YU SABI wan tu boi noso meisje di e prei kefalek taki den no frede nowan sma?— Yu lobi fu de nanga den? Noso yu wani de nanga wan sma di abi switifasi èn di no wani meki trobi nanga trawan?— A Bigi Leriman ben taki: „Koloku fu den sma di lobi vrede, bika sma sa kari den, ’den manpikin fu Gado’.”​—Mateyus 5:9.

Ma son leisi tra sma e du sani di e meki wi atibron. A no so a de?— Sobun, wi ben kan feni taki wi musu du wan sani baka nanga den sma dati. Wan leisi a sani disi pasa nanga den disipel fu Yesus di den ben e teki waka nanga en go na Yerusalem. Meki mi fruteri yu a tori dati.

Di den ben waka moi fara kaba, dan Yesus seni wan tu fu den disipel fu en go na fesi na wan dorpu fu Samariasma. Den ben musu go suku wan presi pe den ben kan rostu. Ma den sma fu drape no ben wani den fu tan na ini a dorpu fu den, bika den Samariasma  ben abi wan tra bribi. Boiti dati, den Samariasma no ben lobi nowan sma di ben e go anbegi na a foto Yerusalem.

Efu dati ben pasa nanga yu, dan san yu ben o du? Yu ben o kisi atibron? Yu ben o wani du wan sani baka nanga den?— Na dati den disipel Yakobus nanga Yohanes ben wani du. Den ben taigi Yesus: ’Yu wani taki wi meki faya fu hemel saka kon na den tapu fu kiri den?’ Fu dati ede a no e fruwondru wi taki Yesus ben kari den man disi Manpikin fu Dondru! Ma Yesus ben taigi den taki a no ben bun fu du so nanga tra sma.​—Lukas 9:51-56; Markus 3:17.

A tru taki sma kan du takru sani nanga wi son leisi. Kande tra pikin no wani wi fu prei makandra nanga den. Den ben kan taki srefi: „Wi no wani yu dyaso.” Te so wan sani e pasa, dan dati kan meki wi atibron, a no so? Kande wi feni taki wi musu du den wan sani baka. Ma wi musu du dati?—

Teki yu Bijbel, èn meki wi luku Odo kapitel 24, vers 29. Drape wi e leisi: „No taki: ’Soleki fa a du nanga mi, na so mi o du nanga en. Mi sa pai ibri sma baka soleki fa a e du nanga mi.’ ”

San yu denki a tekst disi e leri wi?— A e leri wi taki wi no musu pruberi fu du wan sani baka nanga wan sma di du wan sani nanga wi. Wi no musu du ogri nanga wan sma soso fu di a du ogri nanga wi. Ma fa a de te wan sma e pruberi fu feti nanga yu? A ben kan kosi yu fu di a wani meki yu kisi atibron. A ben kan spotu yu èn taigi yu taki yu frede. Kande a e taki dati yu na wan fredeman. San yu musu du? Yu musu feti nanga en?—

Meki wi luku ete wan leisi san Bijbel e taki. Luku Mateyus kapitel 5, vers 39. Drape Yesus e taki: ’No strei nanga na ogriwan; ma efu wan sma naki yu na a retisei fu yu fesi, dan drai a tra sei gi en tu.’ San yu denki Yesus ben wani taki nanga dati? A ben wani taki dati efu wan sma e naki yu wan kofu na a wan sei fu yu fesi, dan yu musu meki a naki yu na a tra sei fu yu fesi tu?—

 Nôno, a no dati Yesus ben wani taki kwetikweti. Te wan sma e naki wi wan klap, dan dati no de a srefi leki te a ben o naki wi wan kofu. Moro furu dati wani taki dati a e pusu wi. Wan sma ben kan naki wi wan klap, fu di a wani feti nanga wi. A wani meki wi kisi atibron. Èn san e pasa efu wi e kisi atibron èn wi e pusu en baka?— We, a kan taki wi sa bigin feti.

Ma Yesus no ben wani taki den bakaman fu en e feti. Fu dati ede a taki dati efu wan sma e naki wi, dan wi no musu naki en baka. Wi no musu kisi atibron so taki wi e bigin feti. Te wi e du dati, dan wi e sori taki wi de neleki a sma di bigin a feti.

Te problema e kon, dan san yu denki na a moro bun sani fu du?— Yu musu gowe fu drape. Kande a tra sma o naki yu, noso a o pusu yu ete wan tu leisi. Ma baka dati a sa musu fu tapu nanga dati.  Te yu e waka gowe, dan dati no wani taki dati yu swaki. A wani taki dati yu tranga, fu di yu no frede fu du san bun.

Ma fa a de efu yu e feti èn yu e wini a feti dati? San ben kan pasa baka dati?— Kande a sma di yu fon sa kon baka nanga wan tu mati fu en. Den ben kan gebroiki wan bigi tiki noso wan nefi fu gi yu mankeri. Sobun, yu kan si now fu san ede Yesus no ben wani taki wi musu feti?—

San wi musu du te wi si tra sma e feti? Wi musu teki a sei fu a wan, noso a trawan?— Bijbel e taigi wi san na a yoisti sani fu du. Luku Odo kapitel 26, vers 17. A e taki: „Leki wan sma di e grabu den yesi fu wan dagu, na so iniwan sma de di e pasa èn di e kisi bigi atibron fu wan trobi di no de fu en.”

San ben o pasa efu yu grabu den yesi fu wan dagu hori? Dati ben o hati a dagu, èn a ben o suku fu beti yu, a no so? O moro a dagu ben o pruberi fu hari ensrefi puru, o moro tranga yu ben o abi fu hori den yesi fu en, èn o moro a dagu ben o krasi fu beti yu. Efu yu lusu en, a kan taki a o beti yu tranga. Ma yu sa man tan hori en yesi fu ala ten?—

We, na a problema dati wi ben o kisi te wi e go bumui na ini wan feti di de na mindri tra sma. Kande wi no sabi suma bigin a feti, noso fu san ede den e feti. Te wan sma e fon wan trawan, dan a kan taki a sma dati  fufuru wan sani fu en. Efu wi e yepi a sma, dan wi ben o yepi wan fufuruman. Dati no ben o bun, a no so?

Sobun, san yu musu du te yu e si wan feti?— Efu a de na skoro, dan yu kan lon go taigi wan skoromeester. Èn efu a de na wan tra presi, dan yu kan kari yu papa noso mama, noso wan skowtu. Iya, srefi te tra sma wani feti, wi musu pruberi fu meki sani bun baka.

Tru disipel fu Yesus e du ala san den man fu no feti nanga trawan. Na so fasi wi e sori taki wi no frede fu du san bun. Bijbel e taki dati wan disipel fu Yesus „no abi fu feti, ma a musu abi switifasi gi ala sma”.​—2 Timoteyus 2:24.