TIKA ingeyo ngat mo ma kome lit?— I kare mukene komi bene bedo lit. Itwero nongo two abwuru, nyo iwinyo amwoda ic. Jo mukene komgi bedo lit adada. Pe gitwero aa me cung kengi labongo ngat mo ma konyogi. Man pol kare timme ka dano gutii adada.

Dano ducu komgi bedo lit i kare mogo. Tika ingeyo gin mumiyo dano komgi bedo lit, gitii, dok gito?— I nino mo acel kikelo bot Yecu laco mo ma pe twero wot, ci Yecu onyutu gin mumiyo dano gitwo dok gito. Wek kong atitti gin mutimme.

Yecu onongo tye kabedo i ot welo i taun mo macok ki Nam me Galilaya. Ci lwak dano mapol gubino ka neno en. Dong dano gubino mapol ma kabedo onongo peke pi jo mukene me donyo. Pe tye ngat mo ma onongo twero o cok ki doggola. Ento, dano pud gumedde ameda ki bino! Gurup pa jo mo gukelo laco ma tye langolo ma pe twero wot. Onongo mitte dano angwen me tingo en ki kabutone, nyo kitarane.

Tika ingeyo pingo onongo gimito kelo laco ma kome lit-ti bot Yecu?— Gin onongo gitye ki niye ni Yecu twero konyo en. Onongo gingeyo ni Yecu twero cango two meno. Tika ingeyo kit ma guweko langolo-ni oo kwede bot Yecu kadi bed dano onongo gupong i ot?—

Cal ma itye ka nenone kany-nyi nyutu kit ma gutimo kwede. Mukwongo kong gutingo laco-ni malo i wi ot. Wi ot meno onongo tye ma opette apeta. Gutuco wi ot meno malac. I ngeye guluto laco man ma kome lit-ti piny ki kabutone-ni i ot. Pud dong gubedo ki niye ya!

 Dano ducu ma i ot gubedo ki ur matek i kare ma guneno gin ma tye ka timme. Langolo ma tye i wi kabutone-ni kicwalo obino piny i dyegi. Cwiny Yecu mono owang i kare ma oneno gin ma co-ni gutimo?— Pe wa acel! Cwinye obedo yom me neno ni gitye ki niye. En owaco bot laco ma tye langolo-ni ni: “Latinna, balli dong giweko woko.”

Jo mukene gutamo ni pe tye kakare bot Yecu me waco kumeno. Gin onongo pe giye ni en twero timo kica pi bal. Pi meno, me nyutu ni en etwero kwanyo bal, Yecu owaco bot laco-ni ni: “An awacci ni, a malo, iting kabutoni, icit giri paco.”

I kare ma Yecu owaco kumeno, laco-ni onongo dong ocang woko! En onongo dong pe tye  langolo. En onongo dong romo aa malo kun woto pire kene. Dano ma guneno tango man gubedo ki ur tutwal. I kare me kwogi ducu onongo peya guneno gin me aura macalo meno! Gupako Lubanga ma omiyo botgi Lapwony Madit ma twero cango two pa dano.—Marako 2:1-12.

Pwony ango ma wanongo ki i kom tango man?— Wapwonyo ni Yecu tye ki kero me timo kica pi bal ki me cango two. Wapwonyo bene gin mukene, gin mo ma pire tek adada. Wapwonyo ni kom dano doko lit pi bal.

Kit ma wan ducu kine mukene komwa bedo lit-ti, man mono nyuto ni wan ducu lubalo?— Tye kumeno, Baibul waco ni wan ducu kinywalowa ki bal. Tika ingeyo tyen lok man ni kinywalowa ki bal-li?— Tyen lokke ni kinywalowa ki roc. I kare mukene watimo jami maraco kadi bed ni pe wamito timogi. Tika ingeyo kit ma wan ducu wanongo kwede bal?—

Kinywalowa ki bal pien ni laco mukwongo, Adam, okwero winyo dog Lubanga. En otimo bal i kare ma oturo cik pa Lubanga. Wan ducu walako bal ki bot Adam. Mono ingeyo kit ma wanongo kwede bal ki bote? Wek kong atem titone boti i yo ma iromo niang iye.

Gwok nyo dong ineno ngat mo ka tye ka yubo mugati i gin lated mugati. Ngo ma timme i kom mugati ka gin lated mugati  meno bute onot? Tika ingeyo?— Ka ma onot-ti obinen i kom mugati ducu ma kiyubogi ki i iye, pe kumeno?—

Adam obedo calo gin lated mugati meno dok wan wabedo calo mugati. En onongo roc i kare ma oturo cik pa Lubanga. Meno onongo obedo calo en onongo alama mo marac onyo bute onot woko. Pi meno i kare ma en onywalo lutino, lutinone dong gubedo nining?— Lutinone ducu gunongo alama acel me roc-ci.

Pol lutino pe kinywalogi ki roc madit ma itwero nenone. Tyengi ki cinggi aryo ducu nongo tye. Ento roc ma gitye kwede nongo rac matek ma weko two bwoyogi dok motmot gito woko.

Ngene kene ni jo mukene two makogi teretere loyo luwotgi. Pingo timme kumeno? Man mono nyuto ni gin dok kinywalogi ki bal madit makato?— Pe kumeno, dano ducu kinywalogi ki bal marom aroma. Wan ducu kinywalowa ki roc. Motmot dano ducu cako nongo two mogo. Kadi wa dano ma gitemme me lubu cik ducu pa Lubanga dok pe gitiyo gin mo marac tutwal pud komgi twero doko lit.

Ento pingo jo mukene komgi bedo lit teretere loyo luwotgi?— Tyen lokke pol. Twero bedo ni pe gitye ki gin acama muromo. Nyo mogo nongo pe gicamo cam ma mitte pi yotkomgi. Twero bedo ni gicamo kodi cam mogo ma ka kicamo mapol kelo two. Mukene bene nongo gicito kabuto i cwiny dyewor ma weko nino pe romogi. Nyo bene mogo nongo pe girukke ki bongo lageng koyo ka gikato woko ma piny ngic. Jo mukene komgi goro tutwal ma pe  twero lweny ki two kadi bed ni gitemme me gwokke maber.

Tika kare mo bibino ma pe wabitwo? Tika wabibedo agonya ki i kom bal?— Ngo ma Yecu otimo bot laco ma langolo ca?— Yecu otimo kica pi balle ci ocango twone. I kit yo acel-lu, Yecu onyutu gin ma en bitimone pi jo ma temme ki tekogi ducu me timo gin matir.

Ka wanyutu ni pe wamito timo bal dok ni wadag jami maraco ci Yecu bicangowa. I kare ma anyim, en bikwanyo roc ma watye kwede i kare-ni. En bitimo man macalo Kabaka me Ker pa Lubanga. Pe kibikwanyo bal ki i komwa lawang acel. Kwanyone bitero kare. Ka balwa kikwanyo ci komwa pe dong bibedo lit matwal. Wan ducu wabibedo ki yotkom. Man pud dong bibedo twon mot madit adada!