Petet i pe sey fer ou ankoler par donn ou en bann non. I riy ou e dir ou per li. Ki ou pou fer? Eski ou devret lager avek li?—

Annou vwar ki Labib i dir lo sa. Vir dan Matye sapit 5, verse 39. La Zezi i dir: “Pa tir vanzans lo en dimoun ki’n fer ou ditor. Si en dimoun i donn ou en kalot lo ou lazou drwat, prezant li ou lazou gos osi.” Ki Zezi ti pe dir la? Eski i ti pe dir si en dimoun i tap ou lo en kote lazou, ou devret les li tap ou lo lot kote lazou?—

 Non, Zezi pa ti pe dir sa. En kalot pa parey en koud-pwen. En kalot i en pe parey ler en dimoun i pous en lot pour rod lager avek li. Bann ki fer sa i anvi fer nou ankoler. E si nou ankoler, nou pous li nou osi, ki pou arive?— Be lager i kapab konmanse.

Me Zezi pa ti oule son bann disip lager. Alors i ti dir si en dimoun i donn nou en kalot, nou pa devret donn li en kalot nou osi. Nou pa devret ankoler e lager. Si nou fer sa, nou montre ki nou parey avek sa dimoun ki’n rod lager.

Ki pli bon keksoz pour fer ler problenm i konmanse?— Sorti ale. Petet sa lot dimoun pou pous ou oubyen tap ou ennde fwa. Me apre sa, i pou arete. Ler ou sorti e ale, sa pa vedir  ki ou fay. Okontrer i vedir ki ou for pour fer keksoz ki byen.

Be si ou pa kapab tenir, ou lager, e ou gannyen? Ki i kapab arive?— Apre sa dimoun ki ou’n bate i kapab vini avek son bann dalon. Zot kapab tap ou avek en baton oubyen menm pik ou avek en kouto. Alors, ou konpran akoz Zezi pa ti oule nou lager?—

Ki nou devret fer si nou vwar lezot dimoun pe lager? Eski nou devret pran kote avek enn?— Labib i dir nou ki fodre fer. Vir dan Proverb sapit 26, verse 17. I dir: “Sa enn ki pe pase e pe pran en gran lakoler akoz en kankan ki pa konsern li, i parey en dimoun ki pe graponn zorey en lisyen.”

Ki pou arive si ou graponn zorey en lisyen? I fer li dimal, e i pou anvi mord ou. Si sa lisyen i oule ale e ou ou tyonbo son zorey pli for ankor. Sa pou fer li pli ankoler ankor. Si aprezan ou les li ale, i kapab sot lo ou e mord ou byen for. Be selman, ou pa pou kapab debout la e tyonbo son zorey pa larg ditou, non?—

Sanmenm ki i arive ler nou mel nou dan en lager ki pa konsern nou. Petet nou pa ni konnen lekel ki’n konmans sa lager e akoz zot pe lager. Petet ou vwar en  dimoun pe ganny bate, me ou pa konnen si i’n vol keksoz sa lot dimoun. Si nou ed li, nou pe ed en voler. Sa pa byen, non?

Alors, ki ou devret fer ler ou vwar en lager?— Si i kot lekol, ou kapab taye e kriy en mis. Si i pa kot lekol, ou kapab al rod ou paran oubyen en gard. Wi, menm si serten dimoun i anvi lager, nou nou devret kontan lape.

Bann vre disip Zezi i fer tou sa ki zot kapab pour evite lager. Koumsa nou montre ki nou for pour fer keksoz ki byen. Labib i dir en disip Zezi ‘pa devret en dimoun ki fer lager. Okontrer, i devre byen avek tou dimoun.’—2 Timote 2:24.