Mekene 19

Hapeu, Ka Loi Kö e Troa Inyingë?

HAPEU, atre fe hi eö la itre xa nekö trahmany maine jajinyi ka catreqë?— Pi tro fe kö eö a hane ce elo me angatr, maine aja i eö troa nyi sineen la atre loi thiina me ka thele tingeting?— Önine la Atre Hamë Ini Ka Sisitria, ka hape: “Manathithi angete aloin, ke tro ha qeje angat’ ite nekö i Akötesie.”—Mataio 5:9.

Eje hi laka hna aelëhni së e itre xa ijin, hnene la aqane ujë i itre xan. Matre, pi tro së a itëkeun. Hna traqa tune ekö lai kowe lo itretre drei Iesu, ngöne lo angatr a ce tro me nyidrë Ierusalema eë. Tro ni a qeje pengöne koi eö.

Qea ha thupene la hnei angatre hna tro, Iesu a upe ju la itretre drei nyidrë kowe la ketre hunahmi ne Samaria, matre troa thele hnë mano i angatr. Ngo helë angatre pi hi hnene la itre atrene la hunahmi cili, pine laka isa hmi ne kö la angetre Samaria me angetre Iudra. Methi angatre la angetre hmi koi Iehova e Ierusalema.

 Maine hna traqa ju fe koi eö la jole cili, ke, tro ju hë eö a ujë tune kaa? Hapeu, tro jë kö eö a canga elëhni, me thele troa itëkeun?— Hna ujë tune hi lai hnei Iakobo me Ioane. Öni nyidro koi Iesu, ka hape: ‘Hapeu, aja i cilieti tro nyiho a qaja kowe la eë troa uti qa hnengödrai, matre troa dreuthe triji angatr?’ Celë hi lo aliene lai matre hë nyidroti jë hnei Iesu, ka hape, lue Nekö i Hedreng! Ngo Iesu a sa hmaca ju pe koi nyidro, ka hape, tha loi kö e troa ujë tune lai kowe la itre atr.—Luka 9:51-56; Mareko 3:17.

Hna kuca la ewekë ka ngazo koi së e itre xa ijin hnene la itre xa atr. Hanawange la ketre ceitun, maine jë hna xele hnene la itre xa nekönatr troa ce elo me eö. Öni angatr: “Tro pi, xele eahuni ma wai eö.” Maine kola ithanata koi së tune la, haawe, tha tro jë kö së lai a madrin, tune kaa la mekuna i eö? Hane hi lai easë a pi iatëkeun. Ngo hapeu, ka loi kö la troa iatëkeun?—

Xome jë la Tusi Hmitrötre i eö nge thele jë la tusi Ite Edomë mekene 24, xötre 29. Easa e ka hape: “The qaja kö, ka hape, Tro ni a kuca koi nyëne tune lo hnei nyëne hna kuca koi ni ; nge tro ni a të kowe la ate tune la huliwa i nyën.”

Nemene la aqane trotrohnine eö la trenge ewekë celë?— Kolo lai a qaja ka hape, tha tro pi kö sa thele troa iatëkeun. Ngacama akötrë së ju hë hnene la ketre atr, ngo tha tro pi kö sa të la ngazo i angeic. Ngo e traqa ju angeice thele isi me eö, me nyisi eö, me qaqa eö, me hnyimasai eö me qaja ka hape, i ka xou? Nge e öni angeice jë hi ka hape, xou i eö kö ma isi. Tro ju hë eö a ujë tune kaa? Hapeu, tro kö eö a xemine la hë isi angeice me lepi angeic?—

Tro hmaca nyiso a ce wange la hna qaja hnei Tusi Hmitrötr. Xome jë la tusi Mataio mekene 5, xötre 39. Iesu a qaja e celë ka hape: “The të kö la ngazo ; nge ame la ate xe la trasitre maca i ’ö, ujënejë fe la kete götrane koi angeic.” Nemene la aliene la trenge ewekë i Iesu celë? Hapeu, nyidrëti kö a qaja ka hape, maine troa jenge la ialameke së hnei ketre atr, tro hmaca kö sa nue angeice troa nyi hnaaluene jeng?—

 Ohea, tha aliene kö la trenge ithanata i Iesu lai, ke, isa pengöne kö la kola xe la itrasitre së memine la kola jei së. Ame la kola xe la itrasitre së hnene la ketre atr, tre, ceitu me kola iuku me thele isi me easë. Angeic a ijele trenge hni. Nge e elëhni fe hë së me uku angeic, nemene ju hë la ka troa traqa?— Tro hë së lai a itö isi.

