HAINE aboojo nari abaishiki abu orikumanya abarikukunda kurwana?— Nookunda kuba nabo? Nari nookunda kuba n’omuntu orikukunda obusingye kandi oine embabazi?— Omwegyesa Mukuru akagira ati: ‘Baine omugisha abarikurinda obusingye, ahabw’okuba abo baryayetwa abaana ba Ruhanga.’​—Matayo 5:9.

Kwonka obumwe abantu abandi nibakora ebintu ebirikutugwisa kubi, tikwo?— N’ahabw’ekyo nitubaasa kuhurira twayenda kurwana nabo. Omurundi gumwe ekyo kikaba aha beegi ba Yesu obu baabaire nibaza Yerusaalemu nawe. Ka nkugambire ekyabaireho.

Ku baabaire bari omu rugyendo, Yesu yaatuma bakye aha beegi be kugyenda omu kicweka ky’Abasamaria kutunga omwanya gw’okuhumuriramu. Kwonka abantu b’omu kicweka ekyo bakaba batarikwenda ngu bahuumurireyo ahakuba Abasamaria bakaba bari ab’ediini endiijo. Kandi bakaba  batakunda omuntu weena owaabaire aba naaza omu rurembo Yerusaalemu kuramya.

Ku ogire ngu ekyo kikaba ahariiwe, okaakozire ki? Okaba noija kuguubwa kubi ohika n’aha kwenda kurwana nabo?— Ekyo nikyo abeegi ba Yesu Yakobo na Yohaana baabaire nibenda kukora. Bakagambira Yesu bati: “Nooyenda turagiire omuriro gurugye omu iguru, gushuume gubacwekyereze?” Tikirikutangaaza okureeba ngu Yesu akabeeta Abaana b’Enkuba. Kwonka Yesu akabagira ngu kikaba kitahikire okutwariza abantu omu muringo ogwo.​—Luka 9:51-56; Mako 3:17.

N’eky’amazima obumwe abantu nibabaasa kututwariza kubi. Abaana abandi nibabaasa kwanga ngu otazaana nabo. Nibabaasa kukugira bati: “Titurikwenda kuba naiwe.” Ekintu nk’ekyo kyabaho, nikibaasa kutugwisa kubi, tikwo? Nitubaasa kuhuurira twayenda kweshashuza. Kwonka shi tushemereire kweshashuza?—

Ka nkushabe oshuuruure Baibuli yaawe tushome Enfumu eshuura 24, orunyiriri 29. Nihagira hati: “Otarigira oti: Ndyamugira nk’oku yangizire, ndyamuhoora ahabw’eki yaakozire.”

Nooteekateeka ngu orunyiriri orwo nirumanyisa ki?— Nirumanyisa ngu titushemereire kweshashuza. Titushemereire kutwariza kubi omuntu ahabw’okugira ngu yaatutwariza kubi. Kwonka shi omuntu yaateeraho kwenda kukureetera kurwana nawe? Naabaasa kuteeraho kukugwisa kubi arikukweta amaziina mabi. Naabaasa kukushekyerera kandi agire ngu ori omutiini. Niki eki oshemereire kukora? Ekyo kishemereire kukureetera kurwana?—

Ka tugarukye tureebe eki Baibuli erikugamba. Ka tushome Matayo eshuura 5, orunyiriri 39. Yesu akagira ati: “Otarirwana n’omuntu mubi. Omuntu weena orikuteera oruhi rw’omushaya gwa buryo, omuhindurire ogwa bumosho.” Noogira ngu Yesu akaba naamanyisa ki? Mbwenu shi akaba naamanyisa ngu omuntu yaakuteera oruhi aha mushaya gumwe, omurekye akuteere n’aha gundi?—

 Ngaaha, Yesu akaba atarikumanyisa ekyo. Okuteera omuntu oruhi tikiri nk’okumuteera entomi. Okuteera omuntu oruhi nikibaasa kushushana n’okutsindika omuntu. Omuntu naabaasa kukutsindika arikwenda ngu murwane. Naaba naayenda ngu oguubwe kubi. Kwonka shi waaguubwa kubi naiwe okamutsindika, niki ekirikubaho?— Obundi nimubaasa kurwana.

Kwonka Yesu tarikwenda ngu abakuratsi be barwane. N’ahabw’ekyo akagira ngu omuntu yaatuteera oruhi, titushemereire kurumugarurira. Titushemereire kuguubwa kubi tukahika aha kurwana. Twaguubwa kubi tukarwana, nituba nitushushana n’owaatandika endwano.

Haagira owaayenda kurwana naiwe, nooteekateeka ngu niki eki oshemereire kukora?— Ni kirungi okuruga omu mwanya ogwo. Orikuba naayenda kurwana naiwe naabaasa kukutsindika emirundi erengire  ahari gumwe. Kwonka bwanyima y’okukutsindika naabaasa kutagira kindi eki yaakora. Waaruga ahu ari okagyenda nikiba kitarikumanyisa ngu ori omutiini. Nikimanyisa ngu omaririire kukora ekihikire.

Kwonka shi ku waakurwana kandi okasingura ou waaba noorwana nawe? Niki ekirikubaasa kubaho?— Ou waateera naabaasa kugaruka na banywani be. Nibabaasa kukuhutaaza n’enkoni nari n’omusyo. Nooreeba enshonga ahabw’enki Yesu yaagizire ngu titushemereire kurwana?—

Tushemereire kukora ki twareeba abantu abandi nibarwana? Mbwenu shi tushemereire kushagika omwe aharibo?— Baibuli neetugambira ekihikire eki twine kukora. Shoma Enfumu eshuura 26, orunyiriri 17. Nirugiri ruti: “Orikwetaasya omu ntongane zitari ze, ni nk’orikukwata amatu g’embwa erikuhingura.”

Niki ekirikubaho waakwata amatu g’embwa? Nikigigwisa kubi, kandi neebaasa kukuruma, tikwo? Oku embwa erikuteeraho kukuruga omu ngaro, naiwe nikwo orikweyongyera kugihamya kandi nikwo erikweyongyera kuguubwa kubi. Ku orikugirekura neebaasa kukuruma. Mbwenu shi noobaasa kuguma ogikwatsire amatu mpaka?—

Obwo nibwo buremeezi bw’amaani obu turikubaasa kutunga twayetaasya omu ndwano z’abandi. Nitubaasa kutamanya owaatandika endwano nari ahabw’enki bariyo nibarwana. Nibabaasa kuba bariyo nibateera omuntu ahabw’okugira ngu yaiba ekintu aha muntu ondiijo. Twahwera ogwo ou bariyo nibateera, nituba  nituhwera omushuma. Ekyo buzima nikiba kitari kirungi, tikwo?

Mbwenu, okaakora ki waareeba abantu nibarwana?— Waaba ori ah’eishomero, noobaasa kwiruka ogambire omushomesa. Kandi waaba otari h’eishomero noobaasa kuteerera abazaire baawe esimu nari abapoorisi. Buzima, n’obu abantu abandi baraabe nibakunda kurwana, itwe tushemereire kurinda obusingye.

Abeegi ba Yesu ab’amazima nibateeraho munonga kwetantara endwano. Twakora tutyo nitworeka ngu nitukunda kukora ekihikire. Baibuli neegira ngu omwegi wa Yesu “tashemereire kuba entongani, kureka orikutwaza gye ahari boona.”​—2 Timoseo 2:24.