BUSHE walishibako uuli onse uwalwala?— Napamo inshita shimo nobe wine ulalwala. Napamo kuti walwala icifine, nelyo mu mala. Abantu bamo balilwalisha. Tabeminina ukwabula uwa kubaafwa. Ici cicitika ilingi lintu abantu bakota sana.

Bonse tulalwala inshita shimo. Bushe walishiba umulandu abantu balwalila, ukukota, no kufwa?— Bushiku bumo umuntu uushaleenda aletelwe kuli Yesu, kabili Yesu alangile umulandu abantu balwalila no kufwa. Leka nkushimikile ifyo cali.

Yesu aleikala pa ng’anda imo mu musumba wali mupepi na Bemba wa Galili. Ibumba lya bantu lyaishile ku kumumona. Abantu abaishile bali abengi sana ica kuti mu ng’anda tamwali ncende ku kuleka na bambi bengile. Takwali na balepalama na ku ciibi. Na lyo line, abantu batwalilile ukwisa! Ibumba limo ilya bantu baletele umwaume ali no bulebe, uushaleenda. Cakabile abaume 4 ukumusendela pa busanshi bunono nelyo pa butanda.

Bushe walishiba umulandu balefwaila ukuletela uyu mulwele kuli Yesu?— Balitetekele ukuti Yesu kuti amwafwa. Balisumine ukuti Yesu kuti aposha bulya bulwele. Bushe walishiba ifyo batwele ulya muntu wa bulebe kuli Yesu ninshi kuli abantu bonse balya mu ng’anda?—

Icikope ulemona pano cilelangilila ifyo cali. Ica kubalilapo, Baninine pa mutenge na ulya muntu. Wali mutenge wabatama. Lyene batulile icipunda cikalamba mu mutenge. Lyene baishishe ulya  mulwele pa butanda bwakwe ukupula muli ico cipunda ukumwingisha mu muputule. Mwandi balikwete icitetekelo!

Abantu bonse mu ng’anda balipapile lintu bamwene ifyalecitika. Ulya mwaume ali no bulebe pa butanda atentemushiwe pa kati kabo. Bushe Yesu alikalipe ilyo amwene ifyo aba bantu bacitile?— Iyo! Alitemenwe ukumona ukuti bali ne citetekelo. Aebele uyu mwaume ali no bulebe ati: “Shalekelelwa imembu shobe.”

Abantu bamo batontonkenye ukuti tacali bwino Yesu ukulande fyo. Tabatontonkenye ukuti kuti alekelela imembu. E co pa kulanga ati kuti acite fyo, Yesu aebele ulya mwaume ati: “Ima, sendo butanda bobe, kabiye na ku ng’anda yobe.”

 Lintu Yesu alandile fyo, ulya mwaume alipolele! Tali uwa bulebe na kabili. Nomba aliimina umwine no kwenda. Abantu abamwene ici cipesha mano balipapile. Tabatalile abamonapo icintu cawama nge ci! Balumbenye Yehova pa kubapeela uyu Kasambilisha Mukalamba, uwaleposha na malwele ya bantu.—Marko 2:1-12.

Cinshi tusambilila kuli ici cipesha mano?— Tusambilila ukuti Yesu alikwata maka ya kulekelela imembu no kuposha abalwala. Lelo tulasambililako icintu na cimbi, icintu cacindama sana. Tusambilila ukuti abantu balwala pa mulandu wa lubembu.

Apo ifwe bonse tulalwala inshita shimo, bushe ici cilepilibula ukuti ifwe bonse tuli babembu?— Ee, Baibolo itila ifwe bonse tufyalwa no lubembu. Bushe walishiba ifyo cipilibula ukufyalilwa mu lubembu?— Cipilibula ati tufyalwa abashapwililika. Inshita shimo tulalufyanya, na lintu tatulefwaya ukulufyanya. Bushe walishiba ifyo ifwe bonse twaishilekwata ulubembu?—

Twaishilefyalwa mu lubembu pantu umuntu wa kubalilapo, Adamu taumfwilile Lesa. Alibembwike lintu atobele ifunde lya kwa Lesa. Kabili ifwe bonse twafumishe ulubembu kuli Adamu. Bushe walishiba ifyo twafumishe ulubembu kuli wene? Leka njeshe ukukulondolwela mu nshila wingomfwa.

Napamo walimonako bamo balepanga umukate nelyo [amashikono] muli pani. Cinshi cili no kucitika ku mukate nga ca kuti  pani nayongama? Bushe nawishiba?— Kulya kwine kongama kuli no kumoneka pa mukate onse bapanga muli ilya pani, bushe te ifyo?—

Adamu ali kwati ni pani ine ilya, kabili ifwe twaba ngo mukate. Aishileba uushapwililika lintu atobele ifunde lya kwa Lesa. Cali kwati aongamako, nelyo akwata icifwati cabipa. E ico ilyo akwata abana, bali no kuba shani?— Abana bakwe bonse bali no kukwata ici cine cifwati ca kukanapwililika.

Abana abengi tabafyalwa no kukanapwililika uko wingamona. Tabafyalwa ukwabula ukuboko nelyo ukuulu. Lelo ukukanapwililika bakwata kukulu ukwa kubalengo kulwala, na mu nshita, ukufwa.

Kwena, abantu bamo balalwala ilingi ukucila bambi. Mulandu nshi cabele fyo? Bushe ni pa mulandu wa kuti bafyalwa no lubembu ulwingi ukucila bambi?— Iyo, bonse tufyalwa no lubembu lumo lwine. Bonse tufyalwa abashapwililika. E ico, mu kuya kwa nshita, bonse ifwe tulalwala. Nangu bantu abesha ukuumfwila amafunde ya kwa Lesa yonse kabili abashicita ifyabipa kuti balwala.

Lyene, mulandu nshi abantu bambi balwalila ilingi ukucila bambi?— Kwaliba imilandu iingi. Kuti caba ukuti tabalya ifya kulya fyakumanina. Nelyo tabalya ifya kulya bafwile ukulya. Nelyo napamo balalya sana ifya kulya fishaba bwino. Umulandu umbi kuti waba wa kuti tabalala bwangu kabili tabalala utulo twakumanina. Nelyo tabafwala ifyakaba lintu bafuma pa nse ilyo kutalele. Imibili ya bantu bamo tayakosa, kabili tabengacimfya  amalwele, nangu baesha ukuisakamana.

Bushe kukabala akubako inshita lintu tushakalelwala? Bushe tukabala atulubukako ku lubembu?— Cisuma, cinshi Yesu acitile ulya mwaume ali no bulebe?— Yesu alimulekelele imembu no kumuposha. Muli iyo nshila, Yesu alangile ico ali no kucita bushiku bumo kuli bonse ababombesha ku kucita icisuma.

Nga twalanga ukuti tatulefwaya ukubembuka no kuti twalipata ifyabipa, Yesu akatuposha. Ku ntanshi, akafumya pali ifwe ukukanapwililika twakwata. Akacite ci pamo nge Mfumu ya Bufumu bwa kwa Lesa. Ulubembu talwakafumishiwe pali ifwe pa muku umo. Lukafumishiwapo mu kupita kwa nshita. Lyene lintu ulubembu lwesu lukapwa, tatwakalelwala kabili iyo. Bonse tukaba no bumi bwapwililika. Mwandi ico cikaleta insansa!