Tha aja i Iesu kö troa isi hnene la itretre drei nyidrë. Hane hi lai kepine matre qaja jë nyidrëti ka hape, e xe së ju hnene la ketre atr, tha tro kö sa hane xe angeic. Kolo lai a hape, tha tro pi kö sa elëhni, me thele troa isi me angeic. Ke, maine tro sa ujë tui angeic, easë hi lai a amamane laka, tha isa pengö së kö me angeic.

E öhne jë eö laka, kola ha troa nyiqaane iwesitrë, nemene la ewekë ka loi nyine tro eö a kuca?— Pane tro triji angeice pi. Nge e nango penyi eö ju hnei angeic, the semesinene kö. Tro triji angeice pi, ke tha eö kö lai a xoue ma isi, ngo eö pe a amamane ka hape, aja i eö troa hetre tingeting.

 Pane mekune ju ka hape, thatreine ju hi eö xomihni; isi jë hi epon nge nga angeice pi hi hnei eö. Nemene ju hë la pune lai?— Ce uti jë hi troa lepi eö hnene lo itre sine ce elo ne lo nekönatr hnei eö hna ngaan. Hane hi lai kola lepe angazo eö hnei angatr, maine thinyi eö pena hnei hele. Hapeu, trotrohnine hë eö la kepine matre sewe së jë hnei Iesu troa isi?—

Nge maine tro eö a öhne la lue atr a isi, tro kö eö a hane nyixölene la ketre e nyidro?— Kola qaja hnei Tusi Hmitrötr la ewekë nyine tro sa kuca. Xome jë la Ite Edomë mekene 26, xötre 17. Easa e ka hape: “Ame la ate tro me hane sine la ikelikelë i kete ate kö, te, tune la ate xöle la lue ihnangenyë i vailai.”

Nemene hë la ewekë ka troa traqa, e xöle huje ju eö la lue ihnangenyë i vailai, ene la kuli? Ka akötre lai kowe ej, nge tro eje lai a ho me thele troa heji eö. Nge pine laka eje a thele catrëne troa utretr, tro ha jole catre koi eö troa ea catrëne la lue ihnangenyë ne ej, nge atre hi eö laka, e nue hë eö la lue ihnangenyë ne ej, tro hë eje lai a jipa me heji eö. Ngo hetre trenge catre i eö kö troa xolouthe paluane la lue ihnangenyë ne ej?—

Kola amamane hnene la ceitune celë la pune koi eö, e tro eö a lö hnine menune la ifekë isin. Thatre fe kö eö, ka hape, drei la ka nyiqaan nge pine nemen matre isi jë angatr. Maine jë tro eö a öhne la kola lepe angazone la ketre, ngo thatre kö eö ka hape, hnei angeice  hna atrekënö. Haawe, e traqa ju eö xatua angeic, eö hi lai a nyixölene la atrekënö. Matre, ka loi kö lai?

Matre, nemene ju hë la nyine tro eö a kuca, e öhne jë eö la itre atr a isi?— Maine e koilo ngöne la uma ne ini, canga nyenyape jë troa thuemacane la atre hamë ini. Maine kola isi e cahu gojeny, hë keme i eö jë maine thine i eö, maine polisi pena. Öhne hi eö, maine itre xa atr a thele isi, ngo ame easë, tro pala hi sa thele la tingeting.

Ame la atre drei Iesu, tre, tha aja i angeice fe kö troa thele isi. Angeice hi lai a amamane hnyawa la aja ka eje e kuhu hni angeic troa kuca la loi. Tune la hna qaja hnei Tusi Hmitrötr ka hape, “tha ijije kö la [atre drei Iesu] troa iwatratra ; ngo loi e menyike la thina kowe la nöjei ate asëjëihë.”—2 Timoteo 2:24.

Hanawange la itre eamo ka ananyi së qa ngöne la isi: Roma 12:17-21 me 1 Peteru 3:10, 11.

[Iatr ne la götran 102]

Nemene la hna thele troa kuca hnei Iakobo me Ioane kowe la angetre Samaria

[Iatr ne la götran 104]

Nemene la nyine tro eö a kuca ngöne la kola nyisi eö hnene la ketre atr?

[Iatr ne la götran 105]

Ame la easa lö hnine menune la kola isi hnene la itre xan, tre, ceitune hi lai memine la easa xöle huje la lue ihnangenyë ne la ketre kuli; tro së lai a eatr.

Haawe, the lö hnine menune kö la itre isi!

[Iatr ne la götran 106]

Nemene la nyine tro eö a kuca, e öhne jë eö la kola isi?