BAKHONA YINI bafana nobe emantfombatana lowatiko latenta labakhulu aphindze atsandze kucalana?— Uyatsandza yini kudlala nabo? Nobe ukhetsa kudlala nemuntfu lolungile nalotsandza kuthula?— Umfundzisi Lomuhle Kakhulu watsi: “Bayajabula labo labatsandza kuthula, ngobe bayawubitwa ngekutsi ngemadvodzana aNkulunkulu.”​—Matewu 5:9.

Kodvwa ngalesinye sikhatsi, bantfu benta tintfo letisitfukutselisako. Angitsi kunjalo?— Singase sifune kutiphindziselela. Loko kwenteka nakubafundzi baJesu ngalesikhatsi bahamba naye baya eJerusalema. Ase ngikucocele ngalendzaba.

Ngalesikhatsi sebahambe libangana, Jesu watfumela labanye bebafundzi bakhe kutsi bahambe embili baye edolobhaneni laseSamariya babatfolele indzawo yekulala. Kodvwa bantfu balapho abazange babemukele ngobe  emaSamariya bewanenkholo leyehlukile. Bekangabatsandzi bantfu lebebaya kuyokhonta Nkulunkulu edolobheni laseJerusalema.

Kube kwenteka kuwe loko, bowungenta njani? Bewungatfukutsela yini? Bewungafuna kutiphindziselela?— Nguloko boJakobe naJohane lebebafuna kukwenta. Batsi kuJesu: “Uyafuna yini kutsi sibite umlilo losuka ezulwini ute ubabhubhise?” Kungako Jesu ababita ngekutsi Ngemadvodzana Ekudvuma Kwelitulu! Kodvwa Jesu wabatjela kutsi akusiyo intfo lekahle kuphatsa labanye bantfu ngaleyo ndlela.​—Lukha 9:51-56; Makho 3:17.

Kuliciniso kutsi ngalesinye sikhatsi bantfu bangase basivise buhlungu. Labanye bantfwana bangase bangafuni kudlala natsi. Bangase batsi: “Asikufuni wena lapha.” Nangabe intfo lenjena yenteka kitsi, ngeke yini kusivise buhlungu loko? Singase sifune kwenta lokutsite lesingaphindzisela ngako. Kodvwa kumelwe yini siphindzisele?—

Ngicela utsatse liBhayibheli lakho. Vula kanye nami umbhalo weTaga sehluko 24, livesi 29. LomBhalo utsi: “Ungasho nekutsi: ‘Ngitamenta loko langenta kona! Ngitakwenana njengobe enta kimi!’”

Kusho kutsini loko kuwe?— Kusho kutsi akukafaneli utiphindziselele. Akukafanele sibaphatse kabi labanye bantfu ngenca yekutsi nabo basiphetse kabi. Kutsiwani nangabe lotsite afuna kulwa nawe? Angase azame kukwenta utfukutsele ngekutsi akhulume tintfo letitakuvisa buhlungu. Angase ahlekise ngawe atsi uyesaba. Kungenteka aphindze atsi uligwala. Utawenta njani? Kufanele yini ulwe naye?—

Asiphindze sifundze loko lokufundziswa liBhayibheli. Vula Matewu sehluko 5, livesi laka 39. Kulombhalo Jesu utsi: “Ningalwisani nemuntfu lomubi, kodvwa nobe ngubani lokushaya esihlatsini sangesekudla, mvumele akushaye nakulesi lesinye.” Ucabanga kutsi Jesu bekasho kutsini ngalamavi? Bekasho kutsi nangabe lotsite akushaya ngesibhakela esihlatsini kufanele simnike lesi lesinye yini kutsi asishaye?—

 Cha, Jesu bekangasho kutsi kufanele wente njalo. Kushaywa ngemphama akufani nekushaywa ngesibhakela. Imphama iphose ifanane nekufucwa nobe kudvudvulwa. Umuntfu angase asishaye ngemphama kuze acale kulwa natsi. Ufuna sitfukutsele. Nase sitfukutsele siyamfuca nobe simdvudvule. Ucabanga kutsi yini lengenteka emvakwaloko?— Kungenteka silwe naye.

Jesu bekangafuni kutsi balandzeli bakhe balwe. Labekakusho kutsi uma umuntfu asishaya ngemphama, akukafaneli siphindzisele ngekumshaya ngemphama. Akukafaneli sitfukutsele siphindze silwe. Nasenta njalo, awukho umehluko loba khona kitsi naloyo locale kushaya.

Nakuvela inkinga, ucabanga kutsi yini lencono longayenta?— Kuhle kuvele uhambe. Lomuntfu angase akufuce nobe akudvudvule tikhatsi letinyentana. Kutawugcina ngaloko nje kuphela. Nawuvele  uhambe, loko akusho kutsi uligwala. Loko kuchaza kutsi unemandla ekumelela lokulungile.

Kutsiwani nangabe ulwa nemuntfu futsi umehlule? Yini lengahle yenteke?— Lona lomehlulile angase alandze bangani bakhe. Bangase bakushaye ngendvuku lenkhulu nobe bakugwaze ngemukhwa. Sewuyabona-ke nyalo kutsi kungani Jesu bekangafuni silwe?—

Yini lokufanele siyente nasibona labanye bantfu balwa? Kufanele yini sitsatse luhlangotsi?— LiBhayibheli liyasitjela lokufanele sikwente. Vula umBhalo weTaga sehluko 26, livesi 17. Lelivesi litsi: “Umuntfu longena ekucabaneni kwalabanye ufanana nemuntfu lobamba inja . . . ngemadlebe.”

Ucabanga kutsi kungentekani nawungabamba tindlebe tenja? Loko kutayilimata, futsi itawufuna kukuluma, angitsi? Njengobe lenja yetama kuphunyula, kutawuba matima kuchubeka utibambile letindlebe tayo futsi lenja itawutfukutsela. Nawuyiyekela, kungenteka ikulume kabuhlungu. Kodvwa ungakhona yini kutibamba letindlebe tayo ungatiyekeli?—

Ngako-ke, lena yinkinga lefanako lesingatifaka kuyo nangabe singenela nakulwa bantfu. Kungenteka asati kutsi ngubani locale lomunye nobe kutsi kungani balwa. Lomunye umuntfu kungenteka ashaywe ngobe mhlawumbe webile. Nangabe setama kumlekelela, sitawube silekelela sigebengu. Angitsi loko angeke kube yintfo lelungile?

 Ngako-ke, yini lokufanele uyente nawubona bantfu balwa?— Nakusesikolweni, ungagijima uyotjela thishela. Nakwenteka bangalwi esikolweni, ungashayela lucingo munye webatali bakho nobe ushayele liphoyisa. Kuliciniso, ngisho nome bantfu bafuna kulwa, tsine kumelwe sakhe kuthula.

Bafundzi baJesu beliciniso benta konkhe labangakwenta kuze bangalwi. Ngalena ndlela sikhombisa kutsi siyakumelela lokulungile. LiBhayibheli litsi umfundzi waJesu ‘akukafaneli alwe, kodvwa kufanele abe nemusa kubo bonkhe.’​—2 Thimothi 2:24.